脂肪移植

抗衰老整容術!專業醫生分析自體脂肪移植利弊

Channel May

廣告

醫學發展一日千里,以前用喺修復醫學領域嘅醫療技術,依家都套用喺整容方面,令人睇起嚟更靚更年輕。脂肪移植就係其一方法。早前,呢方面嘅權威、美國整形外科委員會認可醫生Dr. Sean Kelishadi就喺訪問中披露咗脂肪填充用嚟抗衰老嘅新技術,睇完可能你會「嘩」一聲,人類保持外表永遠年輕嘅日子可能不遠矣!

撰文:CM Team|圖片:網上圖片

  1. Dr. Kelishadi話,一般嚟講,令人睇起嚟年輕嘅方法不外乎填充令面部豐盈、拉提、減少贅肉、緊緻皮膚,喺適當嘅地方加入脂肪係其中一種做法。用脂肪作為填充劑有個好處,由於裡面有幹細胞,會令整個填充部位更滑溜,質感更好,而神奇嘅係完全自然發展,唔使醫生再多做手腳。
  2. 呢種技術最先用喺復修醫學方面,有醫生發現,由脂肪抽取嘅成體幹細胞(adult stem cells)可生長成骨骼、軟骨、肌肉或皮膚。以往乳癌病人做胸部重建手術,係用皮膚作為填充物,但問題係填完凹凸不平唔自然,於是有醫生加入脂肪令重建乳房睇起嚟平滑。而臨床研究發現,加入脂肪嘅重建乳房復元得較快較好,皮膚較易由粗糙變返柔軟,就係因為脂肪中有幹細胞。
  3. 科學家又發現,將脂肪分解成更細小後,裡面有一樣叫Stromal Vascular Tissue (SVT)嘅物質,係用以支撐脂肪內部,佢具備幹細胞同生長因子、細胞外基質,似膠原蛋白咁,有豐盈同再生效果,並且有助改善皮膚色澤。
  4. 既然成體幹細胞咁好,全身注射得唔得?唔得㗎!每一個部位注入成體幹細胞,都要臨床醫學數據支持,否則會釀成醫療事故甚至死亡。通常喺冇更安全嘅有效辦法先用。
  5. 咩人適合做脂肪移植?Dr. Kelishadi舉例,一個女人生仔後,因荷爾蒙變肥,即使透過節食同運動都減唔到嘅車胎贅肉,嗰啲好有可能係抵抗荷爾蒙嘅肥肉。咁嘅情況下,佢會為對方做脂肪移植。或者有啲人面部冇晒彈性凹陷,都可以用脂肪做填充劑。
  6. Dr. Kelishadi亦做過所謂Hips to Lips嘅手術,即從臀部抽取脂肪豐唇。過程中要將臀部脂肪分解成更幼細嘅粒子先可以注入唇部,甚至淚溝,因為嗰啲部位皮膚較薄。
  7. 脂肪移植嘅好處係,佢嘅填充效果相對於一般填充劑嘅時間較長。但無論如何移植脂肪點都會流失,醫生注射時越輕手、手勢越好,流失率就越低。
  8. 隆胸用假體植入定自體脂肪移植好?Dr. Kelishadi認為兩者各有千秋。採用假體手術較快,一個多小時做完,用自體脂肪,要抽脂、過濾、重新注入脂肪,時間較長。隆胸假體有不同形狀、尺碼,而脂肪要造成某個特定形狀會有限制。Dr. Kelishadi亦遇過病人做完自體脂肪隆胸後認為胸部不夠堅挺,或做不到深刻嘅乳溝。但對於瘦到見骨嘅病人,做完假體植入後,佢會再輔助以脂肪移植,減少骨感。
  9. 但佢提醒,脂肪移植只適用於體重穩定嘅人,因為取出脂肪,轉移至另一部位,移植脂肪嘅表現會同喺舊部位時一模一樣,即係你變肥佢會脹大,你變瘦時佢會減。
  10. Dr. Kelishadi話自己從來唔會為脂肪豐唇初哥做脂肪移植,而會改用其他填充劑,因為萬一唔滿意,後者可以返轉頭,脂肪唔得。

關鍵詞
整容