黎諾懿

黎諾懿:感激老婆給我一個完整的家 結婚四周年每年都送呢樣嘢冧老婆?

最新娛聞

廣告

TVB藝人黎諾懿與前港姐李潔瑩(Nicole)2014年11月11日結婚,婚後育有囝囝小春雞(黎峰睿),今年正正是他們結婚4週年,兩人放下仔仔,過二人世界「撐檯腳」。黎諾懿十分有情趣,還準備了一份4周年禮物送給太太。

撰文: Sunday Kiss |圖片:黎諾懿、李潔瑩IG | 編輯:東方新地

結婚四周年黎諾懿每年都送呢樣嘢冧老婆

黎諾懿於(11日)在IG放了當年婚禮上兩人的主題曲《樂意》並留言:「四年前今日,我跟你進入人生另一個階段,多謝你給我一個咁完整的家庭,老婆我愛你!結婚週年快樂!」不少網民都大讚,黎諾懿是「完美男人」;祝福他們永遠幸福!

黎諾懿每年送一隻不同顏色戒指給老婆

黎諾懿太太Nicole都有在IG放閃,原來兩人去了「二人世界撐檯腳」,而老公送了一隻戒指給他,而最有的情趣是,他每年都會送一隻不同顏色戒給老婆。Nicole Lee:「第四年結婚週年紀念 慶祝活動有下午家庭樂,晚上二人世界撐檯腳!謝謝老公每年送我戒指,今年第四年是綠色,愛不惜手,一切很美、只因有你」

下午家庭樂

黎諾懿與Nicole,下午與囝囝小春雞去公園玩,而公園竟有一隻陸龜。充滿好奇心的小春雞,人生第一次接觸龜仔,都沒有怕怕,還玩的很開心!

公屋出身 冇父幹

不過,神之子一開始都只係個凡人嚟。人地話成功需要父幹,但就算冇父幹,有後天努力一樣可以打出個名堂。喺公屋出身嘅黎諾懿,細個時爸爸因病離世,媽媽獨力養大佢哋兄弟三人。

因12年嘅處境劇《愛·回家》中擔正男主角之一,飾演馬壯一角大獲好評。自此,一講「神之馬壯」,就係人都知係邊個。

黎諾懿 向劉德華學習

黎諾懿不經不覺入行16年,發展得有高有低,佢話自從《舞動奇蹟》僥倖攞咗冠軍開始,跟住《愛.回家》,之後一直嘅角色都好舒服、好順利。

被問到由被力捧到調去做兒童節目,眼見其餘奧運五星林峯、吳卓羲、黃宗澤、馬國明和陳鍵鋒被力捧,當時心情點, 黎諾懿 就話:「冇唔開心就假,人與人之間點會冇比較,但有啲嘢真係冇得撒賴,點解觀眾鍾意林峯、吳卓羲,而唔係鍾意你?依家資訊年代,觀眾會好多評論,唔得真係要接受,要諗方法追趕失去嘅嘢。每個人都有所謂嘅開竅,以前年少氣盛,覺得係人哋唔識欣賞啫,仲要堅持自己嗰套,依家當然識諗,會覺得成長得比其他人慢啲啫,唔緊要嘅,呢行都係鬥長命啫,最緊要做到自己鍾意做嘅嘢,最後能夠去到終點,我覺得OK 啦。」但係佢冇諗過放棄,一方面覺得洗濕咗個頭不如洗埋落去,劉德華都捱過自己都得;另一方面心知演員轉行好難,所以每次有想走嘅念頭,好快都打消咗。

話都冇咁快,黎諾懿都由當年嘅「奧運六星」,變咗做依家嘅人父啦!大家又鍾唔鍾意佢新劇入面嘅表現呢?

