胡定欣

越級媾掂視后 張振朗降服胡定欣

胡定欣近年事業愈得意愛情愈失意,前年與陳展鵬情意綿綿一齊拎視帝視后,點知差錯腳上錯賊船,惟有獨守閨房專心工作。直至年初與張振朗到橫店及新疆拍新劇《包青天再起風雲》,胡定欣終於枯木逢春。張振朗向來以鬼馬活潑見稱,把口𠺘過油,今次越級媾視后一樣掂,3月與胡定欣開開心心出發拍外景,4月宣布與拍拖多年的34D尤物女友陳芷尤分手,目標明確。

外景返港後胡定欣不時露口風有人追,又話要停工互相了解,咁啱張振朗上月生日收到胡定欣蛋糕師好友設計的「展昭」造型蛋糕,又一齊去捧豹哥(單立文)豹嫂(胡蓓蔚)出騷,戀情見光後胡定欣例牌否認,不過就話唔介意姊弟戀,仲話同張振朗啱晒channel,唔閂後門合乎國情。張振朗唔止在事業上衝一線,感情上亦愈攀愈高端。

撰文:東方新地|圖片:新傳媒圖片庫、胡定欣IG張振朗IG

胡定欣 好友推波助瀾

圈中姊弟戀熱潮又再湧現,繼Stephy與王子認愛後,又傳出37歲胡定欣與31歲張振朗撻著,二人於3月為新劇《包青天》出發到橫店及新疆拍外景,一拍就50日,朝見口晚見面,相處後擦出愛火花。

胡定欣
胡定欣與張振朗被傳因合作拍新劇《包青天再起風雲》擦出火花,發展相差6歲的姊弟戀。

去年未埋堆

據知開劇前胡定欣與張振朗從未合作過所以並不熟絡,不過張振朗與謝東閔是好兄弟,而謝東閔亦是「Crazy Runner」的成員,不時與胡定欣一齊去練跑,知情者透露:「Owen(張振朗)係個好有正能量嘅人,每次同佢合作都會好開心,去到橫店同新疆,除咗拍劇根本冇其他娛樂,佢就好識搞氣氛又會搵啲小玩意同劇組一齊玩,完全係開心果,就係咁樣就融化咗定欣喇!定欣同佢相處後覺得個人開心咗好多,佢哋仲會傾吓心事咁,好自然就日久生情。返到香港佢哋keep住有聯絡,Brian(謝東閔)同姚子羚亦鼓勵定欣唔需要顧慮咁多,最緊要係有感覺同開心。不過因為Owen同Apple(陳芷尤)分手冇耐,佢哋唔想惹人話柄,想慢慢了解多啲先,所以好多時出嚟都一大班人,定欣亦成日喺Owen IG留言,私底下都好sweet㗎!」