leesze

家好月圓 | 李司棋︰拍嗌交戲拍到血壓高

《家好月圓》最近於深宵時段重播大受歡迎,迎來大結局,劇中飾演「荷媽」的李司棋在《溏心風暴》三輯系列中都有精湛的演出,但原來拍攝背後健康都受到影響。縱橫演藝圈數十年的李司棋,在訪問中大談當初選美原因、拍劇趣事、欣賞的後輩,又分享興趣以及養生等生活軼事。
文、圖:東方新地

記:東方新地記者 李:李司棋

家好月圓 | 李司棋︰拍嗌交戲拍到血壓高
李司棋大談拍攝《溏心》系列的苦與樂。

「關菊英背對白一字不漏連標點都有埋」

記:《溏心風暴》系列你同關菊英啲嗌交戲好多,拍完一定好攰!
李:好彩對手係關菊英,因為佢真係一個好好嘅演員,佢講對白係唔會漏一個字,劇本入面係咁就咁,幾乎標點符號都有埋,因為佢個態度係咁,我更加要交番戲畀佢,即係乒乓波咁,佢打過嚟,我打番過去,我覺得佢係好好嘅對手。

家好月圓 李司棋
「荷媽」李司棋在《家好月圓》日日有交嗌,與胞妹「阿Sa」關菊英有不少對手戲,次次動真火,出口都係金句。

談後輩應有的演員態度

記:通常都一take過?
李:咁我又唔會話自己一定可以一take過,但都唔會太多NG。
記:啲後輩面對你會唔會好有壓力?
李:我覺得,我畀你壓力,你畀我壓力都係好,喺做戲嘅時候的確需要咁,如果唔係大家都鬆散,當NG係好隨便嘅事,依家啲科技咁好,做唔到,錯一句,之後返去剪接幫你接番埋,大家愈嚟愈縱自己,咁你嘅戲會好咩?唔能夠自己嘅戲未到位,於是乎十句cut兩次嚟做,如果係精神唔夠或者太忙無去溫習,我覺得一次、半次可以,但唔可以做成一個習慣。

現年70歲的李司棋現樂於享受人生。
現年70歲的李司棋現樂於享受人生。

「黎諾懿幫我度血壓一度先知成二百幾度」

記:嗌交戲係咪真係好攰?拍完使唔使抖番一個鐘?
李:拍嗰時我唔覺得攰,反而嗰日我會好興奮,因為係戲肉,有個支持力,但做完就會覺得攰。拍《家好月圓》我好多戲都係有衝擊,有時又會喊,又唔夠瞓,我時時都好頭痛,琴姐(李香琴)就話:「我睇你血壓高!你會唔會血壓高呀?」我話:「唔會,我家族無血壓高。」第二日黎諾懿帶咗個血壓計,一度,二百二十幾,跟住我話:「你個機壞咗!」哈哈,琴姐就好緊張:「你二百幾,唔可以再郁㗎嘞,你應該去醫院瞓床!」第日又有第個人又帶血壓計嚟,一度都係咁高,我真係唔知自己血壓高,仲高到咁,後尾我都有睇醫生,醫生都話我血壓高咗,但只係一輪,跟住又降番。

記:拍嗌交戲多搞到血壓高!
李:好多演員都有呢個問題,係人嚟㗎嘛,你估做戲嬲嘅時候係假嘅咩?真係因為對白、劇情而嬲,我係做戲啫,但我係真係用個情緒,好多演員都應該小心呢樣嘢。

司棋姐拍《家好月圓》拍到血壓高,身體響起警號還不知道,幸好同劇演員個個錫住佢。
司棋姐拍《家好月圓》拍到血壓高,身體響起警號還不知道,幸好同劇演員個個錫住佢。

 

