胡渭康

大叔的愛無界限 《愛‧回家》Terry 黐實51歲胡渭康

學似校長譚詠麟話齋,年紀輕輕青靚白淨叫小鮮肉,一把年紀似食咗防腐劑一樣嗰啲叫午餐肉。圈中除咗盛產美魔女,其實午餐肉都好多,82年參加新秀、組團做過香港第一代boy band小虎隊嘅胡渭康就係其中一個。年過半百依然一身肌肉顏值高企,14年回流電視台劇接劇備受重用,本來已經交遊廣闊朋友滿天下,拍攝《愛‧回家之開心速遞》又有仰慕者,同相差12年「Terry」李偉健突然變密友!

撰文:東方新地|圖片:Instagram

Terry黐實51歲胡渭康 靠大叔擴闊朋友圈

《愛‧回家開心速遞》Terry李偉健同KC歐瑞偉譜出忘年大叔似層層曖昧關係就話係劇情需要,又食正日劇《大叔的愛》熱潮,實情Terry戲裡有大叔緣,戲外單身多年亦一樣嚮往與同性朋友畫至愛水彩漫畫消磨時間。最近在Terry個人社交網,他與同劇演員、51歲胡渭康曝光率突然激增,據知情人士透露,未婚又冇另一半阻手阻腳,Terry與同樣愛好健身又貪靚的胡渭康特別傾得埋,自然投緣。

胡渭康
係畫畫高手、自稱畫界「小甜健」的Terry李偉健同胡渭康因拍劇結緣,仲好識做親筆畫番個靚到閃令令嘅肖像畫送畀最新忘年密友。

出道36年,八十年代憑小虎隊紅極一時,不過合久必分三位成員各行各路,胡渭康早年亦從香港消聲匿跡,一度移民英國更任職過名店售貨員。11年食住懷舊潮捲土重來,已經入「五」但肌肉容顏逆齡發展自然機會多多,加上交遊廣闊,登台、電影、舞台劇然後入電視台瓣瓣撈得掂,更碼實林建名成為大名娛樂旗下新貴,12年開完演唱會,今年初假麥花臣場館再唱過。相反Terry李偉健遲起步知名度又一般,有得同資深藝人發展友誼,Terry特別殷勤又肉緊,知情者說:「就嚟40歲先憑處境劇叫做有人識,Terry知道keep住個勢對事業發展幫助好大。日日喺電視台趕劇冇得擴展交友圈,所以同胡渭康一拍即合後,Terry都好識做,噓寒問暖、一齊食一齊玩又約埋一齊健身,始終胡渭康入行三十幾年、識咗幾輩圈中人,呢啲忘年朋友真係交得過!」能成為密友總帶著愛,唔同年代都可以打破隔膜。