feat_1188_14

獨家直擊「顧家男」森美綿羊仔出動 擁半億身家認同「有錢身痕」

等到頸都長埋,森美(梁志健)首次擔正男一的無綫劇《過街英雄》留倉兩年終於出街,做老鼠俠發鼠威令森美更加入屋,唔好睇佢做戲搞笑平時言行又幽默,對住結婚廿年的索老婆Veronica(陳雅嫻),森美無出軌紀錄,克盡己任守夫道,被封圈中絕種好男人!

撰文、圖片:東方新地

森美自爆所有收入上繳 對錢銀無概念

一家四口住廣播道相連豪宅的森美,被指身家過億,但他從不知自己戶口有幾多個零,個個月出糧都全部上繳,一毫子私己錢都冇。森美除供養父母同供樓外,仔女供書教學費多多都唔夠,手揸財政大權的索妻只叫他專心工作,唔使旨意諗退休。近年森美的唯一嗜好是與張繼聰等三五成群玩古董電單車,要享受男人的浪漫,就要努力賺錢求老婆放水買車,他認為男人有錢就身痕,為箝制男人之邪念,冇錢出去拈花惹草,老婆揸緊條數就是萬全之計,森美咁講不無道理,點解唔早啲教吓佢個前商台同事細So(蘇耀宗)呢?

森美與太太Veronica結婚廿年生活低調,去年中森美於社交網上載與太太蜜遊日本的照片,絕無僅有地放閃。
森美與太太Veronica結婚廿年生活低調,去年中森美於社交網上載與太太蜜遊日本的照片,絕無僅有地放閃。

由商台DJ變成全能藝人,森美的努力及付出有目共睹,多年來太太Veronica在背後默默支持他,為他打理好頭家,成為最強的後盾,而森美對太太的回報就是百分百安全感,把身家及財產拱手奉上給太太,讓她成為自己生命中最重要的女人。很難想像堂堂大丈夫身上仙都唔仙,但森美卻認為太太掌權利多於弊,他說:「以前我出糧係畀晒啲錢阿媽,自從結婚生咗小朋友,我就畀晒成份糧太太,呢個係對太太嘅一個肯定同安全感,我都係正常男人,有錢就會身痕就會花喺愛情上,為咗箝制自己冇得出去搞搞震,太太keep錢係有好多好處。我真心唔知自己有幾多錢,呢幾年我成日問太太,我究竟有幾多身家,想計劃吓幾時可以退休,佢同我講:『睇過喇!冇得退休!仔女讀書要使好多錢!』我好樂於享受呢種生活方式,做嘢為咗開心,其他管理財政嘅嘢交晒畀太太,我對錢銀理念唔強烈。」

近年森美愛以綿羊仔代步,不過這日穿上窄身西裝配綿羊仔,非常格格不入。
近年森美愛以綿羊仔代步,不過這日穿上窄身西裝配綿羊仔,非常格格不入。
森美的時裝觸覺比較特別,平時著衫都偏愛花喱碌,見他踎低揀領呔,最後拎住條花花呔襯來襯去,搞足成個鐘,真姿整。
森美的時裝觸覺比較特別,平時著衫都偏愛花喱碌,見他踎低揀領呔,最後拎住條花花呔襯來襯去,搞足成個鐘,真姿整。

獨家直擊「顧家男」森美綿羊仔出動 擁半億身家認同「有錢身痕」

森美為養家死慳死抵,專誠揸車去尖沙咀一間大劈價的時裝連鎖店,全場6折又真係好吸引嘅!
森美為養家死慳死抵,專誠揸車去尖沙咀一間大劈價的時裝連鎖店,全場6折又真係好吸引嘅!

