新人結婚禮物清單被指肉酸 網友嘲：冇錢又學人擺酒

撰文：東方新地｜圖片：連登討論區

新人貼出結婚禮物清單

最近，有網民於討論區發文，表示自己見到友人於個人社交網貼出一張結婚禮物清單，讓只出席婚禮或完全未能出席的親友選擇，親友更可按個人意願填寫「資助項目」，當中的選擇都不少，不如大家一齊睇睇有咩選擇。

結婚禮物選擇

多個選擇中，「資助」項目由50蚊至500蚊或以上都有，但相信一對新人早喺諗「資助」項目上，都有體貼考慮過某啲親友嘅經濟能力，皆因有一項選擇係「祈禱祝福」，即唔洗錢就可以送上結婚禮物。

樓主留言指認識一對基督徒新人即將結婚，但就見到對方貼張結婚禮物清單出嚟，「心諗乜料，禮物從來都係講心意」。

帖文一出，隨即引起一眾網民熱議，有部分人就認為呢對新人嘅做法其實喺外國係件常見之事，而且外國人「好興呢啲」，覺得列出禮物清單根本冇問題，認為係樓主大驚小怪。

有網友就笑指個禮物表好似遊戲節目嘅感覺，另有網友指覺得新人做法冇問題，因為有免費又有50蚊揀，比一般去飲嘅錢仲要平得多。

另外，亦有部分網友表示「好過收啲相架、擺設唔知點咁」，有清單就唔會造成不必要嘅浪費，仲讚呢個做法幾好。

不過，亦有網民嘲諷新人「冇錢學人擺酒行教堂」，認為列清單要求資助好「肉酸」。

雖然唔少網友嘅留言並非一面倒支持或反對呢對新人嘅做法，但兩位新人嘅做法又真係有好處，皆因真係可以減少浪費，又令親友清楚知道新人真正需要。或者大家暫時未接受呢一套，唔知大家又點睇呢？