城城 方媛

城堡工心計! 方媛霸女隔絕奶奶 磨心城城壓力爆煲

52歲的郭富城去年升呢做「父王」,老婆方媛為他誕下女兒Chantelle,從此有女萬事足,開口埋口都提住愛女,為打破「四大岳父」的宿命,城城努力造人望追多個仔,早前傳出方媛肚凸有喜,拍緊電影《麥路人》的城城被傳媒追訪時竟大怒黑面,事後他解釋因為太投入露宿者角色而一時未能抽離。

要努力搵奶粉錢照顧妻女及養方媛全家,城城近年戲接戲已經忙爆,據悉孝順仔去年趕結婚生B,無非想年邁母親有孫抱,可惜方媛率領由大陸來港的父母日日霸住個女,令郭母未能享受嫲孫樂,兩面夾擊城城變磨心,壓力爆煲自然人變躁。方媛生女已經母憑女貴,有埋慈姑椗咪更加氣燄?

撰文:東方新地|圖片:新傳媒圖片、Instagram、微博

城城 角色沉重壓力大

入行逾30年的郭富城,一直為事業打拼,直至去年4月變有腳雀仔娶方媛,同年女兒出世做埋「四大岳父」後,幸福笑容經常掛在嘴邊,感覺比以前更開心,他坦言以往愛參與朋友聚會,如今則經常留在家中,想多抽時間陪伴愛女。不過早前有傳城城再做老竇,其中一次面對傳媒追訪,他竟反常態表現甚不友善,並喝止傳媒不要再採訪。對於一時躁底,城城事後表示因為太入戲:「我好少講家庭事,不過同大家分享吓,有小朋友係好開心嘅事。但係好多時候小朋友係上天畀自己嘅恩賜,我都想保護屋企人。無論將來有幾多個小朋友,都係好開心,老實講我係鍾意一個多人嘅家庭,開心嘅家庭,不過暫時唔可以講太多。」原來早前城城拍攝由鄭保瑞監製、黃慶勳執導的《麥路人》,他表示為演活戲中三餐不繼的低下層人物,對身邊的事,反應會好大。