OG2

抗衰老殭屍美容PRP外國正流行!溫提:小心感染HIV

成日都話鬼妹易顯老,但點解啲外國女星經常睇起嚟皮光肉滑?你睇Kim Kardashian,咩美容新科技都去試,連殭屍美容(Platelet Rich Plasma,PRP)都做埋,仲要係幾年前已做!

撰文:CM Team|圖片:網上圖片、Instagram

呢款殭屍美容到依家喺外國都仲好流行,勝在神不知鬼不覺咁幫你嘅肌膚回春,但同時佢又極具爭議性,因為執行上稍有偏差就好大件事,足以危及寶貴嘅性命!

先講下咩係殭屍美容PRP。千祈咪誤會,佢唔係咩幹細胞療法,涉及嘅係高濃度血小板血漿。外國整容醫生Dr. Sean Kelishadi曾經用好淺白嘅方法解釋:過程就係從你身上抽血,然後用離心機將血漿分離,分成紅血球同PRP層,前者易引起不良發炎,後者係高濃度血水板同好白血球,將後者重新注入體內,就可以促進生長因子,令細胞再生,修復受損組織。

呢種療法唔單止用喺美容上,仲有助醫治肌腱或韌帶扭傷拉傷、退化性關節炎等等。之前籃球名將高比拜仁有膝患,都曾經去德國接受PRP,迅即好返。