張繼聰又一城停車場出唔到閘 尷尬拉龍阻住地球轉
揸開車嘅你一定懂，因為每個人都必定試過，無論有心定無意，阻住個地球轉搞到其他車拉晒龍一定冇人尷尬得過司機本人，呢一日就輪到人夫張繼聰。
撰文、圖片：東方新地
張繼聰沉迷復古電單車周街去
張繼聰呢排受疫情影響開工少咗，時間多咗，即重拾兩個轆興趣玩電單車，有時仲會二人世界帶埋老婆謝安琪出去遊車河。不過身為一家之主，尤其呢排係非常時期，一家大細買嘢採購重任都落晒喺人夫身上，就唔係時時都有得揸兩個轆咁瀟灑，日前見佢揸咗私家車去又一城shopping，點知咁就出事。
買完嘢如常做完泊車優惠落停車場攞車，點知駛到閘口位拍咗幾次卡都唔成功，惟有嗱嗱聲call職員。喺呢種情況，雖然當事人唔想阻住大家，職員又已經極速現身溝通幫助解決問題，前後加埋其實都只不過十分鐘，但係話晒都係九龍市區其中一個最大型嘅商場，條車龍瞬間由閘口拉到轉晒彎打晒蛇餅咁，後面排隊嘅司機雖然未至於響安嘈吵，但空氣中瀰漫住不耐煩嘅氣氛就梗嘅，而坐喺座駕心急如焚等職員嘅張繼聰亦好無奈頭耷耷，尷尬到裂！
