沈月

家庭聚會冇男友份 17歲沈月黑面對抗邱淑貞

最新娛聞

廣告

女神級索媽邱淑貞,雖然已經貴為三女之母,息影多年依然省鏡,其17歲長女沈月,更遺傳媽咪完美基因,愈大愈索,早前被拍到有個貌似韓星李敏鎬的靚仔男友,正值青春期情竇初開,阿媽點會唔擔心?!除私下加強監管,為免太早確定女兒男友地位﹐邱淑貞更唔畀女兒帶男友出席大型家庭聚會。日前,沈嘉偉全家與親友飯局﹐沈月男友全程冇影,正值反叛期的沈月,全餐飯都戴住黑超同黑晒面,擺明無聲向阿媽抗議!

撰文:東方新地 圖片:新傳媒圖片

沈月 情竇初開

一代性感女神邱淑貞,99年下嫁時裝集團I.T老闆沈嘉偉,先後誕下三名千金,分別是今年17歲的沈月、14歲沈日以及8歲沈晨,當中儼如倒模邱淑貞的大女沈月,近年更出盡風頭,天生美人胚子已經夠煞食,還遺傳埋阿媽女神氣質,被封最正「星二代」;不過,女兒太省鏡,父母不無煩惱,沈月年紀輕輕已成「萬人女神」,身邊無數小蜜蜂團團轉,少女心情竇初開,上年未滿16歲,已被拍到同一貌似韓星李敏鎬的少男拍拖,女兒爆出戀事,邱淑貞表面好開通處處維護一對小情人,實質對女兒戀情非常緊張,除親自接送女兒放學上補習班,更以「人盯人」戰術全天候加強監控!

靚媽鬥索女

沈嘉偉全家出動與親友舉行家庭飯局聯歡, 不過沈月男友就冇份,50歲邱淑貞雖然打扮簡樸,但女神風範依然懾人,離開飯店時,沈嘉偉因腳傷要用滑板車扶住行,跟在身後的邱淑貞亦冇乜笑容,唔知係咪同女兒沈月鬥Cool呢!

戴超抗議

家庭聚會冇男友份,正值反叛期的沈月,就全餐飯都戴住副超,塊面又同副超一樣黑,擺明向虎媽邱淑貞無聲抗議。

審視女兒朋友

深怕女兒掛住拍拖影響學業,邱淑貞除為沈月作心理輔導,暫未批准沈月帶男友出席家庭聚會。據知情者透露:「個女咁細個就拍拖,邊個媽咪會唔擔心吖!不過,豆斗又唔想拆散鴛鴦,始終怕管得太嚴會適得其反,都係勸個女唔好只掛住拍拖,最緊要唔好心散影響學業,其實兩公婆不嬲已經好緊張,審視晒女兒身邊啲朋友,當然有見過沈月男友啦!但豆斗唔想咁快認定女兒男友地位,所以都講明唔畀沈月帶男友出席大型嘅家庭聚會!」

照顧長輩

年紀輕輕已經好識照顧人! 雖然黑面陪家人飯局,不過,反叛還反叛,沈月其實好有家教,離開時就扶實一位長輩慢慢行!

向爸爸撒嬌

兩夫婦教育下一代會軟硬兼施,邱淑貞做虎媽對女兒管教嚴厲,沈嘉偉就做慈父,話晒爸爸是女兒前世情人,三個女都好黐爸爸,大女沈月日漸長大,雖然已經亭亭玉立,但依然愛向爸爸撒嬌。據知情者透露:「沈月知爸爸易話為,有乜嘢想做怕媽媽反對,都會撒嬌搵爸爸幫口,同男友成日糖黐豆,佢都試過問爸爸,話想帶埋男友去家庭聚會,沈嘉偉雖然心軟,但又怕逆老婆意,一方面安撫女兒,但亦講明點都一定要過媽咪嗰關先得!」

沈嘉偉做磨心

筵開四席同親友飯局,沈嘉偉同邱淑貞就分枱坐招呼親友,不過沈月對住媽媽黑晒面,令沈嘉偉變成磨心!

