陳煒

豬年殺入電影圈 陳煒:全裸冇問題!

送狗迎豬!全民開心去舊迎新,呢期人氣旺爆的陳煒,搶先同《東方新地》讀者拜年,大家齊向煒哥沾旺氣,肯定新一年路路亨通!

去年事業大豐收的煒哥,除了成為TVB收視福將,勇奪《萬千星輝頒獎典禮》「最受歡迎電視女角色」,《深宮計》太平公主一角更令她名利雙收,人氣爆升收入破頂,煒哥已鎖定買千呎豪宅獎勵自己;事業勢如破竹,更大行桃花運,近日就不停有筍盤埋身:「係多咗人約,都要時間慢慢揀!」新年伊始,嚟緊煒哥更會殺入電影圈,向來演出拼搏的她直言只要劇本好,演出可以冇底線:「全裸冇問題!」演技超班的她,豬年挑機衝影后,人氣繼續火熱!

撰文:東方新地 圖片:新傳媒圖片

陳煒 豬年殺入電影圈

豬年新開始,講到去年在電視圈人氣最旺,非煒哥莫屬,去年播出的兩部電視劇《果欄中的江湖大嫂》以及《深宮計》先後成為無綫收視冠軍劇集,更在《萬千星輝頒獎典禮》勇奪「最受歡迎電視女角色」,演技被激讚,是她繼96年當選亞姐冠軍後再衝事業高峯,對於這第二個高峯,煒哥珍而重之,揚言新一年會繼續全力拼搏。

陳煒
有樣有身材有演技,陳煒不單受無綫監製歡迎,今年更會殺入電影圈,有電影監製為她度身訂造角色,觀眾有福嘞!

「可能你會話攞選美冠軍係一個高峯,但喺ATV收視冇咁高,回響亦冇咁大!今次《深宮計》,除咗香港、國內,以至整個華人社會都多咗好多人認識我,令我知名度打響咗好多,大家會知道陳煒做戲係點!」演出受歡迎,除為煒哥帶來電視獎項,更令她贏盡民心,就連去街市買餸都會獲檔主醒多啲。「去年兩套劇帶畀我真係好多嘢,尤其係入到家庭主婦層面,最開心係出街大家會嗌我『大巴姐』或者『太平公主』,感覺好親切,亦帶畀我好多商演、廣告,多咗好多賺錢機會,真係好感恩!」