爸爸12歲時患癌病逝 媽媽獨力孭起頭家

黎諾懿生於基層家庭,在屯門友愛邨長大,上有哥哥下有弟弟,要養育三條化骨龍已不簡單,何況父親在他12歲時患癌病逝,黎媽媽日頭做清潔工,夜晚做小販, 獨力孭起成頭家。「本來阿爸儲錢買咗架貨車,做生意之餘,星期日仲會車成家人上山頂飲茶,但之後為咗醫病,乜都賣晒。」

惡劣環境迫成,三兄弟分外生性,黎諾懿一滿16歲就去惠康、百佳做打雜幫補家計,中學畢業後打份銀行工,貪薪高糧準福利好,還可以低息買樓。「我負責核數,日日將左邊嘅數加晒等如右邊就叫 完成使命,我敢講喺會計部冇人撳計數機快得過我,但真係好悶。」撐了兩年,突然有日看到雜誌的藝員訓練班招生廣告,即刻報考。「我嗰時好肥,成百九磅,身 形似足歐陽震華,所以waiting list都要排第三。」以為無望,怎料剛巧碰上英皇新秀歌唱比賽招募參賽者,撬走訓練班三個人,導致黎諾懿以候補形式被取錄,同期還有胡定欣和蔡淇俊。

經歷過唔同低潮 亦試過捱窮

黎諾懿喺唔同時間經歷過唔同低潮,《舞動奇蹟》之前,覺得嗰八、九年做極都好似冇乜起色,主角又唔到你,第二又唔到自己,好想放棄,佢有諗過不如走啦,算啦,都十年咯,不如出去做啲正經嘢,但當佢想放棄之際,《舞動奇蹟》就出現,一個唔識跳舞嘅人,覺得橫豎都係,不如就做啲唔識嘅嘢,同埋嗰時主要因為錢點而做依個節目。

「你都明白國內畀到嘅錢同香港畀嘅錢係天壤之別,我覺得不如臨走賺埋啲錢就走啦,因為四集嘅酬勞我覺得都幾OK,去跳識到金晨(《無心法師》女主角),佢當時都冇人識,兩個由零跳到攞到冠軍,呢個經歷到依家都覺得刻骨銘心,亦係喺娛樂圈其中最開心一個階段,如果冇贏到,我相信我已經唔知去咗邊。《舞》之後到《愛.回家》,亦都冇諗過《愛》一路拍咗996集,足足四年半,好多時大家都唔覺得 黎諾懿 係 黎諾懿 ,覺得 黎諾懿 係馬壯,出街食飯,啲人叫我馬生,做一個角色做到咁,覺得係成功嘅,但係當馬壯咁犀利,另一個問題出現,無論做咩角色,人哋都覺得你係馬壯,又係另一個樽頸嘅時候,演員好得意,做得成功,又要抹甩佢,去做第二樣嘢,好慶幸天時地利人和配合,有《不懂撒嬌的女人》可以畀人抹走馬壯。」

感激有「馬壯」這個角色

無論業界或者外間都會覺得八點檔嘅演員好似低咗檔,但黎諾懿入過兒童組、又入過處境劇、正劇,一般人覺得做處境劇朝九晚六好舒服、講吓對白口水戲好簡單,黎諾懿就話,做處境劇演員一至日都要開工,今個禮拜要拍定兩個禮拜後出街嘅嘢,要不斷改,要緊貼出街時候嘅話題,拍正劇可以病,拍處境劇係唔可以,一日拍十場、廿場,正劇一日先拍兩、三場,workload 係大好多,同埋節奏係好難控制,所以唔好睇小覺得容易嘅嘢。

始終黎諾懿有四年幾做緊馬壯,當馬壯喺香港市民心目中有個形象,無論跟住嘅角色幾衰都好,觀眾都會覺得馬壯扮緊一個壞人,覺得佢好曳、有一點可愛,而唔係覺得討厭。「所以真係好多謝《愛•回家》呢四年幾將馬壯打咗入觀眾嘅心。」

富家女與屋邨仔

係拍《讀心神探》嗰陣,周美欣介紹太太比黎諾懿識,「有幾次約出嚟食飯,我太太垂涎我嘅美色、追我,哈哈!我太太係非常之好嘅女仔,單純、好,咁啱我同佢都單身,好自然行埋一齊。」

Nicole父親經營的奧華美容公司,旗下有18家分店,家住四千萬紅磡豪宅海名軒,連同手持的物業,估計身家逾五億。黎諾懿生於基層家庭,在屯門友愛邨長大。一個是富家女,一個是屋邨仔,看似是兩個世界,但要一齊其實只需要愛。黎諾懿話:「開頭都知佢家境OK,但都係睇雜誌先知佢屋企有咁多間公司,因為我從來唔過問呢啲嘢。」

