菊梓喬

吳若希晒合照冇菊梓喬份!網民:專登唔影一姐

最新娛聞

廣告

《2018年度勁歌金曲頒獎典禮》各獎項塵埃落定,但是非不絕,部分賽果也備受網民非議。其中出道只有2年嘅菊梓喬(Hana)首奪「最受歡迎女歌星」,斷定其星夢一姐地位,不過當晚坐隔離嘅前一姐吳若希全晚同菊梓喬零交流,連大合照都冇菊梓喬份,唔妥到出面喎!

撰文:東方新地 圖片:無綫電視截圖、新傳媒圖片、菊梓喬IG、吳若希IG

吳若希 過氣一姐好葡萄

前一姐吳若希兩年前停工生女結埋婚,復工後雖然奮起窮追,可惜一姐靚位被唱得性格又討好的師妹菊梓喬成功取代。早前菊梓喬眾望所歸奪得萬千星輝頒獎典禮最受歡迎電視歌曲時,吳若希一句「恭喜你呀一姐」,過氣一姐葡萄味出晒面。

葡萄一姐

吳若希一句「恭喜你呀一 姐」引來網民群插,被指葡萄到出晒面,言語亦欠風度和教養。

 

吳若希 菊梓喬 成晚零交流

而在前晚《2018年度勁歌金曲頒獎典禮》上,成晚兩女坐隔籬,但幾乎全程零交流,當吳若希憑《無常春秋》攞金曲獎時,佢一企起身即攬胡鴻鈞都唔攬坐隔籬嘅星夢一姐菊梓喬,似乎不和到出晒面。

到宣佈吳若希攞「最佳演繹女歌星」時,Jinny同樣無視菊梓喬,反而攬周柏豪!

吳若希 被指笑得太假

到宣佈菊梓喬攞「最受歡迎網絡歌星」,吳若希望咗對方一眼拍掌喪笑,連攞獎嘅菊梓喬都未開心成咁啦,真誇張!但佢同樣冇送上抱抱,菊梓喬就同周柏豪抱抱!

「最受歡迎女歌星」今年共有8位候選人,分別是容祖兒、吳若希、菊梓喬、王灝兒(JW)、譚嘉儀及田蕊妮、胡定欣兩位視后級人馬。最後由由菊梓喬(Hana)奪得,32歲的Hana入行短短兩年幾就擊敗容祖兒、吳若希、泳兒等一眾前輩奪得大獎,一眾網民都跌晒眼鏡!

宣佈菊梓喬得獎一刻,坐隔離嘅吳若希浮誇喪笑,連牙肉都露埋,比菊梓喬開心十萬倍,未知真心恭喜定嘲笑呢!

菊梓喬起身後先同柏豪抱抱,之後吳若希也起身同一姐輕攬,似交戲囉!

大合照冇菊梓喬份

身為星夢大師姐嘅吳若希,今次輸畀師妹菊梓喬,佢喺社交網貼咗一張合照有胡鴻鈞、譚嘉儀、石詠莉、作曲人張家誠等,偏偏就係冇本來坐旁邊嘅菊梓喬,吳若希寫道:「真心開心既(嘅)」冇錯,佢呢個笑容係真心開心,同知道菊梓喬攞最受歡迎女歌星獎嘅浮誇笑容兩個樣。

網民:「專登唔影一姐?」

識睇一定睇留言,網民紛紛問:「專登唔影一姐?」、「不和呀不和呀~一姐同連姐呢」、「頭先Hana拎最受歡迎女歌星嗰時,你笑到見牙唔見眼。」、「算啦,個獎都無晒代表性,你攞同一姐攞都係得淡笑㗎啦。」網民留言太抵死喇!吳若希之後再刻意po多張星夢歌手大合照,就有齊菊梓喬、連詩雅、周柏豪。

Hana晒6個獎項

Hana亦在社交平台大晒昨晚拿下的6個獎項,仲好謙虛話「一切只係時機+運氣,成就到今次的獎項」,但出道只有2年的她同樣備受網民非議,留言「我覺得你未夠班拿呢個獎項」、「TVB造馬畀晒啲獎你,其實有咩值得開心?希望你可以喺其他頒獎禮拎獎」、「未開過演唱會,單靠唱劇集主題曲就拎到最受歡迎呢個獎,你真係好叻呀」。

一文睇晒《勁歌》賽果

樂壇最後一張成績表《2018年度勁歌金曲頒獎典禮》完滿結束,張敬軒橫掃多個大獎,而「最受歡迎女歌星」亦由菊梓喬「驚喜」奪得,唔知大家又點睇今年嘅賽果呢?

