何超蓮

何超蓮開麵店 做人肉廣告牌

過大海、出遠門、坐飛機,你會帶啲乜?行李要執、篋要攞、潮人土豪又順手晒吓精心襯過的機場look、新入手包包同限量篋是常識吧!唔該晒何超蓮真身示範,真正千金大小姐出門,係乜都唔使拎!

撰文:東方新地|圖片:新傳媒圖片庫、何超蓮IG

何超蓮過大海只帶電話銀包

無花無假,何家最靚千金日前由屋企出發上保母車,打算過澳門,首先返最近投資開設嘅牛肉麵店巡視業務,喺銅鑼灣鬧市左穿右插,再上保母車去第二站嘅上環信德中心,由專人接落車、行VIP通道、上到直升機,都係一個電話加銀包,全身嘅重點裝束係上身嘅自家麵店員工Tee,睇得出超蓮幾咁事業心重,為自己創業嘅麵店全天候為麵店宣傳,自己做埋人肉廣告牌點都好過花多多錢廣告費,超蓮印證畀大家知何謂有樣有身材兼而有智慧!

何超蓮

無論考會計師牌、入主家族生意、澳洲開酒店定讀碩士進修,何家千金超蓮樣樣都專心又瞓身,最新個人企劃開牛肉麵店,又係日日落鋪頭幫手、去到邊都著住件鋪頭tee做人肉廣告牌。真正富貴係超蓮呢種,出轉門淨係帶手機同銀包,使乜用H字頭包包去證明身價!