抗衰老殭屍美容PRP外國正流行!溫提:小心感染HIV

Channel May

廣告

成日都話鬼妹易顯老,但點解啲外國女星經常睇起嚟皮光肉滑?你睇Kim Kardashian,咩美容新科技都去試,連殭屍美容(Platelet Rich Plasma,PRP)都做埋,仲要係幾年前已做!

撰文:CM Team|圖片:網上圖片、Instagram

呢款殭屍美容到依家喺外國都仲好流行,勝在神不知鬼不覺咁幫你嘅肌膚回春,但同時佢又極具爭議性,因為執行上稍有偏差就好大件事,足以危及寶貴嘅性命!

先講下咩係殭屍美容PRP。千祈咪誤會,佢唔係咩幹細胞療法,涉及嘅係高濃度血小板血漿。外國整容醫生Dr. Sean Kelishadi曾經用好淺白嘅方法解釋:過程就係從你身上抽血,然後用離心機將血漿分離,分成紅血球同PRP層,前者易引起不良發炎,後者係高濃度血水板同好白血球,將後者重新注入體內,就可以促進生長因子,令細胞再生,修復受損組織。

呢種療法唔單止用喺美容上,仲有助醫治肌腱或韌帶扭傷拉傷、退化性關節炎等等。之前籃球名將高比拜仁有膝患,都曾經去德國接受PRP,迅即好返。

咁PRP喺美容上有咩好處?人年紀越大,皮膚會越嚟越薄,原因有好多,其中一個係微絲血管減少。PRP嘅好係因為可以促進新微絲血管生長。坊間嘅美容公司表示,呢項療法仲會有助除皺、收緊皮膚、治療疤痕同暗瘡凹凸洞。
其實依家美容科技一日千里,咁多療程可以揀,咩人適合做PRP?Dr. Sean Kelishadi話,通常面色唔好嘅人做完殭屍美容都會紅粉緋緋。或者,如果病人某啲部位需要多啲血流,比如軟骨受損之類,佢就會建議就住嗰啲部位去做。

雖然話自體治療可以減少排斥或過敏反應,但整個過程都有一定風險。早前美國新墨西哥州就有客人因為做殭屍美容而感染HIV!本身針療就要嚴謹注重衞生,而且注射位置、濃度對不對、儀器規格都會影響療效。如果本身有自體免疫疾病、血液疾病或血小板功能問題,都唔適合做殭屍美容。做呢項療程前一定要有醫生評估,千祈咪亂做!

都係果句,以上內容只作參考,做任何療程都要搵專業可靠,甚至有認證執照的治療師或醫生問清楚喔。另外,進行美容注射時,都要了解多d安全及風險呀。