黎明 袁詠儀 掀唐朝古裝煲劇潮《將夜》鬥《唐磚》邊套吸引啲？

撰文：東方新地｜圖片：唐磚、將夜微博

黎明 袁詠儀 掀唐朝古裝煲劇潮

自從《延禧攻略》播完後，唔少人都好想知有咩劇煲，今次就同大家講下依家都好爆紅嘅兩套內地網劇！首先就同大家講下呢套有袁詠儀出演嘅《唐磚》！

《唐磚》係一套講現代人穿越到古時唐代李世民在位時貞觀年間嘅網劇，男主角穿越到唐朝就梗係會有蝦碌嘢發生啦！加上，男主角幽默無俚頭嘅個性亦都令劇集充滿著唔同笑點，至於係啲咩，小編就唔喺度同大家劇透咁多！

然而男主角雲不器穿越後被誤認為係自己嘅祖先雲燁，於是劇集就展開咗一段搞笑之餘，同時亦有宮延鬥爭嘅劇目！如果大家有興趣想睇啲輕鬆少少得嚟，又有啲緊張劇情嘅劇集的話，《唐磚》或者會係你嘅心水選擇。

靚靚演長孫皇后

不過，最想同大家講嘅係《唐磚》入面有大家香港觀眾都非常熟識嘅女演員靚靚！今次靚靚就化身唐代長孫皇后，雖然淡妝上陣，但造型霸氣艷麗，望落完全唔會被劇中年輕一輩輸蝕！

扮演李世民嘅係嚟自台灣今年43歲嘅張智堯，唔知大家覺得靚靚同張智堯演呢對帝后相唔相襯呢？

《將夜》播放量極高

講完《唐磚》，就同大家講吓另一套同為網劇嘅《將夜》！ 呢套就同《唐磚》嘅風格有啲唔同，皆因《將夜》係一套古裝玄幻劇，不過最犀利嘅係《將夜》開播六天播放量就破5億大關！

《將夜》更有唔少實力派老戲骨參演，例如黎明、安志杰、胡軍、鄭少秋等份量級演員，不過今次啲老戲骨反而係做配角，以提攜劇中年輕一輩！

唔少人睇過《將夜》之後都大讚劇中嘅打戲、特效同配樂都唔錯！唔單至因為有武俠劇嘅元素，而且仲有玄幻特效嘅配襯，成功令唔少劇迷睇上癮！

黎明用簡單兩字震撼5億觀眾

另外，呢套劇嘅另一重點就係黎明今次喺劇入面就好威威，皆因佢喺劇中一句說話，成功令劇集好快上咗微博熱搜！

洗腦對白成網絡熱搜！

話說黎明喺劇中飾演一個風度翩翩，淡漠寡言嘅李仲易，而最突出嘅係佢喺劇中最鐘意就用「廢柴」鬧人！

最爆嗰次就係喺第7集，黎明於朝庭上以一句「但是你們全都是廢柴」，鬧爆一眾大臣，然而聽到「陞下息怒」之後，佢依然再繼續「廢柴」，結果令廢柴一詞成為微博熱搜！

有網民就指出原著小說中，只出現過「廢物」一詞，但依家喺劇中聽到國語版號「廢柴」感覺非常新奇！睇嚟今次黎天王又成功製造出話題之餘，仲成功令廣東話嘅「廢柴」一詞發揚光大啦！

延伸閱讀：

黎明：平凡是她的運氣

黎明四月榮升老竇，女助手阿Wing為天王誕下女兒，眨眼天王女四個多月大，雖然之前黎明從未讓女兒容貌曝光，但日前他突然在社交平台罕有上載B女正面照，黎明說：『我的女兒…🤩好胖呵呵，…平凡是她的運氣🤩分享！一直和我一起成長的家族朋友』

天王女容貌正式曝光，B女單眼皮兼小嘴仔，肥嘟嘟，網友紛紛大讚BB女好可愛，有如「迷你版黎明」！搵番黎天王童年照，樣子和神情的確同囡囡好似！

我來自北京嘅黎明…

邊個係天王，唔使多講啩！

少年時期嘅黎天王！

發福嘅黎天王同肥嘟嘟嘅B女，真係好似！

黎明十級戒備保護B女 陳慧琳勸調整心態：你保護得佢幾多呢？

Kelly好友黎明做爸爸，她表示仍未見過B女：「我唔八卦嘅，不過我都想睇，但係我就唔會特登問佢拎嚟睇，撞到先問佢。咁BB一定係可愛㗎喇。」（傾吓育兒心得？）就係將會有好多人會影佢囉，好似醫院嗰件事件，我好明白佢嘅心情，我當時都有呢個感覺，所有傳媒喺Lobby等好似畀人包圍咗間醫院，抖唔到氣咁，因為係第一次吖嘛。但我自己慢慢適應，因為諗吓個小朋友遲早要返學，你保護得佢幾多呢？所以自己要去調適自己嘅心理，一日一日Leon就會接受到！返咗學即使冇記者都有家長影你，放落啲社交平台嗰到傳媒又會拎嚟登，所以自己一定要調適，唔好唔開心。」我依家就調適咗自己，你影啦！

