楊思琦

39歲處女下海 噴血寫真吸富豪 楊思琦:好多人問價!

wp
入行17年,無論當選港姐定做人媽媽,楊思琦副靚body一向出名惹火!不過性格內向,六年前再生埋囡囡楊卓穎(Krystal)做埋媽媽,一直收收埋埋34D、24、35天賦好本錢!原來思琦妹一直希望四十歲前拍番輯寫真留倩影,咁啱年初就有出版社招手邀請合作,雙方一拍即合。話就話39歲零11個月已屬中女,思琦妹天生童顏、身材fit過做女嗰陣,頭一波寫真相一外洩,已經收到富豪中間人瘋狂問價!

撰文:東方新地|圖片:《Miss Szeki 2018》

楊思琦:自己唔會就得

楊思琦出名慳妹又係孝順女,11年情海翻波做咗單親媽媽,思琦妹為養家同養女,拍戲登台走南闖北做不停。今次史上第一次亦都係最後一次性感解放,據知情人士透露並非為撲水養女:「思琦妹做嘢好勤力唔揀擇,手頭上又揸住五層樓市值半億,今時今日真係唔會為咗開飯去拍寫真。今次合作純粹為還個心願,同埋想為單親家庭協會籌款!不過明明好有意義一件事,因為啲相真係好性感噴晒血,搞到佢突然飯局價急升,呢排多咗好多中間人打去畀思琦妹問價!」

本刊致電思琦妹,當事人都承認近日要招架大量中間人短訊同電話:「其實唔係最近先至有,一選港姐已經收到呢啲問價,不過最近再多咗、啲價錢好瘋狂。咁人哋問係人哋嘅事,自己唔會做就得。」被問到經常單打獨鬥北上出騷登台,如何應付猴擒同立心不良客人,思琦話出發前一定會問清楚行程:「咁耐以嚟!我都冇試過要去飯局陪飲酒,我通常做完嘢盡量會即日來回,如果唔得第二朝就一定走,而且我每個工作,每個行程,自己同助手都會問得好清楚,唔啱就唔接!」

寫真收入做善事

39歲才推出首本個人寫真集,楊思琦坦言答應拍攝的最大原因,是出版社會將寫真收入扣除開支後全數撥捐單親家庭協會,本身是單親媽媽的她,希望藉此幫助有需要的單親家庭:「做單親媽媽唔容易,要兼顧工作又要照顧小朋友,自己好彩有媽媽幫手,如果唔係我都唔知點算,我覺得好多單親媽媽需要更多嘅支援,所以決定去做呢件事。」

做慈善兼大派福利,思琦這個40歲前的心願,其實好有意義!

童顏誘惑

得天獨厚有不老童顏、又keep fit有道,話雖下月就滿40歲,不過思琦妹在逼爆小背心下仲係滿瀉少女味。

囡囡話靚

寫真遠赴馬來西亞五日四夜拍攝,出動大量Bikini、小背心及睡衣上陣,思琦妹就話部分相有畀囡囡Krystal過目:「佢睇完都話靚!」

楊思琦寫真床照先睹為快

楊思琦早前宣布推出首本個人寫真集《Miss Szeki 2018》,「39+1」之齡身材依然keep得超好,皮膚白滑,仲有多年不變的標緻童顏,大家睇到目定口呆!今次思琦再有寫真床照讓大家先睹為快,見到佢身穿喱士白底在床上,唔似一女之母,極盡少女誘惑!

同沙律撞泳衣

講開又講,楊思琦寫真入面其中一件白色喱士通花泳衣,竟然同另一位寫真女郎張沛樂(沙律) 撞到應,沙律著上同款泳衣,大晒33E導彈「胸」器!一個媽媽級風韻猶存,一個26歲索女青春無敵,大家鍾意邊個多啲呢?

同場加映:

楊思琦39歲首出寫真

楊思琦於2001年港姐競選中奪冠,入行多年拍攝過多部劇集,現為一女之母,不經不覺今年8月便踏入40歲!不過「39+1」又有咩好怕?楊思琦今年推出首本個人寫真集《Miss Szeki 2018》,佢早前赴馬來西亞五日四夜取景拍攝,換上差不多20套靚衫,當中不乏小背心、泳衣、睡衣等性感造型!

童顏依然 噴血身材依然

楊思琦多年樣貌身材都keep得非常好,34D、24、34身材噴血依然,出名童顏的思琦仲係成個後生女咁,實在令人羨慕!思琦回覆傳媒時表示以前一直想推出寫真,為青春留倩影,不過以前在TVB時未有機會。剛巧有出版社早前搵佢,所以就一拍即合!

Sell美感 非賣弄性感

楊思琦又稱今次拍攝過程都頗為辛苦,因為要由朝曬到晚,幸好拍攝效果相當理想,攝影師將自己最靚、最自然的一面呈現出來。思琦同時強調寫真集唔係賣弄性感,而係以美感為主;另外亦有文字配合,跟讀者分享自己在不同階段的成長及內心世界。