洪永城

冇女朋友的日子 洪永城 變貪靚城!

復合?唔復合?復合?唔復合。分手都就嚟年半,到底洪永城同唐詩詠呢對仲有冇機?目測呢就各有各忙,年半以嚟交集少之又少,唔見又邊有機會翻撻呢?

撰文:東方新地|圖片:新傳媒圖片、洪永城IG

洪永城變貪靚城

忙啲咩?早排記者至撞正唐詩詠唔使拍劇時一個人做Gym、幫鋪頭搬貨、一個人巡蛋糕店,冇咗男朋友搖身一變女漢子。至於洪永城,冇咗女朋友喺身邊,竟然係貪靚啲喎!拍完微電影《愛情沒有來的時候》、《丫鬟大聯盟》又煞科,近來拍緊《多功能老婆》做第三男主角,戲份唔算多,休息時間變多,難得可以抖吓行吓街,日前洪永城就一個人走咗去兩層高化妝品旗艦店幫自己入吓貨。睇夠買完仲有下場,校啱時間一出化妝品店就有朋友車去到門口等上車。唔通有新歡?錯,同性嚟架!

洪永城

話晒榮升大台小生,貪靚扮靚是必須的,所以有假放就嗱嗱聲去咗兩層高大型化妝品店慢慢補貨。