佢仲話拍拖時,同Nicole喺屋企睇《愛•回家》,「佢爹哋仲打開本雜誌話『喂,又寫你哋,有三版呀,哈…哈…』佢哋似乎接受咗,冇乜壓力!你知雜誌將佢哋嘅身家估大少少㗎啦,Nicole仲講笑話『嘩!爹哋你有層樓值億二咩,賣咗佢啦!』」

拒靠外家

有人話黎諾懿係五億駙馬,連婚禮開支都係外家比,仲送樓畀佢哋,黎諾懿就話當初並唔知太太家境,第一次去佢屋企,都覺得有啲嘩然,但時間可以證明一切,「如果我識咗佢,我唔做嘢就話啫,但當然依家好多人都覺得我孭住五億駙馬嘅身份,但我成日都話我太太嘅身家、歷史我改變唔到,我係鍾意我太太個人,其他人點講我都冇乜所謂,亦唔介意,我太太、我爹哋媽咪、佢爹哋媽咪理解就夠,我亦都唔需要同任何人交代。留畀時間證明,我有做嘢,我又唔係靠外家,有幾多億都分唔到畀我,駙馬係名稱嚟嘅啫!」

黎諾懿亦強調外家並無送樓畀佢哋,但明白娛樂圈就係咁。「係嘅我就唔使咁辛苦啦,最緊要屋企人知就夠,其實樓嘅嘢一check 已經知唔係,但我都明呢行係寫呢啲,唔通寫我好畀心機睇劇本咩?冇人會想睇啦!」

信風水 求婚唔浪漫

「我本身篤信玄學,有日,風水師同我講要結婚,唔係就要三年後,太太嗰時瞓喺我側邊,我就叫醒太太話結婚嘞,佢話哦,咁結囉!冇求婚!太太叫我買求婚戒指,幾個鐘後,太太話:『都係唔好,戴一世㗎,我信唔過你啲taste,我去揀完,你去畀錢啦!』之後仲要去餐廳扮求婚,我同太太講:『你都知嚟做咩,戒指你又見過,你覺得有咩驚喜呢?』佢話:『我唔理,你要做番。』求完,佢話:『都唔浪漫嘅!』我話你都知道晒,係唔會浪漫嘅。到生B,我同太太講:『老婆,我想生猴B!生咯!』佢話:『你可唔可以浪漫啲?」我話:「唔係呀,剩番半年,唔係想生就生到。』雖然最終生唔到猴B 生咗雞仔,但我就係咁唔浪漫。」

兒子縮短我生命

黎諾懿 為囝囝改名做黎峰睿,佢話一開始有兩個名揀,柏睿或者峯睿,問十個人,十個都覺得柏字親民啲、舒服啲,但佢就揀咗峰,「阿囝聽住嘞,因為作為我嘅兒子,係唔使太過平凡嘅,改個勁抽啲嘅,到你大個懂事唔鍾意,先再改啦!」

黎諾懿笑言囝囝將我生命縮短,因為真係唔夠瞓,佢兩個鐘起一次身,「我諗所有新手爸爸媽媽都試過一齊起身、做同樣嘅嘢,依家我哋精嘞,求其一個起身,另一個休息,有一日我湊仔湊到頭暈、攰到好似開咗十幾個鐘通宵,我叫外母幫我睇一陣,一瞓昏迷咗八個鐘,依家開始識放手,就算佢喊都扮聽唔到。」佢仲話諗住生夠一仔一女,最好係豬女,因為太太屬豬,太太話豬年嘅人比較好運啲。

太太冇公主病…

「我對煮嘢係好有興趣,同埋對味道有獨特嘅烹調方法,我煮海鮮非常好食,我相信我呃到太太返嚟某程度上都係因為煮嘢食,佢話我嘅胡椒蟹同埋清酒蜆係冧得住佢嘅,可能自細窮,鍾意煮吓嘢食,同埋煮嘢食係平啲㗎嘛,我係唔鍾意洗嘢,所以洗碗都係交畀老婆啦!」 黎諾懿 就補充,太太曾幾何時煮過餐飯畀我食,佢比較鍾意健康啲,佢煮過秋葵炒毛茄,兩樣都滑潺潺。不過佢就強調,太太冇公主病,「我老婆係非常之緊貼我嘅新聞,其實真係冇嘅,雖然啲人成日都話我太太比較富裕啲,但我真係未見過佢買名牌,就算有都係off-season 嘅,我太太又冇買手袋嘅癮,慶幸啦!」

