胡杏兒

真空露半球益街坊 胡杏兒:「唔使同老公講!」

最新娛聞

廣告

胡杏兒孖好姊妹黃智雯、胡蓓蔚出席唇膏品牌活動,冇老公喺身邊嘅胡杏兒零舍大膽,以超低胸性感粉紅西裝造型現身益街坊,仲話唔使同老公備案㖭!

撰文:東方新地|圖片:胡杏兒IG李乘德IG

胡杏兒真空上陣小兒科

真空上陣嘅胡杏兒自言今次只係小兒科:「唔係好性感啫,好普通,平時喺屋企都係咁,出場前試過唔同方位,跳同打筋抖都好安全,大家唔使擔心。」至於佢老公Philip更加懵然不知:「唔使同老公講聲,反而要同阿仔講聲,講笑咋未知,BB就快一歲,現時好活躍,同佢相處一陣就好似做咗幾個鐘頭運動,佢會好好奇,成日周圍跑,又好鍾意錫人。」

為囝囝搞生日會

下個月10日係囝囝Brendan一歲生日,胡杏兒同老公計劃為囝囝搞個生日會:「唔係大型嘅,只係想搵個地方同班朋友見吓面,好多uncle、auntie都好想見BB。」胡杏兒更呼籲參與嘅人唔使送禮物,生日會簡簡單單就OK。

姊妹難得聚首

至於「胡說八道」嘅姊妹到時會否齊腳出席,胡杏兒話暫時未知道:「佢哋都好忙,有兩三個又唔喺香港,如果佢哋要拍劇就冇辦法。」而今次活動可以同其中兩位姊妹一齊工作,胡杏兒話非常難得:「好開心,收工仲可約埋佢哋去食個下午茶。」

否認突擊探班

日前胡杏兒帶埋Brendan,殺上老公Philip嘅office,佢解釋:「老公同事都好鍾意BB,想見吓佢。」並否認係突擊探班:「當日係同老公一齊,上到office就坐咗佢個位扮做生意。」

學法文

胡杏兒又透露近日喺香港大學專業進修學院學法文,因為早前到法國工作,希望日後可以用法文溝通,上堂期間老師問學生做咩職業,杏兒話:「點知有同學幫我代答我係housewife,啲同學玩我整蠱我,唔想俾老師知道我係藝人,好耐都冇試過呢種校園生活,十幾廿人一齊上堂。」

胡杏兒母子突然探班

日前,胡杏兒帶埋囝囝Brendan殺上老公李乘德(Philip)公司,兩母子仲霸埋Philip個位,齊齊坐喺寫字枱前,戴住眼鏡嘅胡杏兒一手攞住電話,一手㩒電腦扮做嘢,而囝囝就眼仔碌碌周圍望。

老公笑杏兒掛住shopping

見到兩位至愛突然探班,佢老公Philip喺IG留言寫住︰「Mrs Lee coming into the office, taking over my desk, and showing me how sales calls are made, Is Brendan impressed? What do you think?」工作空間被霸佔之餘,仲踢爆老婆掛住打電話shopping㖭!

爭取親子時間

其實喺唔使開工嘅日子,胡杏兒都會為家中兩位大小情人分配好時間,一家人去到邊都黐到實,遲吓仲話希望生多一、兩個細佬妹陪Brendan,到時杏兒咪仲更加周身唔得閒!

出trip心掛掛

上星期超強颱風山竹襲港,要返內地開工嘅胡杏兒,不禁擔心家人,杏兒一面憂愁於IG寫道︰「今次的颱風真的很危險,大家一定要小心注意安全,平安度過!!在趕去長沙的路上,掛念家人和大家,希望颱風快過去,大家都平平安安!」

同場加映:囝囝未夠一歲已學四種語言 Baby Lee聽到一頭霧水!

胡杏兒上年生咗囝囝李奕霆(Brendan),一向可愛到暈嘅Baby Lee大受一眾「胡說八道會」嘅契媽們歡迎,幾乎每人一有空閒時間就去探望一下佢。最近,李施嬅胡定欣黃智雯胡蓓蔚姚子羚呢班契媽難得齊腳,一於去探契仔!

契媽齊腳探Baby Lee

日前,「胡說八道會」嘅李施嬅、胡定欣、黃智雯、胡蓓蔚及姚子羚難得齊腳,齊齊決定唔行街shopping,反而去搵好姊妹胡杏兒,實質就梗係想探cute爆契仔Brendan啦!難得一班好姊妹相眾,胡杏兒就喺個人社交網上載一張齊人大合照,見到Baby Lee眼仔碌碌望住成班靚靚契媽,個樣萌到爆!

未夠一歲已學四種語言

Baby Lee唔知係咪要準備入學,一班契媽就輪住嚟個三語教學,首先係有姚子羚嘅普通話,仲有胡蓓蔚嘅上海話,然後到李施嬅嘅英文!

人仔細細嘅Baby Lee已經要額外學三種語言,計埋母語廣東話,佢足足學梗四種話言,認真不得了!

Baby Lee仲捉住胡蓓蔚隻手臂,再次見到佢米芝蓮手仔!不過,未知Baby Lee係咪聽唔明3位契媽講啲咩,想佢哋講慢啲所以先捉住胡蓓蔚呢?

