OS889AP007-2-300×165

網民熱捧《來生不做香港人》 劉美君苦練客家話




Hit爆港視劇集《警界線》播完,接棒嘅係由張可頤、劉美君、潘燦良、曾偉權、林利及高皓正主演嘅《來生不做香港人》,套劇本來叫《客家女人》,之前預告片出街有人彈劇名好娘,結果改咗!劇情講梁美行(張可頤飾)童年時出蠱惑,搶走家姐梁美田(劉美君飾)來港生活讀書嘅機會,隻身來港嘅美行寄人籬下受盡委屈白眼,但最終捱出頭成為揸靚車住洋樓嘅公關公司高層。至於喺東莞鄉下長大嘅家姐美田靠勞力同打關係而發跡,但對妹妹一直心存怨恨。




八姨太睇咗頭嗰六集,故事簡潔明快唔婆媽,女主角張可頤同劉美君演出超水準,劉美君為演好客家女人花咗幾星期苦練客家話,難怪講起上來自然流暢,至於配角龔慈恩、潘燦良、曾偉權甚至兩位飾演美行美田嘅童星亦恰如其分地演繹各人角色!套劇唔止講姊妹重逢後嘅恩怨,亦道出30年來中港之間微妙嘅關係及文化差異,立場算中肯。好多巴打絲打睇完頭嗰六集都喺各個討論區激讚劇味濃夠貼地,好睇過《警界線》同《選戰》,更有網友封佢係近年嘅「神劇」。之不過唔好捧得太高住,仲有十九集未出街,希望套劇唔好學《警界線》咁虎頭蛇尾愈做愈膠啦!