陳煒

【深宮計】單身自強 勢擸視后 陳煒拒前夫翻兜

近日在《宮心計2深宮計》演霸氣太平公主的陳煒,由於演技超晒班,力壓同劇一眾女演員,被網民激讚是今屆TVB視后不二之選。事實上,加入無綫6年,陳煒出名肯捱夠博唔錫身,為演《深宮計》政治野心大的太平公主,專登飛台灣修讀心理學,日拍20小時捱到頸椎移位雙眼勁爆紅筋,一樣堅持唔瞓都要演好角色,專業精神值得敬佩。

原來,煒哥還似足太平公主硬淨,離婚6年堅持唔靠前夫,唔要贍養費,煒哥霸氣表示:「自己冇諗過要佢啲錢,冇諗過要靠男人!」事業上位全力衝刺,煒哥諗通晒!唔再浪費時間糾纏一段失敗婚姻,堅決拒前夫翻兜,寧願自己賺錢自己使,為慳家更搬離之前租住的西灣臺1號豪宅,不過近期憑出色演技彈出的她,早已爆Job劇接劇,廣告商演內地登台接踵而來,唔靠男人一樣活得精彩。