請邊位契媽食腳仔?

後來,Baby Lee飲奶時,仲印對腳板底落契媽黃智雯塊面上,黃智雯更一臉滿足嘅冧樣,睇嚟佢好鐘意契仔對腳,仲留言話:「多謝Brendan送上我最愛的金華火腿一對」

胡杏兒一家搞燒烤派對

最近個星期就係父親節,胡杏兒一家就搞咗個燒烤派對,仲請咗囝囝Baby Lee嘅契媽李施嬅同姚子羚齊齊燒野食,慶祝今年父親節。杏兒作為主人家,更化身大廚,負責燒野食俾大家享用,見到咁多海鮮,睇嚟大家都有口福了。

囝囝露出肚腩仔

杏兒老公Phill就上載咗呀仔最新近照,見Baby Lee著住件白色衫,肚仔凸凸咁坐喺老竇前面,再加多副太陽眼鏡,二個人嘅父子裝襯到一絕!

除咗父子裝,一家三口就緊係要影番張相留念啦!三人就齊齊帶起太陽眼鏡,認真溫馨!

囝囝露出米芝蓮車肽

而Baby Lee嘅靚靚契媽李施嬅同姚子羚難得有時間見下契仔,就當然唔少得要抱下兼同佢玩個夠本啦!子羚就喺個人社交網上載幾張相,並留言話:「Baby Lee~契媽miss you」,但唔知Baby Lee係咪有啲眼訓,見到佢對眼仔好似有啲曚曚地,認真夠哂萌!

而且,Baby Lee一坐喺契媽對腳時,佢米芝蓮嘅車軚唔覺意咁走咗出嚟,搞到個肚腩仔勁搶鏡!

另一張相,Baby Lee竟然擺出一個「無眼睇」嘅得意樣,令到子羚忍唔住留言話:「表情多多嘅baby lee…. 你想表達咩呢?表弟點解你又咁cute呢? #契媽sss湊仔day #表哥表弟都咁cute #表弟好多頭髪」

契媽李施嬅相對就冇po咁多相,只係po咗Baby Lee半躺喺佢身嘅一張相,並留言笑問:「我這張人肉椅舒服嗎? 按摩力度夠嗎?」

雖然,胡說八道會嘅一班好姐妹嚟唔齊今次杏兒兩公婆搞嘅BBQ,但難得聚埋一齊,杏兒、施嬅同子羚一於影番張合照相。

早前,胡杏兒於個人社交網留言表示要去開工拍戲,仲po咗一張Baby Lee恰眼訓既樣,見到佢半開半合嘅眼仔,完全可以做潛力圖,用嚟表示自己有幾眼訓同幾赲!就連杏兒都話:「BB你的表情很能代表媽媽現在的心情」

胡杏兒囝囝晒米芝蓮豬腳

之前,Phil喺IG發佈囝囝萌照,原來Baby Lee不知不覺已經八個月大,Phil仲透露囝囝生咗兩顆小門牙,乜都鍾意食。不過最令人注目的,絕對是一雙肥美的豬腳。Phil仲笑囝囝雙腿好靈活,或者會同媽媽參加下一個瑜伽課程!

Brendan六個月大已經超可愛

胡杏兒之前襯囝囝Brendan半歲大,為佢影相留念,相中見到眼仔碌碌的Brendan已經識望住鏡頭,兼擘大個口扮驚訝,相當鬼馬!另外,更睇到佢隻手仔肥嘟嘟,相當可愛!

胡杏兒老公唔執輸

而杏兒老公李乘德(Philip)亦都唔執輸,同樣上載另一張寶貝仔的照片。相中見到Brendan坐喺度,有啲頭髮豎起,笑得開心之餘,個樣仲好趣緻!李乘德更表示Brendan好好湊,成長過程好順利,除咗瞓得食得同屙得外,又唔怕陌生人,去抱佢仲會笑㖭!

胡杏兒囝囝 天然呆超可愛

早前胡杏兒帶埋七個月大的Brendan,同「胡說八道會」一班靚靚契媽胡定欣、黃智雯、姚子羚、李施嬅食飯,肥肥白白的Brendan仔擺出一副天然呆樣,同成班勁興奮笑到勁開心的契媽相映成趣!

米芝蓮手仔搶嘢食

另外見到契媽子羚對住Brendan食餃子,見到Brendan即時一副垂涎三尺樣,仲伸出佢隻一節節的肥手仔摸住隻碗,子羚都留言話「Baby Lee你做咩搶契媽啲嘢食呀?為食豬」

胡說八道演唱會

另一靚契媽李施嬅亦有分享當晚相片,留言道:「今晚開咗一場胡說八道演唱會逐個唱歌給B.B. Lee 聽,其實baby Lee喺度諗乜呢?係唔係諗緊成班傻婆點解見到我咁興奮呢?太可愛喇,我哋個個都俾你電暈啦。」

胡說八道演唱會到底係點?片段中見到李施嬅唱英文歌氹Brendan瞓覺,不過見到Brendan只顧住咬牙膠,對契媽歌聲冇咩反應!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!