幫你去水腫！ 美容雪櫃 正流行

呢啲咁pure咁cute嘅粉色迷你美容雪櫃，確係幾上鏡；將啲美容產品整齊放晒入去，仲可以一次過晒冷！靚還靚，呢類美容雪櫃係咪真係有用？的確有部份美容產品適合冰鎮使用，但有啲反而雪咗唔好。呢度同大家分享下，千祈唔好打錯卡！

適合放入mini beauty fridge美容雪櫃嘅產品

• 水性面霜、噴霧、面膜：有降溫、收緊皮膚作用，亦會令皮膚表面血管短暫收縮，帶嚟降紅嘅效果。
• 含活性成份產品：含有高濃度活性成份嘅美容產品，比如維他命C精華液，本身都要儲喺陰涼地方，放入迷你雪櫃都啱嘅。
• 紙面膜：最啱朝早敷，雪凍有助去水腫。
• Probiotics產品：純粹衞生啲，盡量減少細菌滋生。
• 玉石滾輪：即係周迅喺《如懿傳》入面用嚟按摩塊面支棒棒，依家外國都好流行㗎，叫佢Jade Roller，幫助通淋巴，加強血液循還，雪凍咗去腫效果更好，亦可以配合精華液使用。

不適合放入mini beauty fridge美容雪櫃嘅產品

• 油性美容產品：雪凍咗啲油會凝固，令份子結構改變，放室溫就夠。
• 香水：太熱或太凍都會令香水份子結構改變、味道走樣。都係放雪櫃頂啦！
• 化妝品：大部份化妝品都不適合入雪櫃。你注意到嗎？通常手心嘅熱度會令佢哋好用啲。

但千祈唔好有錯覺，以為美容產品放咗入美容雪櫃可以keep得耐啲。即使雪咗，都要根據生產商建議嘅限期前用晒佢哋㗎！