吳若希

【森美旅行團3】吳若希主持依然煩膠 網民負評:大台冇人?

娛聞

廣告

無綫節目《森美旅行團3》 又開播,由森美叔叔、綜藝女王麥美恩、香港先生丁子朗同歌手吳若希主持。播出以嚟迴響都唔錯,不過就唔包括對吳若希嘅評價啦!網民唔單止未睇先負評,直指大台係咪冇人到要搵淨係識大叫「點解嘅」嘅吳若希做主持,又話佢依然煩膠⋯⋯究竟人妻吳若希有咩變化,今輯節目又有咩表現?一齊嚟睇吓啦!

撰文:東方新地 |圖片:TVB節目截圖、連登討論區、YouTube、Instagram

吳若希主持《森美旅行團》 網民負評

《森美旅行團3》照舊有森美叔叔,一拖三,拉埋舊班底麥美恩、新團員小鮮肉丁子朗同埋人妻吳若希。森美負責帶團,麥美恩負責搞笑,丁子朗負責騷肌,但吳若希嘅定位真係唔係好掂,難怪引嚟唔少負評⋯⋯

網民都不解點解無綫會搵吳若希做《森美旅行團2》主持人,睇嚟佢做咗人妻之後,觀眾緣依然都係麻麻哋啦⋯⋯

上一輯嘅女主持就仲有黃心穎同高海寧,兩位女藝人都係女神/BB級。相比起嚟,吳若希嘅受歡迎程度都差幾遠吓!

吳若希「螢幕初浸」輸俾高Ling心穎BB

今次拍《森美旅行團2》,吳若希雖然都有獻出「螢幕初浸」,但都係無力挽回啦!景色普通,吳若希嘅睇頭都好普通⋯⋯

要睇浸溫泉,相信大家都會比較想睇身材出眾嘅高海寧多啲啦!

其實上一輯高海寧嘅穿衣風格都好型格好好睇,係另一個看點!

而上次心穎BB都有份浸溫泉,加埋個靚景,成件事都好賞心悅目!

《森美旅行團2》瘋狂唱歌

今次做主持,吳若希就冇好似之前咁瘋狂問「點解嘅」,但就轉咗另一樣嘢嚟煩觀眾⋯⋯就係瘋狂唱歌啦!其實睇睇吓旅遊節目,真係唔係特別想聽佢無啦啦又開金口⋯⋯可能寫劇本嘅人下次都係要再諗諗佢啦!

諗起吳若希嘅經典歌曲,又點可以唔睇當年日播夜播嘅〈越難越愛〉呢?無綫咁搞法,令好多網民都覺得首歌聽到勁厭,又係因為煩而引嚟負評!

水母刺身係海蜇!點解嘅!

另一個惹負評嘅原因就係吳若希有時主持風格都幾無厘頭、傻傻吓咁,咁講嘢就又有啲無聊同又係煩⋯⋯好似有一集佢就好想分享一件自己同老公嘅「趣事」,講起佢老公有次食飯話想叫「水母刺身」俾佢食,但吳若希就發現只不過係海蜇。

嗯⋯⋯咁水母就真係海蜇啊嘛!除咗「哦」一聲,其他人都唔係好知點接落去,Noted with thanks⋯⋯

點解魚頭會有第三隻眼嘅?

喺另外一集,眾人就去到一間出名食魚頭嘅餐廳。森美介紹嗰陣就話間餐廳有七種烹調魚頭嘅方法,唔知吳若希聽到啲咩,就問枱面嗰兩碟係咪嚟自同一條魚!但明明就可以見到兩碟夾埋有三隻魚眼⋯⋯

到森美大哥逐隻眼數俾佢睇嗰時,吳若希都仲係呆呆地咁淨係識得傻笑,而丁子朗同麥美恩個樣都好老尷!

煩膠地獄廚神:雞肉刺身

除咗煩同埋無厘頭之外,吳若希另一個之處就係嘈,好嘈!之前佢上《美女廚房》,大家除咗可以發現人妻吳若希原來係地獄廚神之外,仲可以聽到佢嘅尖叫聲。

吳若希煮到咁,點食啊!難怪一班主持人都想倒哂啲「雞肉刺身」去,但吳若希就即刻尖叫,叫好友胡鴻鈞唔好,仲話唔可以浪費佢嘅心思⋯⋯陰公,嘢係唔可以亂食㗎!

《街頭魔法王》瘋狂尖叫:「點解嘅?」

回想起吳若希初出道時真係觀眾緣奇差,被網民瘋狂俾負皮!不得不提嘅當然係佢主持無綫節目《街頭魔法王》嗰時,瘋狂尖叫「點解嘅」,勁浮誇,真係煩到有啲頂佢唔順⋯⋯

唔係講笑,呢個時期嘅吳若希集煩、嘈、膠於一身,小編真係睇唔哂條片,大家不妨挑機。

即刻重溫吳若希嘅「星星負皮卷」: