地下鐵碰著劉德華？霸哂中環站開記招究竟點做到！
廣告
地下鐵碰著他？竟然係劉德華！日前，應采兒喺Instagram上傳同劉德華嘅自拍，好開心笑哂口咁樣，睇落個背景仲要成個港鐵站咁！隔咗無耐，小編又見到衛詩雅上傳電影《掃毒2》記者招待會嘅照片，仲問大家估唔估到佢哋喺邊個站開記招喎～但劉華力量果然真係沒法擋，竟然可以攞成個地鐵站嚟開記招咁把炮？究竟係點做到㗎？！
撰文：東方新地 ｜ 圖片：Instagram、《掃毒2》Facebook
喺中環站捕獲劉德華！
依家唔少藝人明星都鍾意喺自己嘅Instagram度分享下日常生活、或者宣傳下新作品咁，應采兒都唔例外，但今次竟然係捕獲劉德華咁難得？！
原來，捕獲到嘅唔止有劉德華，仲有古天樂、三哥苗僑偉、應采兒、周秀娜、衛詩雅同張國強喎！衛詩雅仲叫大家估下佢哋喺邊個港鐵站開記招。紅色港鐵站有幾多個啫？聰明嘅網民當然估到係人來人往嘅中環站啦！咪住，唔通《掃毒2》咁把炮封哂成個站開記招？！點做到㗎？！
原來，由邱禮濤編導、劉德華監製及主演嘅電影《 掃毒2 天地對決》斥資超過千萬、歷時五個月，喺啟德郵輪碼頭以實景1:1搭建咗呢個「港鐵中環站」！今次發佈會就首度公開咗呢個實景，真係似到不行，簡直以假亂真呃到小編啊！
電影公司更加安排咗警車，載住「毒犯」劉德華同古天樂現身記招。唔係見到㗎警車駛咗入去，小編都認唔到呢個係佈景啊！
小編都好想可以番工搭港鐵撞到三哥、古天樂、同劉華啊！不過受訪時，古天樂同劉德華都話自己十幾年都冇去過港鐵站，講真拍戲都好難借到港鐵站㗎嘛！三哥就話自己平日都會搭港鐵，仲唔會戴口罩，大方咁話人哋俾面先會想同自己集郵，好型啊！
其實林嘉欣都係主演之一，不過就有事而未能出席。
雖然就冇得地下鐵遇見佢哋啦，但都等小編帶大家睇下佢哋拍戲嘅佈景有幾逼真啦！
見到啲綠幕先似番個拍戲嘅佈景啊！
其實之前都係由劉德華投資監製、邱禮濤執導嘅電影《拆彈專家》都以實景1:1咁搭咗條紅隧出嚟！睇嚟劉華都幾鍾意搭實景開戲喎，唔知下次仲可以搭到啲呢出嚟呢？