「唔想畀人知有cancer」

記:講開健康,你曾經病過(子宮癌),身體上同心靈上有無咩體會?
李:人有健康嘅時候就要去到盡,喺情緒各方面唔好好似每日都困自己喺愁城,我自己無論有啲咩唔開心嘅事,我有我嘅方法對付,我唔會鑽牛角尖。反而我會多啲約朋友,同朋友一齊傾吓偈,會緩和咗心情。唔好畀件事影響,當你畀佢(情緒)拉低咗,你就返唔到上嚟。好似我當時,我唔會話因為我有病我就死嘞,我唔會諗呢啲嘢。同埋我知道我個病係唔死得嘅,因為好初期,只要我好好地醫治,所以我亦都決定唔好講畀人聽,因為我唔想其他人唔知用咩方法嚟諗我,你都知道(傳媒)會寫到你好似就嚟唔得咁,啲讀者睇到:「哎呀,佢cancer呀,可能唔得嘞!」跟住過兩年,無事喎,我覺得對大家都唔好,不如就唔好提、唔好嚇人嘞。

李司棋毫不脫節,隨身帶備兩部不同牌子電話,近年更熱愛玩IG,不時自拍又分享生活點滴。
李司棋毫不脫節,隨身帶備兩部不同牌子電話,近年更熱愛玩IG,不時自拍又分享生活點滴。

爆唔續約無綫原因:「唔想兩三個月冇得瞓﹗」

記:仲有咩角色想做?係咪永不言休?
李:我依家無再(同無綫)簽合約,係因為我覺得我實在係唔能夠再因為一套劇,而有兩、三個月每日都瞓好少,我覺得係時候要選擇一下我要做啲咩,個工作唔好太過heavy。但係我做㗎,如果有好好嘅角色、夜晚畀我瞓番覺,我唔係瞓好多啫,我瞓六個鐘頭,係咪都應該呀?每個人都應該有睡眠,第日先至做到嘢。

16年出席毛記電視的《萬千呃Like賀台慶》出場時問台下觀眾「肚唔肚餓?」、「要唔要煮碗麵你食?」令台下爆笑。
16年出席毛記電視的《萬千呃Like賀台慶》出場時問台下觀眾「肚唔肚餓?」、「要唔要煮碗麵你食?」令台下爆笑。
睇返拍《珠光寶氣》時幾個女都已經離巢,司棋姐表示「無咩感慨嘅,我自己都離開過」。
睇返拍《珠光寶氣》時幾個女都已經離巢,司棋姐表示「無咩感慨嘅,我自己都離開過」。

點名讚黃翠如、陳展鵬

記:有無欣賞嘅後輩?
李:我一路都好鍾意(黃)翠如、香香(岑麗香)、(陳)敏之,好多個都好好,有時合作之後會鍾意佢哋,龔嘉欣都好好!
記:男仔呢?
李:我鍾意展鵬!展鵬好乖㗎,展鵬好小心做人㗎,同埋佢幾攰都好,工作擺喺佢面前,佢就向前行,我覺得佢好唔話得,真係好攰㗎,佢又要拍打戲、又唔夠瞓,同埋佢嘅生活係非常之乾淨,唔係飲酒呀、四周蒲去癲呀﹗

李司棋與陳展鵬分別在《心路GPS》、《巨輪》、《叛逃》合作,兩度飾演母子。
李司棋與陳展鵬分別在《心路GPS》、《巨輪》、《叛逃》合作,兩度飾演母子。
呢一幕都超級經典⋯⋯
呢一幕都超級經典⋯⋯
李司棋18歲參選1968年度香港小姐競選,並在「香港公主」組別獲得冠軍,繼而晉身演藝圈。
李司棋18歲參選1968年度香港小姐競選,並在「香港公主」組別獲得冠軍,繼而晉身演藝圈。
李司棋在2010年獲無綫頒發「萬千星輝演藝人大獎」。
李司棋在2010年獲無綫頒發「萬千星輝演藝人大獎」。

 

 

讀者留言