獨家丨孫慧雪懷孕3個多月曾作小產 打40支安胎針保第二胎
廣告
無線娛樂新聞台報導：孫慧雪早前喺社交平台透露懷上第二胎嘅消息，唔少圈中人同fans都送上祝福。呢日阿雪現身電視城開工，雖然只係懷孕3個幾月，但係佢個肚就已經相當大，阿雪都坦言今次陀B比上一次辛苦，有段時間更加要每日去醫院打安胎針，足足打咗成40針！阿雪就話可以因為休息唔夠嘅關係，因為佢話陀第一胎時候自己想幾時瞓就幾時瞓，但係而家就因為有咗大仔，而囝囝對媽媽再懷孕呢件事未有概念，唔明點解媽媽唔同佢玩，所以阿雪話要留精神去湊囝囝，同時又要養胎，令休息不足嘅阿雪有少少出血嘅情況。
阿雪話當時檢查完，醫生同佢講個情況係作小產，所以就要每日打針。問到阿雪現時嘅健康狀況，佢就話因為算係踏入穩定階段，所以自己都精神咗好多，亦都停咗打針劑。阿雪又話而家自己個肚未夠4個月，但好多人見到佢肚咗大，都以為佢已經懷孕5、6個月呀！
有網友喺社交平台見到阿雪個肚咁大，擔心佢係咪為養胎食太多，阿雪就為此解釋，話BB只係遺傳咗爸爸嘅大骨架，加上自己本身有子宮肌瘤嘅關係，所以個肚先大得咁快，佢仲話自己食量正常，但係口味就大變，變得好鍾意食甜食同漢堡包。至於問到今胎係仔定女？阿雪就話賣個關子畀大家估下先呀！
今胎雖然陀得咁辛苦，但好在阿雪有個好錫佢嘅老公，會盡量接送佢返工放工，又唔會畀佢拎重嘢，總之就係女皇式嘅對待； 至於5歲嘅囝囝見到媽媽個肚越嚟越大，就開始意識到有BB喺媽媽個肚入面，佢仲同阿雪講，自己都想變返BB入去媽媽個肚度陪住佢，非常可愛呀！
即刻Follow TVB 娛樂新聞台 Facebook專頁 https://www.facebook.com/TVBENews
登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
撰文：東方新地圖片來源：Youtube@TVB娛樂新聞台資料或影片來源：Youtube@TVB娛樂新聞台
