陳展鵬單文柔唔算閃婚啦！盤點七對拍拖2年內結婚藝人
撰文：東方新地｜圖片：
｜盤點七對拍拖2年內結婚藝人
41歲陳展鵬宣布迎娶28歲單文柔
41歲視帝陳展鵬、與28歲落選港姐單文柔去年三月爆出戀情，其後一直都將戀情低調處理，不過早幾日煎Pang就宣布拉埋天窗！
陳展鵬致各傳媒友好：「各位親愛的傳媒朋友、各位好友，多謝大家一直對我的支持和包容。今日，好高興同大家宣布，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福。」
求兩次婚 抱得美人歸
Phoebe接受傳媒訪問時，大爆煎Pang求過兩次婚，第一次在香港趁佢瞓覺時，用一隻自己摺嘅心形紙戒指戴喺佢手，雖然好冧但單文柔都say no，但好開心對方記得佢鍾意手工藝，或者花心思嘅嘢。之後第二次喺英國，煎Pang搵咗條好多人又有巴士嘅大街跪低求婚，佢最期待嘅畫面終於出現，咁感動當然點頭say yes啦！
現年37歲的鍾欣潼(阿嬌) 雖然是眾人的女神，但佢在情路上可以說屢次受傷，至2017年10月突然公開與「台灣醫界王陽明」賴弘國相戀，男方大有來頭，有學識，有外貌更是貼心暖男，二人拍拖後不時在IG放閃，羡煞旁人。想不到還拍拖不到一年就結婚！
阿嬌和賴弘國（Michael）今年三月於洛杉磯舉行婚禮，儀式既溫馨亦感人，阿嬌身穿一襲白色大Deep V婚紗，豔壓全場！雙方在父母的見證下行禮，期間阿嬌多次喜極而泣，當中包括致詞時、好姊妹兼好拍檔蔡卓妍（阿Sa）擁抱祝賀及亦師亦友的經理人霍汶希（Mani）輕吻阿嬌面頰時，阿嬌好激動咁喊！
阿嬌：「行到今日好唔容易…」
在致詞時當阿嬌講到：「行到今日好唔容易…」時喊得最為厲害，全場嘉賓亦眼濕濕，兩個唔同地方、唔同背景的人最終修成正果走在一起，真係好難得！Michael輕吻阿嬌前額的場面充滿浪漫氣息，賴弘國更在鋼琴伴奏下向阿嬌獻上深情一曲〈愛很簡單〉，阿嬌聽完喜極而泣，幸福滿瀉！
好姊妹容祖兒在最後一刻終於成功搞好簽證，趕到洛杉磯送阿嬌出嫁，送上大大的驚喜，令她感動爆喊，「龍虎豹蛇」終於成功合體！
四大天王之一的郭富城(城城) 多年來身邊不乏女伴，但感情生活就好神秘，甚少會公開認定女友身份。直至2015年12月那一夜，城城突然在微博上載咗一張拖手照並留言：「這樣開車要慢一點」，仲tag埋女友方媛(Moka)，如此高調宣布戀情，天王都係第一次！
城城與Moka宣布戀情後一直恩愛非常，屢次傳出結婚消息，去年四月終於舉行婚禮！兩人在半島酒店的婚宴相當低調，只會筵開約十席，男、女家各佔三圍。而圈中人只有城城經理人小美、張智霖、I.T主席沈嘉偉以及排舞師Sunny Wong等朋友。
郭富城公布BB出世
去年九月，城城在社交網興奮晒全家福，上載一張一家三口手指相，宣布女兒Chantelle出世！城城留言：「開心、微妙、感恩！我們仨！成長、家庭、守護！」還有一張「Welcome little one」字樣的圖片。
郭富城早前與太太方媛及一眾好友齊齊慶祝女兒Chantelle一歲生日，更在現場大爆自己將會「雙喜臨門」，其實城城同城嫂都好恨追多一個，如今傳方媛陀第二胎，真係唔出奇！
余文樂靚仔有型兼衣著勁潮，不少年輕男女都視其為男神，不過佢都單身多年，所以感情狀況備受關注！至2016年底樂仔突然在IG上載一張攬住女友睇日落的照片，樂仔更留言：「Invincible. The future is bright。」(無堅不摧，未來充滿光明。) 宣布自己跟台灣29歲「皮帶大王千金」王棠云拍拖！
余文樂今宣布已婚