迎接夫妻第三個七年之癢

生活健康家庭至上,森美被封絕世好男人,對於這個稱號他卻謙虛說受之有愧:「真係擔當唔起,我都曳,我都係正常男人,唔係一個好老公。兩年前我喺日本拍《森美旅行團》見到雙彩虹,當時因為太太唔喺身邊冇得一齊分享美景而感觸落淚,之後我畀太太鬧:『依家啲人成日都話你對我好好,你快啲出去澄清呀!』我自問唔識點做好老公,有六、七年有情緒病,脾氣差又易忟憎,講嘢又硬繃繃,太太做錯少少嘢我會好執著,覺得佢錯就係錯,會話咗佢先,係咪唔好先?我畀晒啲錢佢管,其實都係為自己好,都話有錢會身痕,有管束好啲,佢就係我嘅緊箍咒。」

兩年前森美在節目中見到雙彩虹掛住老婆掛到喊,點知事後畀老婆鬧爆製造假象,仲叫佢公開澄清自己其實唔係好老公。
兩年前森美在節目中見到雙彩虹掛住老婆掛到喊,點知事後畀老婆鬧爆製造假象,仲叫佢公開澄清自己其實唔係好老公。
家有幾架愛車,但森美這架粉藍色綿羊仔曝光率最高,這日揸車由廣播道去九龍城買餸,外賣仔又出動。
家有幾架愛車,但森美這架粉藍色綿羊仔曝光率最高,這日揸車由廣播道去九龍城買餸,外賣仔又出動。

獨家直擊「顧家男」森美綿羊仔出動 擁半億身家認同「有錢身痕」

疫情期間全家一日三餐大都在家解決,森美話太太成日點佢揸綿羊仔去買餸,包冇塞車,這日接到老婆密令要去買魚蛋、豬肉同麵,蒲慣街市的森美超額完成。
疫情期間全家一日三餐大都在家解決,森美話太太成日點佢揸綿羊仔去買餸,包冇塞車,這日接到老婆密令要去買魚蛋、豬肉同麵,蒲慣街市的森美超額完成。

明年即將迎來第三個七年之癢,森美結婚廿年與太太恩愛如昔,其夫妻相處之道原來深受父母影響:「我係學我爸爸媽媽嘅!佢哋有個嗜好一齊學跳舞,跳咗十幾年仲周圍飛去比賽,大家有共同活動同目標,我就跟太太去學騎馬,去啲政府公眾騎術學校又唔貴;至於生活方面,爸爸教我對太太凡事都忍讓,都係傾多啲偈囉!我係比較黐身嘅,成日都keep住send短訊畀佢,總之就溝通多啲啦!」

森美話父親教落,要維繫夫妻感情就要有共同興趣,所以他早年已開始跟太太Veronica學騎馬,投其所好。
森美話父親教落,要維繫夫妻感情就要有共同興趣,所以他早年已開始跟太太Veronica學騎馬,投其所好。
森美表示真心唔知自己有幾多身家,而太太 Veronica就話對仔女讀書極度要錢,叫森美死咗條心唔好諗退休。
森美表示真心唔知自己有幾多身家,而太太 Veronica就話對仔女讀書極度要錢,叫森美死咗條心唔好諗退休。
森美近年愛上皮包鐵,日前駕著價值十萬元的八十年代古董 Harley Davidson前往西貢白沙灣,型到爆。對於兩年內擁有四部電單車,森美話全部都係老婆放水先有得買。
森美近年愛上皮包鐵,日前駕著價值十萬元的八十年代古董 Harley Davidson前往西貢白沙灣,型到爆。對於兩年內擁有四部電單車,森美話全部都係老婆放水先有得買。

獨家直擊「顧家男」森美綿羊仔出動 擁半億身家認同「有錢身痕」

森美的車腳包括張繼聰同張振朗,每個星期日晨早都會約埋鍊番轉,仲會襯晒衫影男神相,不過到中午12點一句「夠鐘交人」 ,大家就乖乖散會返屋企。
森美的車腳包括張繼聰同張振朗,每個星期日晨早都會約埋鍊番轉,仲會襯晒衫影男神相,不過到中午12點一句「夠鐘交人」 ,大家就乖乖散會返屋企。