泰國網紅抽脂變成8舊腹肌！ 網友：「係男人就自己操！」
廣告
提起肚腩「抽脂」大家都覺得係肥人專利，不過有位泰國人兄做「抽脂」手術紅出國際，竟然只係正常身形？呢位泰國網紅名叫Pangpaparn Ounvilai，非常關注外表嘅佢，因為做極運動都有肚腩，決定把心一橫幫肚皮整形，進行抽脂以及腹部填充塑形手術，「人工腹肌」只需兩個鐘搞掂！
撰文：CM Team |圖片：網上圖片
Pangpaparn Ounvilai經常喺社交平台上分享自己嘅美容心得同經歷，更加唔怕被標籤，將自己整容前後照片大公開，真性情風格令佢成為泰國網絡紅人。決定做「八舊腹肌」手術，佢表示：「我盡咗力做運動，但仍有改變唔到嘅地方，交俾醫生相信人生會更快樂。」
腹肌雕刻
Pangpaparn Ounvilai做嘅抽脂手術係一種名為「腹肌雕刻」嘅新技術，外國雜誌《Plastic and Reconstructive Surgery》曾經發表有關論文，當中提到腹肌嘅條件在於前腹壁肌肉發達，有啲人就算飲食健康，經常做運動都未必能練出八舊腹肌，「腹肌雕刻」可以喺肚皮表面進行抽脂，人造出腹肌凹痕。
過程
「腹肌雕刻」屬於高難度整形手術，因為腹部血管相當密集，醫生一定要有好手勢先能夠安全地完成手術。手術前醫生會為病人腹部「起稿」，畫出唔同深淺度嘅腹肌凹痕，病人同意後，再喺具體位置上面抽脂以及填充應該脹起嘅地方，再用腹肌狀模型定形。
手術後
手術後核心肌肉疲勞會長達四星期，呢段時間病人要避免一切運動。康復期一過就要去醫院拆線，最初腹肌紋理唔會太明顯，而且會有啲假，要經過一段時間配合飲食同運動先會顯得更自然，「人工腹肌」一般有6年壽命，手術價錢大概4萬美金不等。
近幾年多咗好多美國人專程飛去泰國做呢種手術，為嘅都係唔想日操夜操。不過亦有網友覺得「八舊腹肌」係健身人士努力嘅「成果」，人造出嚟一啲都唔值得被欣賞。筆者覺得「人工腹肌」都要付出好大代價去換返嚟，又要洗錢又要忍痛，值唔值得做就要自己衡量啦！