最受歡迎女歌星 菊梓喬

Hana上台攞獎時,Hana熱淚盈腔哽咽話:「我好多謝TVB畀我第一首《一輩子守候》,令到好多人認迫我,多謝張家誠,真係好多謝TVB。好多謝公司星夢娛樂,herman,多謝你一直對我嘅信任,多謝你畀我嘅鼓勵。我真係無諗過,因為最近好多朋友問我都係話平常心,我真係覺得我可以做一個歌手、可以唱歌已經係畢生夢想,我真係好幸福。」

Hana今年共有6首歌入圍,當中《但願人長久》是劇集《跳躍生命線》的插曲,是翻唱自盧冠廷的原名歌曲,網民讚佢唱出不同感覺。

最受歡迎男歌星 張敬軒

張敬軒第四度奪得「最受歡迎男歌星」及憑《百年樹木》奪得「金曲金獎,他說:「我喺清水灣長大,今次攞獎係好大肯定,特別要多謝依然買正版唱片實體碟嘅人,雖然賣碟依家賺唔到錢,但對音樂人係好大尊重。」

軒仔今晚攞得5.5個大獎,之前他在三個電台頒獎禮已經有10個獎在手,本年度合共奪得15.5個大獎,成為「獎王」

軒仔的確實至名歸嘅!

最佳演繹女歌星 吳若希

第九及第十首金曲也由吳若希憑《無常青春》及《別再記起》奪得,Jinny在台上講到生B後,第一次參加大型頒獎禮,除多謝老闆何哲圖外,鏡頭亦有影到老公Alex在台下撐場,見他笑得燦爛未有如Jinny所說出現尷尬樣,Alex更聽老婆話沒有穿西裝出現,穿灰色衞衣便服示人。

最佳演繹男歌星 胡鴻鈞

最受歡迎網絡歌星獎 菊梓喬

人氣王大獎 周柏豪

柏豪今晚也大豐收,除了憑《男人背後》及《烏托邦》兩首歌曲獲兩個勁歌金曲獎,也攞咗人氣王大獎。

勁歌金曲獎

烏托邦—周柏豪
男人背後—周柏豪
你帶著我的青春離去—王灝兒
騎膊馬—泳兒
飛蛾撲火—菊梓喬
只想與你再一起—菊梓喬
缺—張敬軒
天才兒童1985—張敬軒
無常春秋—吳若希
別再記起—吳若希

遙不可及—胡鴻鈞
有了你—譚嘉儀
無悔無愧—胡定欣
神不守舍—吳業坤
無畏的肩膊—鄭俊弘
忍—林欣彤
獻醜—洪卓立
太難開始—胡鴻鈞
但願人長久—菊梓喬
百年樹木—張敬軒

最佳合唱歌曲獎

金獎 周柏豪、楊千嬅 – 背後女人

最佳舞台演繹歌曲金獎

開心節 鍾舒漫

最佳樂隊獎

金獎:Supper Moment

最佳唱跳藝人 Super Girls

「最佳跳唱組合金獎」就由Super Girls奪得,但成員Yanny缺席,只有四人現身。

傑出表現獎

金獎:田蕊妮
銀獎:譚嘉儀
銅獎:石詠莉

去年再次出歌的田蕊妮獲「傑出表現金獎」,台上獲獎時阿田都說很意外:「真係冇諗過,頭先都『吓!』咗一聲,我表現唔傑出,傑出係幫我宣傳嘅同事,多謝歌迷,多謝公司,我會梗加努力出年希望再上台。」之後阿田演唱歌曲《兩口子》。

年度最佳進步獎

金獎:許靖韻
銀獎:伍富橋
銅獎:鄭世豪

最受歡迎新人獎(排名不分先後)

戴祖儀
曾樂彤
謝文欣

薛家燕、胡楓頒發「最受歡迎新人獎」時,兩人活寶薛家燕、胡楓便出場頒獎,修哥不慎踩到謝文欣條拖尾裙擺,搞到文欣好尷尬呀!

唱片銷量大獎

打頭陣先頒「唱片銷量大獎」,排名不分先後,包括有菊梓喬嘅《忘記我自己》、胡鴻鈞《到此一遊》、鄺美雲《C Again》、陳潔麗《15 Fifteen》同石詠莉《Moving Forward》

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!