徐濠縈

潮服店執笠 徐濠縈箝實少女康堤

歌神陳奕迅太太徐濠縈點止潮人咁簡單?其實除咗襯衫賣衫、公益活動同交遊廣闊,阿徐最大成就絕對係悉心栽培囡囡康堤。下個月就滿14歲的康堤品學兼優,再加上性格隨和易相處,就讀名校女拔的她是校內風頭躉,大受同學仔歡迎。而一向緊張囡囡的阿徐就打醒十二分精神,嚴選埋身朋友仔,希望康堤合群得嚟亦都唔好耽誤學業。經營十年的潮服店「Liger」將於下月結業,阿徐唔做潮流教母,可以專心做慈母。

撰文:東方新地|圖片:新傳媒圖片、徐濠縈IG

徐濠縈 做全職阿媽

邊個話Eason嫂徐濠縈淨係識遊山玩水花錢買衫㗎?十四年來Eason走南闖北忙搵食,康堤順利入女拔又品學兼優,絕對係媽媽徐濠縈功勞。一年一度又開學,暑假最後一個周末,本刊就發現廿四孝媽媽親自帶住囡囡去眼鏡舖配眼鏡準備開學。買完眼鏡,兩母女隨意站在街邊雞啄唔斷,眨吓眼就快14歲的康堤已經高過媽媽,兩母女話題多多,好感情到兩姊妹一樣!

徐濠縈
臨開學,徐濠縈親自出動陪囡囡康堤配新眼鏡準備新學年。下月四日就滿14歲,康堤已經高過媽媽。

雖然陳家有女初長成,不過在Eason同阿徐心目中,康堤始終年紀細仲需要悉心照顧,日前Eason接受訪問,表示雖然自己在英國留學長大,不過就未捨得送康堤離家;至於阿徐,對女兒的學業生活到交友,一樣緊張管到實,知情者透露:「康堤愈 大,阿徐愈係覺得個女有個簡單正常童年最緊要,所以社交網絡一定唔會晒女正面相,偷拍個女彈琴都係得背影。康堤喺學校真係好受歡迎,唔關佢爸爸係邊個事,因為佢讀書叻、性格好、識彈琴唱歌早已係學校風頭躉、唔少師姐師妹都係佢fans。阿徐好緊張康堤交朋友,尤其呢個年紀好易受同輩影響,想佢作風低調啲又怕佢影響學業,所以近年花多咗時間箝實個女,下個月佢間舖執埋,佢就全副精神放番喺個女度,做全職阿媽。」康堤正值少女期,睇實啲都啱嘅!