原島大地

原島大地15年後重返香港拍《某日某月》 最享受嘅係⋯⋯

藝人專訪

廣告

原島大地02年出道、03年因為《忘不了》爆紅,直到前年搖身一變長成男神出席金像獎頒獎典禮,原島大地其實沒有放下演藝事業,一直在中港日三邊走,客串電影電視劇,幾乎每年都有份「暑期工」可以賺零用。佢接受本刊專訪大談由多年演出的點滴,還分享15年後重返香港拍《某日某月》的感受和最享受的事⋯⋯

撰文:東方新地|圖片:新傳媒圖片庫、原島大地微博

原島大地拍《忘不了》 畀媽咪搣大髀

02年出道、03年因為《忘不了》爆紅,直到前年搖身一變長成男神出席金像獎頒獎典禮前,原島大地其實沒有放下演藝事業,一直在中港日三邊走,客串電影電視劇,幾乎每年都有份「暑期工」可以賺零用。

「我會乖㗎嘞,唔好唔要我!」未見原島大地,先從腦海裡跳出這句對白,想起那些年同張栢芝的《忘不了》、保良局外的經典一幕,真的心都赤。

 

15年後,5歲的冬菇頭小男孩已經長成高大帥氣又會打籃球的小男神,當年拍戲為甚麼那麼會哭、眼淚那麼能感染人,剛滿20歲的原島大地偷偷說出一個秘密:「以前咁細個邊度識做戲呢?拍戲識喊,通常都係因為畀媽咪鬧到喊,其實保良局出面嗰一幕(喊得淒厲),係因為媽咪搣我大髀!」

第一個反應:「點解係搣大髀?」原島大地:「因為腳睇唔到吖嘛!」

係好笑嘅,不過又覺得有點兒心酸,原來從小就會演戲的天才兒童真的沒有幾個。

雙重身份:享受平淡

事隔多年,再次回歸香港電影,在《某日某月》第一次擔大旗、第一次有感情線、第一次在大銀幕裡和湯怡談一場遙距戀愛,男孩這一次不用母親輔助,已經知道自己想要甚麼:「拍電影,可以感受我未經歷過嘅人生,但係返去日本,我又變番一個普通人,可以享受真正平淡,呢一種可以自己選擇嘅生活,我最享受!」

小時候無辜萌樣最煞食,長大成為男神潛力股,又有多年拍戲、和巨星名導拍檔經驗,理應在日本演藝圈一樣可以吃得開,把演戲當終身職業是常識吧?原島大地卻說自己分得很清楚:「一返到日本,我就係個學生,每日返學、放學打籃球、打完波返屋企食飯。同學大部分都唔知我拍過戲,有套電影叫《忘不了》⋯⋯除咗幾個最friend嘅,特登google我攞出嚟笑我,哈哈⋯⋯」

去年四月,原島高中畢業,四月開始入讀大學,主修國際關係:「我係混血兒,識英文、日文同中文,喺香港、廣州、澳洲仲有日本都生活過,我覺得讀呢科更適合自己,更大機會學以至用⋯⋯實情係,更大原因係我最好嘅朋友都揀咗呢科!」

 

大學第一個暑假,原島被劉偉恒導演睇中回港做暑期工,在電影《某日某月》裡飾演任性反叛又至情至性的富二代旭日,訪問這一天,剛好是拍攝的最後一天,第二天一早原島就要早機回日本,為大學新學期開學作準備:「你問我細細個出嚟拍戲,喺二十歲呢個階段最享受邊一種生活,我可以答你,我最享受就係依家咁樣,放假拍戲,去經歷現實生活唔會有機會經歷嘅嘢,去過另一種人生,周圍走,又可以當係旅行,畀自己放吓假。但係返到日本,就變番一個踩住單車去返學,放學打波嘅普通學生,細細個喺片場大,我覺得最開心喺片場我可以過另一種人 生,返到學校,我又可以回歸平淡,體驗人哋口中嘅大學生涯。自細喺片場大,習慣咗片場生活,我唔會覺得拍戲係一件辛苦嘅事;同時同大導演、大明星一齊工作、出席金像獎見到好多記者,生活當然繽紛又五光十色,我都有時候會問自己,喺呢個行業係唔係可以好似佢哋咁,爬到一個更高嘅位置⋯⋯不過我諗20歲就係可以有呢種自由,我可以自己去揀同決定,未來到底行邊條路,全部都係未知數。」

這就是20歲的好處,人生充滿未知,甚麼可能都有。

十年以後:我要買GTR

第一次做男主角、對手戲碰上港男一致認為最「girlfriendable」、高質溫馴又甜美的湯怡,問原島這一年暑期工最難忘的經歷,sorry,不是湯怡,而是「車」。

「爸爸係從事汽車行業,唔知係唔係因為咁呢,我由細到大都最鍾意車,屋企儲埋最多汽車模型、上youtube一定係搵賽車片嚟睇、依家買最多就係汽車雜誌, 鍾意車鍾意到連機械都會著迷。呢個暑假呢套戲,唔使問,我最開心就係拍揸車自駕嗰場,嘩紅色BMW喎!仲係開篷!諗番都覺得爽!」

羨慕郭天王

雖然沒有合作過,不過天王城城9個位泊了12架超跑的戰績,原島大地話最羨慕:「正!我諗呢個係每個男仔嘅夢想,我唔使12架嘅,30歲之前,可以儲到5、6架車,其中一架要係我Dream Car GTR就夠喇!」

我要買GTR?仲要儲齊5、6架,認真大想頭!不過莫欺少年窮,誰敢說原島十年後做不到?

原島說GTR行情自己最清楚,大概二千萬日圓上落。14年戲齡、年年暑假打工賺外快,那現在距離目標還差多遠,原島笑了:「其實我唔知,要問媽咪,咁多年都係佢幫我儲起啲錢。」可愛到一個點,少年不知愁滋味,更加唔多識計數。

「我諗細個開始拍戲都有一個好處,其他小朋友嘅生活好簡單、一切都好易得到,但係我會知道呢個世界有好多故事、好多人經歷緊好多困難。你話有幾多個小朋友可以試過喺保良局門口拉拉扯扯、以為自己乖啲就唔使畀人掉低、就可以有個屋企呢?所以我拍戲、見到咁多superstar,唔係好威、好出名、可以賺到好多錢,而係知道做人唔同階段總要經歷唔同困難,人生就係好多問題要學識解決,10年之後30歲嘅我係點我唔知,但係我知道要達成夢想,就一定要努力、比人哋更努力,我嘅目標,就係要買晒所有我鍾意嘅車!」

 

關鍵詞
原島大地