新四十二章丨陳豪迷上拍片將作品同fans分享 龔嘉欣稱戀情係美麗誤會…

陳豪同龔嘉欣喺劇集《新四十二章》 入面飾演前世冤家，不過呢日適逢元宵，佢哋就暫時唔鬥氣，同埋江嘉敏、譚凱琪、鄺潔楹Judy、糖妹黃山怡、鄭子誠、林景程、馬海倫、衛志豪等出席宣傳活動，兼向市民大派禮物。

活動期間龔嘉欣同江嘉敏比試拗手瓜，結果嘉欣以超強臂力贏咗，事後佢話自己嘅臂力係拍劇練出嚟，仲話自己拍完動作戲之後鍾意咗做打女呀。而身邊嘅陳豪都話劇中嘅自己精通各國語言，同現實中嘅佢都差唔多，陳豪仲笑言現實中嘅自己，國語係佢嘅強項呀！

早前成家一齊去泰國旅行，陳豪就充當攝影師幫老婆陳茵媺拍片，佢話因為自己身為演員，所以一直到鏡頭嘅運用好注重，仲話自己認識咗啲社交平台之後，可以畀佢實踐自己鍾意拍攝呢樣嘢，可以試用唔同技巧，再將作品放上網睇下大家反應。

日前傳出嘉欣覓得日藉甜品師男友，不過呢日佢就澄清只係一個美麗嘅誤會，但係大家嘅祝福會收晒先，仲明白大家好想佢搵到好姻緣，所以嘉欣話開心大家咗錫自己呀。

鄭子誠就預告同Judy會喺一個狹窄嘅空間入面，有一場有肢體接觸嘅戲份。而糖妹就話劇中自己嘅出場都好特別， 叫大家記得收睇呀。而衛志豪同林景程喺劇入面有唔同打鬥場面，講到劇中林景程套摔交裝好吸睛，佢都話見到套衫嘅時候，有諗過係咪要為套衫而操返下個body呀。

即刻Follow TVB 娛樂新聞台 Facebook專頁 https://www.facebook.com/TVBENews

登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0