籌備婚禮

黎諾懿喺2014同拍咗拖3年嘅Nicole拉埋天窗做「5億䮛馬」。黎諾懿認為自《舞動奇蹟》和《愛•回家》的拍攝令佢收入變得穩定,變得有經濟能力,所以會想作人生嘅下一步就喺結婚啦! 籌備婚禮期間黎諾懿笑稱自己只係畀錢,其他由選婚紗,訂酒席,甚至連求婚戒指都係又Nicole一手包辦,睇嚟黎諾懿好信任老婆嘅眼光!

「神之馬壯」黎諾懿與太太李潔瑩去年四月榮升父母,誕下「小春雞」黎峰睿(Lugus)後,初為人父的黎諾懿多次被拍到抱實囝囝四圍逛,甜絲絲享受路人誇獎Lugus趣緻精靈外,還親自拍片剪片在個人IG狂晒仔,同全世界分享他為人父親的喜悅!

囝囝出世後黎諾懿都係有仔萬事足,為做個好爸爸同好老公而努力不懈!

囝囝是精神支柱

早前黎諾懿在Instagram發佈影片,影片中的黎諾懿戴着口罩仍然陪著小春雞玩耍。仲留言:「無論幾累幾病,見到你笑,什麼也忘記了!#精神支柱#爸爸愛你」果然是好爸爸!

黎諾懿 幫囝囝剪髮

派福利唔係淨係女藝人專利,男藝人一樣得,仲要買大送細,打孖送上,黎諾懿之前同1歲囝囝小春雞(黎峰睿)出浴片段放上網,兩父子光脫脫坐喺浴缸玩水,除咗結婚相終極一露,黎諾懿平時甚少騷肌裸露,今次真係為阿仔豁出去!

喺片段中黎諾懿不停用個玩具噴水去氹囝囝開心,為氹囝囝一笑真係咩都冇所謂呀!囝囝笑到咭咭聲,老竇就樂此不疲一臉心滿意足。

黎諾懿為咗氹囝囝開心,父子迫喺浴缸度玩水!

雖然黎諾懿為拍劇時間顛倒,但都唔會錯過囝囝每個成長階段,由囝囝學爬、餵食mum mum、仲有剪頭髮等,佢都會親自出手,真係阿仔大過天呀﹗

一聲「爸爸」冧死人

黎諾懿日前喺Instagram上載短片,再次引嚟7萬點擊率!片段入面見到小春雞超活潑,表情多多又中氣十足!黎諾懿在片段中直呼小春雞全名黎峰睿,又叫小春雞講「爸爸」。小春雞嘴郁郁成功嗌出一個「爸」字,喺旁邊嘅媽媽都大為驚訝!

小春雞唔單止生得可愛,仲表情多多,唔怪得咁多哥哥姐姐鍾意佢!
小春雞肉緊大叫一聲:「爸!」,令諾懿大呼感動!

網民留言大讚小春雞叻仔,又一齊研究「爸爸」定「媽媽」易發音啲!

小春雞示範 吃不到的葡萄…

即使升呢成為爸爸,但諾懿仍然係一名大細路,仲將目標人物鎖定為囝囝小春雞!早前,諾懿就分享咗一條整蠱囝囝嘅影片,片段一開始見囝囝小春雞坐咗喺爸爸大脾上,諾懿作勢要餵提子俾小春雞食,但每當小春雞以為食到,佢又將提子拎開,搞到小春雞好肉緊,不斷大叫示威,又拍打爸爸隻手。可惜撒嬌都冇用,「大細路」諾懿見囝囝咁想食,當然要食住上,即使小春雞擺出可憐失望樣,佢都要繼續整蠱囝囝!諾懿分享片段時仲話:「小春雞完美示範:吃不到的葡萄………會什樣」,原來爸爸係專登想睇囝囝嘅肉緊樣!

網民除左留言話諾懿好衰,整蠱小春雞,佢哋仲留意到佢隻狗狗都怕咗呢場「父子大戰」,見唔對路即刻離開現場!

 

唔知鏡頭後小春雞食唔食到粒提子呢?

小春雞咁得意,又點捨得唔俾佢食呢?

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!