【生日快樂】波波池搞生日會 謙謙啜爆楊怡 甜蜜放閃
謙謙 楊怡 結婚兩年幾
2016年3月，拍拖五年，楊怡同謙謙係英國古堡舉行Wedding Blessing儀式，同年8月，正式宣佈婚訊，並在同年10月2日在香港完婚，豪擺五十圍，廣邀圈中好友席，結婚兩年幾，甜蜜指數有增無減﹗
謙謙啜爆楊怡 甜蜜放閃
今日係謙謙嘅34歲生日，而後日係楊怡39歲生日，日子咁接近，兩夫婦索性一齊搞生日party慶祝，仲請咗好朋友出席！謙謙在社交網貼相晒愛，啜爆老婆放閃，sweet到爆！
壽星仔謙謙留言：「跟阿怡一起開生日會，難忘的一個晚上，多謝各位朋友的祝福，感激感激，希望大家天天都笑口常開。」
送花牌冧楊怡
婚後二人各有各忙，阿怡近日更去到上海演出舞台劇《我和春天有個約會》。雖然兩公婆分隔兩地，但一樣無阻兩人甜蜜晒恩愛！日前阿怡就在微博上載多張照片，見到謙謙向太太越洋送上大禮，氹到阿怡心花怒放，閃死人啦！
楊怡 黃金海岸避寒
楊怡一直恨生B﹐仲話隨時ready造人，一拍完《再創世紀》，就同老公羅仲謙夾定大假，飛咗去澳洲，過一個熱辣辣嘅冬天，陽光與海灘，朝夕相對，放假之餘當然把握時機造人，楊怡喺IG貼咗段玩水上滑梯同大家分享旅程嘅快樂，﹗
楊怡尖叫玩水上滑梯
除咗遊覽景點之外，仲去咗當地嘅水上樂園，楊怡就喺IG放咗段玩水上滑梯嘅片，片段中楊怡同一直尖叫兼合埋對眼，睇得出佢好鬼驚，難怪佢留言自嘲：「有邊個好似我咁，又要驚又要玩。」
而謙謙滑行期間回頭望楊怡，早佢一步著陸嘅佢，又立即轉頭緊張望實老婆仔，等埋佢先上水﹗網民即大讚「係愛呀」、「冧死人」、「謙謙好緊張老婆」，嘩，又唔覺意放咗閃光彈燦親大家㖭﹗
安排造人之旅
楊怡一直恨生B，舊年12月完成咗拍咗足足四個幾月嘅《再創世紀》之後，就開行turbo造人，佢話：「隨時ready，之前日日凌晨四點起身開工，邊有精神？依家可以重新調整生活。身邊好多朋友都話介紹中醫同食療畀我，我都會試吓嘅。（老公係咪全力配合？）配合﹗不過之前自己仲忙過老公，所以一路未有好消息﹗」今次楊怡謙謙安排澳洲之旅，可以日對夜對全力造人，相信好快有好消息喇﹗
要求楊怡減產
工作量大增嘅謙謙話刻意想老婆減少工作，享受做少奶奶，謙謙話：「阿怡過去咁多年長年累月冇停過，依家就要佢180度轉變，依家大約一年一個作品，唔想佢咁辛苦，自己就拼搏啲﹗」
至於生仔大計，阿謙唔想太太有壓力話：「順其自然，呢樣嘢唔只係女性責任。（叫太太做跟得夫人？）我唔畀佢跟住我，喺內地拍嘢或者錄影廠空氣唔太好，同埋我開工就冇時間陪到佢，倒不如佢留喺香港，我一休息就飛返香港陪佢仲好啦！」他又自爆拍得辛苦時有向楊怡撒嬌，太太會講說話鼓勵佢，夫妻間好Sweet。
成日放閃，冧死人﹗
羅仲謙 低調拍拖結婚
羅仲謙同楊怡嘅感情由拍拖到結婚都備受傳媒追訪，更有好多人追問佢哋幾時生B，羅仲謙接受本刊專訪就指自己冇時間表：「我同老婆之間已經有個默契，生BB唔會強求！」更賣口乖表白自己擺喺第一位嘅唔係生BB，而係佢老婆，認真sweet！
羅仲謙同楊怡2016年到英國古堡舉行秘密婚禮，問到佢當年結婚點解咁神秘？羅仲謙笑言：「唔好話結婚咁神秘，我連拍拖都好低調，因為我覺得兩個公眾人物如果太高調，傳媒就會你拍咩戲、同咩女對手，甚至同個朋友、同個女助手出街都可以變成緋聞，兩個人之間係靠信任，但傳媒嘅力量都幾大，你一次、兩次，到第十次⋯⋯梗會有少少影響，所以愈低調，其實感情反而會保存得更加好，唔會有其他外界嘅力量干擾到。至於結婚，我同我老婆都希望可以浪漫啲，因為難得可以去英國嘅城堡影相、少少童話啲嘅感覺，我哋又同埋屋企人一齊去，唔想有傳媒喺度，大家會冇咁盡興，結婚一生人一次，最真實嘅一面，我想留番畀自己！」
老婆擺第一位
講到兩人由拍拖到結婚都有好多閒言閒語，問羅仲謙覺得算唔算精誠所至？佢笑：「我唔會用呢啲咁靚嘅字嚟形容，只不過我覺得喺適當嘅時候做適當嘅嘢，同埋我自己本人係需要阿怡呢種咁獨立嘅女性做太太，咁會令我快啲成長！」
而問到佢生仔嘅計劃，羅仲謙就話：「我冇時間表，一段感情拍拖、結婚、生仔都會受傳媒嘅追訪，或者好多人都會問幾時生仔，問得多都會構成壓力，其實我同我老婆之間已經有個默契，生BB唔強求。其實生BB唔係淨係女人嘅事，男人係佔咗好大部分，我呢兩年都少喺香港，變咗好多嘢唔能夠強求，我自己擺第一位唔係生BB，第一位都係我老婆，我覺得隨緣啦！」
