林欣彤 王祖藍

王祖藍旗下藝人再走一個!林欣彤宣佈約滿離巢:江湖再見

最新娛聞

廣告

在大台節目《超級巨聲2》中奪冠出道的林欣彤(Mag),日前在IG貼出與老闆王祖藍的合照,宣佈結束二人賓主關係,Mag感激祖藍過去幾年對她的照顧、包容及給予機會,願意在她身上花心機和時間。睇番王祖藍前年宣佈開經理人公司「手工藝」,但開業一年旗下藝人鄧萃雯、徐子珊及黎瑞恩輪住走人,睇嚟祖藍真係好頭痕!

 

撰文:東方新地 圖片:新傳媒圖片、王祖藍微博、鍾嘉欣微博

林欣彤 王祖藍結束賓主關係

Mag去年因失聲被迫取消老闆王祖藍為她舉行的演唱會,其音樂事業一度要暫停!日前Mag突然在其社交平台宣布三年合約屆滿,Mag留言說:「祖藍老闆,很感激這三年你對我的照顧,我一直很感恩可以在你身邊,向一個如此有才華、卻謙厚、而且懂得尊重和愛的人學習,在這三年我的確成長了不少;我也很感謝你對我的包容、給我的機會和在我身上花的心機和時間,你一直相信我,讓我自由地建立自己的音樂事業,在我背後默默支持着我,你常說:『最緊要是你覺得舒服、開心』你的無私,一直讓我很敬佩和感激,謝謝你花在我身上的一切。約盡了,但不代表緣盡,希望以後會再有機會在你身上學習。」Mag更約定王祖藍「江湖再見,得閒飲茶。」二人似乎和平「分手」並未鬧不快!

 

至於祖藍也在IG貼上同一張合照並留言說:「雖然你每次搵我,都好尊敬咁叫我一聲『老闆』,但其實講到意志、能力同才華,你真係一啲都唔輸蝕,我實在受之有愧。雖然唔能夠親手送你企上處女演唱會嘅舞台,但呢三年陪你走過嘅路,困難時候嘅彼此扶持,都帶畀我好多美好回憶、成長同學習,容許我衷心同你講一聲:多謝!」

Mag在2010年參加綜藝節目《超級巨聲2》出身,之後簽約英皇娛樂,在多個樂壇頒獎禮上奪得新人獎,但其後因為健康出現問題。Mag於2016轉投祖藍的經理人公司,但在這三年間屢傳Mag因對工作安排有意見,故有意離巢。

三年合約屆滿,Mag宣佈結束同經理人王祖藍嘅合作關係,Mag離巢回復自由身,去向備受關注。

立即回顧:紅星劈炮 舅父反枱!王祖藍捧星夢碎

前年底,祖藍同邵氏合組工作室「手工藝創作」,更一口氣簽下20藝人係威係勢,不過,公司運作一年,旗下大牌藝人卻陸續走人,已經決定唔簽約的有鄧萃雯、黎瑞恩及徐子珊。祖藍身邊人透露:「當日佢同曾志偉傾合組工作室,祖藍係好有抱負,好希望將公司搞大佢,更加掟咗幾千萬買Office,同時間不停傾藝人加盟旗下,雯女同子珊、小恩子都係佢落力傾返嚟!佢答應幫雯女接內地劇,又話開戲畀子珊,至於小恩子,就話會幫對方出碟同開演唱會,但係講咗成年,全部都冇著落,旗下的藝人就成日喺出邊同人呻,話祖藍幫佢哋唔到!唔想再嘥時間!」

事實上,在內地拍綜藝節目起家的王祖藍,同雯女、子珊及小恩子合作年多以來,不停斟三人上內地綜藝。「雯女同子珊兩個,本身都唔易搞,佢哋覺得自己已經上咗位,唔係乜嘢都肯做,亦有好多要求,祖藍幫佢哋傾咗幾個綜藝真人騷,但係佢哋點都唔肯做,搞到大家好唔開心,內地啲製作單位好不滿,最後都係解決唔到,不停有磨擦,兩個都話要走唔留低,至於小恩子,佢根本唔恨搵錢,只係想出碟同做演唱會,對真人騷一樣冇興趣,祖藍唔想大家最後連朋友都無得做,亦放手比佢走!聽講離巢陸續有來!」

阿媽幫口調停

藝人拉隊走,就連同祖藍一路拍住檔搵食,擔任公司副總裁的細舅父冼偉智,去年亦遞辭職信。祖藍身邊人透露:「佢舅父一路喺亞視做高層,兩人感情好好,一五年祖藍決定開公司組班,就搵咗舅父過嚟做副總裁,可以話係佢最信得過嘅親信,但自從喺內地爆紅,祖藍自信亦同樣爆棚,同舅父開始經常有分歧,近排佢哋又為咗成立演唱會部門,同一啲製作上嘅問題嘈左一輪,佢舅父覺得應該打穩陣腳先,唔好瓣瓣都話搞,但祖藍心雄點都唔肯讓步,最後傾唔掂數,舅父仲嬲到劈炮唔撈,本來祖藍媽都有出面幫口調停,但係兩個男人嘅嘢,唔係話幫就幫到。」

陪老婆返教會

公司七國咁亂,但對王祖藍更大打擊,就是老婆李亞男婚後因為老公經常唔喺身邊,因而患上抑鬱症,經常會喺屋企爆喊,去年更加爆發埋驚恐症,身體響晒警號,令祖藍非常擔心,兩人當時亦被迫將生B計劃押後。知情者透露:「其實佢兩個好想有BB,但亞男有抑鬱,醫生建議佢要搞好身體先,所以祖藍先決定減產,已經唔再接內地劇,只係做綜藝節目,佢決定完成埋《奔跑吧!兄弟》第二輯,就會停一排陪亞男,自己亦可以諗下未來去向,已經計劃會去一個月旅行,等亞男可以全面放鬆心情,之後就會努力做人,希望出年可以追個BB。」幸而亞男現在已痊癒,仲生咗個可愛嘅BB㖭!

兩人揸全新的Tesla去鯉景灣吃晚飯,入到餐廳,王祖藍比老婆話晒事點菜,自己亦放下工作,同老婆談心 !

祖藍因為得老婆整唔少住家靚菜,養到連肚腩都長大埋!而早前鍾嘉欣同老公囡囡返港,亦有約埋好姊妹岑麗香丶王君馨、苟云慧去李亞男的逸瓏灣豪宅探對方,幾個女人圍埋整嘢食!

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!