余文樂與王棠云感情一日千里，拍拖未夠兩年，去年底宣布婚訊，並寫下感言：「在對的時間，遇到對的人，感謝上天把最好的妳安排在最好的時候出現，感謝你的出現讓我的世界充滿正能量，充滿快樂，充滿笑聲，感謝你的純真讓我的世界變得簡單快樂，在這12個月裡你讓我生命發生了巨大的變化，感謝你對我的信任，也感恩你把人生的餘下日子交到我手上，我一定會把幸福帶給你，我一定會好好的照顧你 I love you」
余文樂與太太的愛情結晶品在今年5月出世，兒子中文名「余初見」，英文名Cody～
藝人胡杏兒早年跟黃宗澤分手後，好快就被爆出與金融才俊李乘德(Phil) 拍拖，兩人喺一年就拉埋天窗，2015年底於香港麗思卡爾頓酒店進行傳統敬茶儀式，然後到達上水雙魚河鄉村會所註冊行禮。
上傳超聲波照片 公布喜訊
至去年母親節呢個好日子，杏兒兩老婆同步上載超聲波照片、同埋喺馬爾代夫BabyMoon度假中嘅靚相，杏兒留言：「今年的母親節太特別了，感恩上天送給我們的禮物，感覺好奇妙。李寶寶已經急不及待在我肚子裏做仰臥起坐了，寶寶再等一下，爸爸和媽媽也很期待和你見面呢！」
未夠一歲的Brendan仔肥肥白白、表情多多，超級可愛，更成為網民的新寵兒！
就連「胡說八道會」一班靚靚契媽胡定欣、黃智雯、姚子羚、李施嬅，都被肥肥白白的Brendan仔迷倒，大家睇到天然呆Brendan仔同成班勁興奮笑到勁開心的契媽相映成趣！
之後到最近喺《再創世紀》出場的鍾嘉欣，嘉欣於2015年公布與脊醫男友Jeremy拍拖，兩人只係拍拖約十個月就決定結婚！嘉欣認為自己不是閃婚，因為佢和老公年紀都是適婚年齡，大家都比較成熟，而且大家的性格好配合，所以都認定了彼此：「傾偈傾咗幾日，已經有感覺，當然冇同佢講『我覺得你係我將來老公』，但心裏面已經keep住呢個感覺。」
嘉欣女兒梁愛晨(Kelly)於2016年8月出世，依家已經2歲啦！
鍾嘉欣宣布誕下B仔
今年34歲的鍾嘉欣早幾日喺個人社交網公布喜訊，同大家宣布已誕下第二胎囝囝！據嘉欣留言透露，今次係喺屋企自然分娩，更指B仔重逾7磅14安士，從相中可見，B仔勁多頭髮之餘，仲個樣肥嘟嘟咁，超級可愛！
而且，嘉欣亦已幫呀仔改好英文名，叫Jared Anthony Leung。由一家三口正式成為一家四口，相信嘉欣一家對於囝囝出世亦非常開心！
53歲韋家雄 甜蜜婚照曝光
最後係TVB綠葉韋家雄！雖然經歷過婚姻失敗，不過韋家雄今年元旦日罕有咁喺fb放閃，公開自己有一個比佢年輕近廿年、從事銀行界嘅女友Keynes，今年10月舉行婚禮！據知兩人是經韋家雄的圈中好友、無綫演員李啟傑介紹認識，而他和前妻所生嘅囝囝都好buy呢位「哎吔媽咪」，難怪韋家雄會再婚啦！
家雄同太太找了本地一間著名婚照公司影婚紗相，穿上婚紗的Keynes好靚女， 難怪家雄同新娘子一樣笑得咁燦爛，二人仲帶埋愛犬忌廉影婚照，好有意義和紀念價值！
婚照其中一個景點是到華富邨取景，家雄是希望和心愛的人重回童年的快樂成長地，而其中一張相在瀑布前留影，原來有段故事，話說他兒時同一班小朋友去到呢個瀑布灣游水時差啲浸死，家雄話好難忘，所以要重回那兒影相留念！
跟前妻因了解而分開曾與陳嘉嘉拍拖
現年53歲的韋家雄早在20歲結過一次婚，與前妻育有一個26歲的兒子韋庭鋒，兒子名字解作「家庭的先鋒」。韋家雄說當初結婚，因為受到童年家庭環境影響，「小時候沒有一個完整的家庭，長大後，很衝動走去組織家庭，那時沒有想清楚大家性格到底合不合得來。加上以前年青，比較自私，想玩便玩，沒有顧慮過對方感受，又或者我工作時間長，大家就會變得疏離、淡了。」
早年跟前妻離婚後，獨力做單親爹哋，將現年26歲的兒子撫養成人。2012年韋家雄與陳嘉嘉在橫店拍《金枝慾孽貳》擦出愛火，當時男方毫不避嫌在人前人後向陳嘉嘉大獻殷勤，成功奪芳心，但交往三年最終分手。有指女方父母嫌棄他年紀大，因而拆散鴛鴦。不過這些都已成過去式⋯⋯
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
