andy_sammi_tgt_feature

安心事件後首次「合照」?鄭秀文許志安疑似孖住去做gym

自從喺四月份爆出咗「安心偷食」事件之後,許志安就變成一個「壞咗嘅人」,連原訂於9月舉辦嘅紅館演唱會都要取消埋,徹底銷聲匿跡咗一段時間。一直以嚟,鄭秀文除咗喺IG交代過會原諒安仔就冇再回應,而二人之間到底係咪真係好返,就一直都冇人知。直到最近,鄭秀文其中一個IG限時動態就疑似出現咗安仔身影,令人相信佢地已經破鏡重圓。

撰文:AuntieSam|圖片:鄭秀文Instagram、新傳媒圖片

安心事件後首次同框出現!?

呢輪阿Mi為咗備戰7月份嘅紅館演唱會,頻頻去做Gym鍛煉身體,仲不忘喺社交平台同Fans分享過程同成果。直至到今個月20號,阿Mi再次喺IG嘅限時動態分享自己去咗健身,畀眼利嘅網民發現,阿Mi身後嘅玻璃反映出一個白色衫人影,而呢個人相信就係佢老公許志安。

雖然模糊不清,不過按身形同側面推斷都似係安仔。咁多年以嚟,安仔同阿Mi都一齊經歷過感情上唔少波折,依家可以孖住一齊去做gym,相信兩個人已經再一次跨過呢次考驗。