AA

拍《多功能老婆》遲到辣著陳煒 楊千嬅寸嘴回應⋯⋯

由楊千嬅主演的2019年劇集《多功能老婆》將於農曆年初一晚上開始在無綫深宵時段重播,當年楊千嬅及周柏豪分別憑此劇奪得《萬千星輝頒獎典禮2019》「最受歡迎電視女角色」及「最受歡迎電視男角色」獎,不過在接拍《多功能老婆》的同時,原來楊千嬅當時又接多了一部同郭富城合作拍攝的電影《麥路人》,最終因為日夜趕戲,搞到拍《多功能老婆》時頻密遲到,連累劇組遲收工而怨聲載道,就連出名老練順得人的陳煒,都畀千嬅辣著,本刊就曾拍得二人一齊拍外景時,煒哥為等姍姍來遲的千嬅埋位等到面都黑晒,戲外更全程零交流,對此事千嬅承認的確有遲到,但她笑住話⋯⋯

文:東方新地|圖:新傳媒圖片庫

楊千嬅 頻密遲到

楊千嬅在2018年初簽約老公丁子高旗下,首項工作係回歸TVB拍攝劇集《多功能老婆》,不過劇拍到一半,千嬅又接多一部電影,同郭富城合作拍電影《麥路人》,連踩兩邊戲咁博為乜,原來係老公丁子高一早打好如意算盤,希望夫妻檔省靚招牌,憑電影電視劇幫老婆一箭雙鵰,擸齊TVB視后兼冧莊再做影后。

楊千嬅
本來趕拍緊無綫重頭劇《多功能老婆》已經夠忙,當年千嬅再接拍同城城首度合作的電影《麥路人》,分身乏術的她惟有犧牲睡眠時間,可惜都係出事,搞到經常遲到累劇組遲收工。

不過要同一時間兼顧電影同電視劇,對當年44歲的楊千嬅來說,其實有苦自己知。據知情者透露:「係人都知拍劇時間好長,趕完夜班又緊接開早班,咁耐冇拍TVB劇,千嬅初頭都唔係好慣,因為真係日接夜冇乜得抖,喺呢個時候,仲接多部電影,連幾粒鐘休息時間都冇埋,佢其實好吃力,最辛苦嗰次更加係連踩48個鐘,攰到狂隊咖啡提神頂住!」

楊千嬅
楊千嬅同一時間拍劇又拍電影,試過連踩48小時冇得瞓。

可惜牽一髮動全身,楊千嬅唔夠瞓就話死頂捱到殘,但同劇演員亦因為佢頻密遲到連累經常收唔到工,一樣等到謝。據知情者透露:「千嬅都好識做嘅,一早講咗自己要叠住部戲,時間要遷就,佢講話寧願自己瞓少啲,但時間又邊有咁理想吖!有時電影嗰邊未搞掂唔放人,佢想走都唔得,咪又搞到套劇啲演員囉!成組人為等佢一個,就算Set好晒機,其他演員到齊一樣拍唔到!」

楊千嬅
全組人等咗天后大半個鐘,終於見千嬅趕到。
楊千嬅
千嬅姍姍來遲,但到場後仲未埋得位,入咗隔籬劇組租用的舖位補妝,搞了廿多分鐘,行出街準備埋位的她,又再要補多轉先肯上鏡。

陳煒等到扯火

當中擔演《多功能老婆》女二的陳煒,劇中同千嬅有最多對手戲,亦因此經常要等天后駕到等到著晒火!據知情者透露:「千嬅同煒哥最多對手戲,咪成日要煒哥等佢囉!煒哥講電話玩手機打發時間,喺呢行咁耐,煒哥份人好識做兼且出名好有耐性,但成日係咁等,本身已經拍到好攰想快啲拍完收工,愈等個人就愈躁,有時真係見佢呆等到面都黑埋,不過唔好話佢啦,其實班工作人員咪一樣等到謝晒,但明知寶華姐都要就千嬅啲期,個個幾嬲都唔敢出聲囉!」

