佘詩曼

【延禧攻略】嫻皇后爆高峰 佘詩曼半年生金半億

一部《延禧攻略》,令唔少人煲劇煲到變熊貓,更帶挈劇中演員由主角到配角全部爆紅,當中唯一香港演員佘詩曼,更被讚連手指都識做戲,神級演技搶盡一班後宮妃嬪風頭,氣勢凌駕主角吳謹言,明知觀眾睇《延禧》未夠喉,近日就有超過十部內地劇集及電影爭搶嫻妃演出,當中更有六部是宮廷劇,雖然之前盛傳阿佘拍《延禧》只收二百萬,但爆紅嫻妃身價已十級跳,據悉現時阿佘劇價已高達二千萬人仔一輯,就連人氣綜藝節目亦搶住要皇后娘娘駕到,呢期最紅嘅嫻皇后,半年已生金半億。

撰文:東方新地|圖片:新傳媒圖片、微博、Instagram

佘詩曼 六部宮廷劇吼實

相隔十三年再演清裝劇《延禧攻略》,雖然唔係主角,不過佘詩曼就憑超班演技贏盡民心,一夜間嫻妃紅遍中港兩地,工作不斷撲埋身,唔止內地劇集爭搶阿佘演出想延續嫻妃氣勢,就連人氣綜藝節目、真人騷都一樣要叨娘娘風頭。兩年前阿佘成立工作室,今年再簽約古天樂旗下,後台強勁,近半個月阿佘帶同自己御用工作團隊,由西安拍到去長沙,為亮相六大內地電視台的中秋晚會錄影,直至日前終於返到香港,聯同劇中令妃吳𧫴言為《延禧攻略》宣傳。據知情者透露:「嫻妃娘娘嘅氣勢真係好勁,呢一個月就有成幾十個Job撲埋嚟搵阿佘做,只要喺活動露吓面酬勞已經過百萬,就連真人騷都傾緊佢!」