阮兒

被爆拍拖買大床 阮兒認愛 中秋仲會帶衛志豪去⋯

31歲的大台新咪神阮兒,早年憑《愛.回家》彈起,之後又不時在節目中大騷35C身材索爆身材,近年屢傳與「譚詠麟愛將」衛志豪(Michael)撻着,不過兩人一直未有承認,但日前二人再被影到拖手買大床,昨日阮兒出席公開活動直認二人拍拖,仲話中秋節會帶男友去見家長,佢又認同男友形象花弗,叫傳媒幫手𥄫實男友!

撰文:東方新地 |圖片:阮兒IG、新傳媒圖片

衛志豪拍《同盟》撻著阮兒

一個係有線過檔娛樂主持、一個係06年落選港姐,本來大纜都扯唔埋,多得余詠珊出手幫愛將一把,衛志豪拍《同盟》時遇上身材火爆、個性亦主動的阮兒,而阮兒亦抵不過衛志豪一貫口甜舌滑細心體貼,火速撻著!

43歲衛志豪同李珊珊緋聞傳足多年,曾自爆有拍拖多年女友,最近終於換上新女,同剛滿30的無綫新咪神阮兒暗撻半年。

譚詠麟洩親密關係

去年衛志豪只敢帶阮兒出席明星足球隊長輩級成員聚會,當見家長。本來阮兒事業剛起步、衛志豪亦剛剛加入戲劇組,二人有默契低調處理,奈何以阿倫譚詠麟為主明星足球隊成員及晨曦班主周文曦一班老友當正阮兒「弟婦」,不慎洩露「家庭照」,令二人親密關係通晒天。

大棚人睇夜波中場休息時,校長突然舉機玩大合照,阮兒條件反射舉V遮面,不過兩位連體嬰一樣黐實坐姿已經出賣親密關係。