多功能老婆

【多功能老婆】中環拍煞科!楊千嬅 周柏豪 終極劇透

辛辛苦苦捱足五個月,仲要電視、電影兩邊走,同時仲趕緊新戲《麥路人》,好囉好囉,《多功能老婆》終於殺煞科,難怪楊千嬅一拍完都即刻要唞吓氣,連個仔都掉低埋,飛咗去東京畀自己放番個假。

又話相隔17年返電視台拍劇、又係「方麗娟」千嬅同「劍雄」黃浩然16年後合體之作、仲有新晉新生仔周柏豪擔大旗做男主角,睇卡士,呢套《多功能老婆》又的確係吸引喎,睇戲碼,仲唔係兩男爭一女?梗係要追最後千嬅情歸何處。

撰文:東方新地 圖片:新傳媒圖片

《多功能老婆》中環拍煞科!楊千嬅 周柏豪 終極劇透

不過日前劇組拉隊去中環拍煞科戲,戲中老公黃浩然唔見影,剩番千嬅一個喺畢打街紅綠燈前心事重重咁款,同場仲有斑馬線另一端官仔骨骨、靚仔是正的柏豪,人頭湧湧都要遇上,仲要加多場情深款款、有點兒老土嘅輕吻額頭戲,喂,個結局好似畫公仔畫到出晒腸,終極劇透,唔驚到時影響收視咩?

拍咗113日,《多功能老婆》終於拍到煞科戲,柏豪鬧市輕吻千嬅額頭場戲,好似有點兒老土。

拍完戲又順手打埋燈補埋粉,由官方攝影影埋劇照,咁睇法,套劇結局呼之欲出。

中環已經好多人、劇組再準備大隊臨記增添氣氛,控制場面需要時間,所以柏豪等埋位等到發晒吽逗。