多功能老婆
劇組在佐敦渡船街拍攝《多功能老婆》外景,千嬅又再遲到,企喺街等千嬅大半個鐘,曬到變化石的煒哥,塊面愈嚟愈黑。

當日《多功能老婆》在渡船街趕拍外景埋尾,千嬅再次遲到。當日下午兩時許,在街上要拍一場開車戲,只見同場演出的陳煒、周柏豪、朱晨麗一早到齊化好妝呆等,只係千嬅遲遲未見影,一班演員及工作人員企喺街已經熱到木無表情,朱晨麗就不時上煒哥的七人車涼冷氣,換好戲服的煒哥,唔知係咪企喺街曬到出火,見佢塊面愈嚟愈黑,連講電話都唔識笑。

多功能老婆
全組人準備就緒,獨欠主角楊千嬅未到,唔止陳煒扯火,柏豪一樣面燶燶。

掛住上香拜神

不過,姍姍來遲的楊千嬅,嚟到仲要成棚人慢慢服侍,拜神化妝整頭又搞足半個鐘,大家都只能望住佢繼續焗等。

楊千嬅
千嬅拍劇前第一時間先拜神上香。
楊千嬅
之後千嬅仲拎住大支按摩棒按摩一輪,未捨得埋位。
楊千嬅
除咗有助手跟身,千嬅仲帶埋私人化妝師及髮型師到場,排場十足。

周柏豪幫埋試位

周柏豪、陳煒及朱晨麗呆在車上等千嬅,千嬅還在補妝遲遲未埋位。

多功能老婆
周柏豪等到皺晒眉。

千嬅上咗車,終於可以拍攝,不過一個開車鏡頭只拍咗大半個鐘,相對等嘅時間仲長啲!難怪個個冇表情!

楊千嬅
開車鏡頭只係拍咗大半個鐘,相對等嘅時間仲長啲。

拍完一停機,千嬅已經大忙人上身忙於講電話,同身旁陳煒及朱晨麗完全零交流。

楊千嬅
一拍完劇千嬅已同陳煒及朱晨麗零交流。

好姊妹孖住走

陳煒朱晨麗在劇中演千嬅閨密,不過,千嬅巨星上身難埋堆,反而陳煒、朱晨麗就因拍劇變閨密經常行孖咇一齊收工直落食飯睇戲,仲試過睇戲遇到黃德斌。當日轉場景再拍完後,朱晨麗就孖住煒哥一齊走。

楊千嬅
楊千嬅同陳煒、朱晨麗戲裡係好姊妹,但戲外千嬅卻極少埋堆,反而陳煒、朱晨麗就因拍劇變閨密。
楊千嬅
兩人又約埋去睇舞台劇「偶然,徐志摩!」,捧胡定欣馬浚偉場。
楊千嬅
收工後仲一齊直落去食甜品!

楊千嬅認遲到

楊千嬅重返TVB拍攝劇集《多功能老婆》,同時又接拍同郭富城合作嘅電影《麥路人》,因為趕戲搞到拍劇頻頻遲到,千嬅解釋:「其實冇咩回應,因為呢啲報道成日都有,其實就唔真實,不過有啲係事實。」

楊千嬅
因為趕戲搞到拍劇頻頻遲到,千嬅解釋:「其實就唔真實,不過有啲係事實。」

事實就係千嬅的確有遲到,佢話感謝劇組包容:「因為拍攝時間長短一定有,我哋度期係留咗好充裕嘅時間,的確拍《多功能老婆》係有三、兩次遲到過,都係十分鐘、二十分鐘,通常兩個鐘頭前預知未收得工就即刻打電話去通知劇組,等佢哋可以跳拍,就算我或者助手都一定會做。」被指因遲到而辣著陳煒,千嬅表示唔多覺對方有嬲囉!

楊千嬅
被指因遲到而辣著陳煒,但千嬅表示唔多覺對方有嬲!

唔記得遲幾多

拍劇有遲到,連拍電影《麥路人》千嬅都有遲到:「拍《麥路人》就遲過一日,當日要去中環睇尾龍骨,唔醫就行唔到,你知中環有幾塞車啦,但遲幾多就真係唔記得喇,好耐之前嘅事。」

楊千嬅
千嬅承認遲到,佢話感謝劇組包容:「的確拍《多功能老婆》係有三、兩次遲到過,都係十分鐘、二十分鐘。」

千嬅仲笑住話:「其實呢啲我都唔明,我等咗啲時間就唔係時間咩!我拍咁多電影都冇呢個問題,點解拍電視劇就有呢?」

楊千嬅
千嬅話唔明拍咁多電影都冇(遲到辣著合作演員)呢個問題,點解拍電視劇就有呢?