撒嬌嗲爸爸

期間沈月更雙手穿過爸爸頸脖貼住傾密偈,父女感情要好。

沈嘉偉變磨心

日前,沈嘉偉一家與親友聚餐,當晚沈月男友就完全冇影,由於親友眾多,要分開幾張枱先夠坐,沈嘉偉非常好客,不時走勻幾枱招呼親友,三個女兒沈月、沈日及沈晨,就全晚陪住媽咪一枱坐,飯局吃足三粒鐘,期間細女沈晨,只吃了大半小時就離開,沈月及沈日就不時過枱搵爸爸傾偈,臨走前,沈月更雙手穿過爸爸頸脖貼住傾密偈,父女相處甜到漏,不過沈月同阿媽冇乜幾句,全餐飯都戴住副黑超,又乸埋塊面冇笑過,擺明無聲向同枱嘅阿媽抗議,令爸爸沈嘉偉變磨心!不過,反叛還反叛,沈月對一班長輩就表現得非常有禮,飯後更扶住一位年老長輩慢慢離開飯店,並陪住長輩等車,似乎婚後全副精神悉心照顧家庭的邱淑貞,的確教女有方。

晒明星架子

全晚戴住副超的沈月,比阿媽更有明星架子,相反,次女沈日打扮樸素就平易近人得多。

滑板車輔助行

女兒沈月及沈日陪親友率先離開飯店,邱淑貞同老公沈嘉偉殿後,潮人沈嘉偉,腳傷亦唔似一般人撐拐杖行路,反而係用滑板車輔助行,邱淑貞則跟隨身後睇到實。

陪女英國升學

女兒小小年紀已成「萬人女神」,過來人邱淑貞又點會唔緊張!據知有計劃明年陪沈月同沈日到英國升學,實行人盯人戰術抗衡。據知情者透露:「沈月由細靚到大,呢幾年真係好多公司想簽佢,其實邱淑貞喺個女細個時,已經將自己經驗灌輸畀個女,表明呢行有好多無形嘅壓力,但有咁多人將沈月捧到上天,佢都怕個女三心兩意,為咗想佢專心學業,豆斗已經諗好晒,出年就陪沈月沈日去英國讀書,飛到咁遠,咪就係想斷個女入行後路!」不過,天生就不平凡的沈月,鋒芒恐怕撳都撳唔住!

棄揸辣車

沈嘉偉出名愛車,不過當晚因腳傷唔方便揸辣車,兩公婆坐七人車離開。

沈家4條Queen

息影20年的邱淑貞生活低調,但同一班圈中好友經常聯誼,上年全家飛到台灣捧張學友台北演唱會場。沈嘉偉同家中4條Queen跟學友後台合照,幸福到爆!

沈家三索女

仙氣沈月

17歲沈月在國際學校升讀高中,一直是校內風頭躉的她,盤起頭髮素顏返學已仙氣逼人,當日未見阿媽邱淑貞現身湊女,不過仍派司機管接送幫手睇實寶貝女。

陽光沈日

14歲沈日雖然冇家姐咁有明星氣質,不過都係陽光可人兒。

可愛沈晨

其實邱淑貞早有計劃送沈月出國升學,不過細女沈晨出世打亂計劃,現時八歲沈晨開始長大,亦唔需要媽咪操心經常接放學,小小年紀,沈晨已遺傳媽咪美麗輪廓,非常可愛!

由細靚到大

自小遺傳媽咪最強基因的沈月,絕對得天獨厚由細靚到大,近年更拍得住女神靚媽邱淑貞,去到邊都成傳媒焦點,多狂蜂浪蝶埋身外,亦被各大娛樂公司老闆爭崩頭想羅致旗下。

9歲輪廓精緻

當年只得九歲的沈月已經輪廓精緻,小小年紀就好有明星風範。

半隻腳入娛樂圈

雖然阿媽邱淑貞落閘唔畀女兒入行,前年四月沈月就為慈善拍宣傳照,半隻腳踏足娛樂圈。

14歲晒腿搶鏡

早熟的沈月,14歲已經長得亭亭玉立,15年以一身高貴Look晒長腿陪媽咪參加古巨基婚宴,搶盡風頭。

15歲小豆斗

5歲沈月現身香港巴塞爾藝術展,完全倒模媽咪女神風釆!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!