FeatureJerry

可能係最型嘅熟手湊仔公 言承旭自爆:「本身有一個」

高大有型嘅台灣藝人言承旭好似想轉型咁,喺近嚟播放緊嘅內地綜藝節目《放開我北鼻》嘗試做湊仔公,真係估佢唔到,全神貫注咁沖奶粉個樣,好似又幾在行,簡直加哂分!其他人忍唔住就問吓佢係咪有湊仔嘅經驗啦,言承旭猶豫咗幾秒,竟然自爆話:「本身有一個。」此言一出,同場嘅藝人都嚇到窒咗啊!

撰文:東方新地 | 圖片:節目《放開我北鼻》截圖、Instagram

言承旭可能係最型嘅熟手湊仔公

喺節目入面,言承旭又溫柔又有耐心,又大隻靚仔又識湊仔,唔止啲小朋友俾佢氹得開心又聽話,睇緊節目嘅觀眾心都融哂啦!見佢咁熟手咁,難怪其他男人會好奇言承旭之前係咪有經驗嘅。

言承旭:「本身有一個。」

其實內地歌手周震南得嗰18歲仔咁後生,見到言承旭型得嚟湊仔都得心應手,真係自然而然咁好奇問咗句佢有冇湊過仔,點知言承旭會自爆!