事實上，育有兩子劉昇及劉琛的Kelly，的確在兩子年幼時任傳媒影相而未有阻止！

而長子劉昇對記者「接放學」早已習以為常，面對鏡頭駕輕就熟，更試過主動走近本刊記者前單眼擺甫士，笑住話：「我係Spider-Man﹗」非常可愛﹗Kelly前年在紅館開演唱會，更加首度安排兩子上台和觀眾打招呼，場面相當溫馨！

黎明 拒再現身醫院

真的假不了，由貼身助手到大住肚入住黎明上水古洞豪宅、出入自駕天王名下靚車，3月本刊獨家踢爆由助手升呢Amusic前營業部經理成功打動失婚黎明，獲得寵幸仲陀住六個月天王B，話口未完，B女周一(4月23日)已經提前近一個月駕到。處理私生活感情事一向低調、撻著前助手亦都盡量收埋，雖然Wing陀B再早產走漏風聲，51歲老來得女的黎天王仍然希望盡可能封鎖消息，為兩母女營造不受傳媒和粉絲騷擾的正常生活。

明嫂 產前獨來獨往

為了密冚懷有天王B，阿Wing已經甚少返工，免大肚消息通天，就算陀住巨肚都係獨來獨往睇車入貨上倉添置BB用品，雖然Leon冇辦法時刻陪伴身邊、手拖手出入，但對BB嘅所有狀況佢都一直掌握得好清楚，據知今次早產入院，講過會保護家人的黎明相當緊張，對外十級戒備，以防母女受騷擾，知情者透露：「Leon都有心理準備亦都即刻停工陪安胎。其實工作以外，黎明都少出街更加少social，阿Wing誕女後與外界隔絕，依家提早做老竇消息傳出，Leon將保護行動升級，拒絕人來探B，除此之外，由醫院醫護，到屋企工人同看更，連另一半阿Wing，黎明都個個交代晒唔好對外洩露任何風聲！」

發火護女

傳出誕B後，連日大批傳媒趕至浸會醫院，醫院亦明顯加強保安，Leon為了保護母女，在FB發火：「我不會再出現醫院，寧願選擇在有私人空間的場合享受與家人在一起。最後我也無奈回頭一想當年讀書時期所學到的歷史日本侵華中的(漢奸)為什麼會出現，原來有些人真是有這種漢奸基因，喜歡爆料⋯⋯」黎明咁嬲，無非都係想保護屋企人！

Leon在FB發文，指為免再次出現醫院會令醫院及其他病人增添壓力，所以不會再現身醫院。然後又句句有火鬧爆爆料者，指爆料者將別人的問題變成八卦去告知媒體，不滿自己升呢做人父，卻成為花生友的對象，黎明發火非同小可。

舊相好齊送祝福

黎明女助手新寵曝光

一個多月前，外界都一直以為黎明未走出情傷，但其實他去年已有著落，與其唱片公司AMusic的女助手阿Wing過從甚密！獲黎明寵幸的阿Wing進駐上水雙魚河St.Andrews Place的6千呎獨立屋，又在AMusic任營業部經理，可以話係打晒骰。成為天王新寵不特止，阿Wing更狗年報喜將榮升人母，現時陀B六個月！

黎明新寵阿Wing 陀B出巡

這段養胎日子，阿Wing繼續自由出入黎宅，早前本刊拍得黎明由司機接載離開寓所工作，之後阿Wing獨自駕車外出，直駛沙田「Homesquare」，該處集中售賣家具及家品。現場所見，阿Wing當日身穿白色薄羽絨內襯黑色連身短裙，下車後清楚可見佢腹部已明顯隆起，目測已懷孕六個月以上，不過佢未有水腫，而且健步如飛。

睇中七人車

據知阿Wing已為生B作好準備，早前把頭髮剪短，以免搶去BB營養，看她精神不錯，腳骨力特好，行足幾個鐘頭街都未見要休息。入到商場，阿Wing第一時間行到車行，望住門口陳列價值約35萬的七人車「Noah」，佢睇得入神更用手機影低，車行經紀見佢一身名牌似足闊太，即落足嘴頭力Sell，除殷勤招呼上車試坐，又埋枱傾價錢同細節。

之後阿Wing拎住新車資料離開，還邊行邊研究。據知呢款車與黎明得力助手子泉駕駛的七人車同款，阿Wing為方便產後與B外出，亦想把現時駕駛的福士小房車換成七人車，與子泉睇齊。

再睇BB床

其後阿Wing再折返商場逛嬰兒家具店，主攻日本品牌的BB床及被具，見佢細心研究每張床的資料，最後睇中一張可延伸長度及與大人床拼接的BB 床，不過佢未有落訂購買，並向售貨員表示要與家人商量後先決定。