朱咪咪去年險墮合約陷阱 魔鬼條款令佢大感心寒
廣告
無線娛樂新聞台報導：定居喺新加坡號朱咪咪，日前返咗嚟香港工作，抵埗後仲急不及待去嘆各款美食，咪咪姐幾個月前逗留香港時不幸確診，雖然已經好快康復冇咩大礙，但好多人都話中招過後會有唔同嘅後遺症，咪咪姐都話以前超捱得嘅佢，而家就變得怕凍，喺室內冷氣大少少都要拎嘢披一披，不過萬幸嘅係咪咪姐把靚聲就冇受損呀。
咪咪姐又唱得又講得，所以每次佢開演唱都超好氣氛，本來咪咪姐打算上年九月喺紅館搞個唱，但就因為遇人不淑而爭啲令佢墮入合約陷阱，所以先至令開騷計劃擱置。幾時都話魔鬼在細節，呢日咪咪姐重提合約嘅魔鬼條款，佢話除咗份約係由2022年寫到2024年外，入面嘅條款仲寫住，無論呢個年期內喺香港定世界各地，只要用「朱咪咪演唱會」呢6個字所舉行嘅演出，版權將全歸對方公司所擁有。
咪咪姐話自己係好懵嘅人，以往合約超過3張紙，佢都會因為怕煩而唔細睇就簽咗，但今次佢唔知點解好冷靜，睇咗份合約先知出事。咪咪姐指如果份約只係寫2022至2024年嘅紅館騷佢都OK，但無理由要去世界各地開騷，個版權都要歸對方公司。
事件畀咪咪姐嘅朋友喺網上公開後，好多fans都戥咪咪姐唔抵，仲叫佢要採取進一步行動，但咪咪姐就覺得對方不仁，但自己唔能夠不義，所以佢唔打算公開對方個名，仲話得饒人處且饒人。至於之後會唔會再開返騷？咪咪姐就話因為今次佢取消咗個場，要等一年後先再可以申請，但咪咪姐叫咁多位fans Don’t Worry，佢有時間就會返嚟香港唱歌畀大家聽呀！
即刻Follow TVB 娛樂新聞台 Facebook專頁 https://www.facebook.com/TVBENews
登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
撰文：東方新地圖片來源：Youtube@TVB娛樂新聞台資料或影片來源：Youtube@TVB娛樂新聞台
