烈火雄心

《烈火雄心III》戲份大減仲昏迷10集!揭王喜淪為大配角同鄭嘉穎有關?!

說到TVB的經典劇集,現時深宵重播的《烈火雄心》系列一定是其中一套,每次的重播都會成為網民們的熱話,無論是演員,還是劇情的畫面都十分高質,當中以劇中的主角王喜到現在也深受網民們的歡迎!不過,《烈火雄心》、《烈火雄心II》都係由王喜擔大旗做男主角,但去到《烈火雄心III》作為三朝元老的王喜卻戲份大減淪為大配角,反而鄭嘉穎孭重飛做男一,戲份之多遠超王喜,原來當中有不為人知的原因!

 

撰文:東方新地 圖片:新傳媒圖片、TVB劇集截圖王喜ig

《烈火雄心II》第一、二輯 王喜擔大旗

深宵神劇時段早前已播完《烈火雄心》,依家播緊《烈火雄心II》,兩輯都係由王喜擔大旗做男主角,但去到《烈火雄心III》王喜由《烈火 1》飾演的「駱天佑」到《烈火 2》的「紀德田」,一直深受觀眾歡迎!

烈火雄心

{"IPTC-DATA":"NMG","data":{"photoID":2107904}}

《烈火雄心III》淪配角

但到《烈火雄心III》中,飾演「阿牛」的王喜在第12集因為在火場為救小女孩而發生意外導致昏迷,直至22集才醒過來,由元老演員淪為大配角,相反飾演「 Rex」鄭嘉穎就孭重飛,其實當時不少網友話冇王喜就罷睇!

王喜:鄭嘉穎喺樂易玲旗下

其實當時有指二人在戲內戲外鬥到出面,唔止多次被記者影到在鏡頭後零交流。當年有報道指鄭嘉穎同高層樂易玲關係相當好,鄭嘉穎怕在劇中被王喜搶晒鏡,曾向樂小姐扭計要求加戲份。對此,王喜當時接受傳媒訪問說鄭嘉穎是樂易玲旗下藝人,又自嘲「我只係喺旗邊啫!」那邊廂鄭嘉穎回應話自己作為演員,只是一隻棋子,收到劇本想點拍就點拍,仲話詳情叫記者問番監製。所以傳聞真假,不得而知!

《烈火雄心》系列播出 屢遇大環境變遷

王喜在唔少網民心目中係有情有義、好正氣同敢言嘅藝人。回顧2016年王喜接受本刊專訪,曾大談事業及同圈中人的關係,王喜當時認為自己的入行路順利:「作為演員好順,作為一個冇受過正統訓練、冇豐厚人脈、唔係星二代嘅一個其貌不揚嘅人嚟講,非常順,機會好似不斷咁嚟,但有我稍為收視好啲嘅劇又咁啱每一次都係遇着好大環境嘅變遷,96年我開始做演員遇上97回歸問題,大家人心惶惶,所以冇乜後續嘅嘢,到《烈火雄心》就遇着金融風暴,02年《烈火2》出街,03年就沙士,於是乎個劇更好都冇用,出面個市冧咗,08年《烈火3》遇着金融海嘯,大家都冇心機做廣告,每次稍稍比較多人認同嘅作品出現,我都唔會有後續嘅廣告、代言或者電影,所以演員路係咪行得順,好順,但係咪唔順,亦都係唔順,呢個睇運,冇辦法,要認嘅。」

感激曾勵珍畀機會 樂易玲對佢冇影響力

問到王喜覺唔覺得自己嘅事業成敗係咪在於曾勵珍、樂易玲,佢話:「事業成係,事業敗唔係。事業成如果唔係曾勵珍俾機會我參演《緝私群英》,唔會有王喜呢個演員,呢個無疑係事實,至於樂易玲,對於我演員路上其實冇乜多大嘅影響,除咗08年我去珠穆朗瑪峰,拍奧運聖火出現高山症再碌落山死唔去,最尾都係我自己一個人返嚟,機場冇人接,我負傷自己去法國醫院驗傷之外,我諗樂小姐喺TVB暫時都未有一啲舉動對我直接有影響。」

 

主角淪配角 拍《天天天晴》嘗人情冷暖

離開TVB前,有冇覺得冇之前咁受重用?王喜話:「擺咗我落《天天天晴》做一個冇乜對白嘅角色,我又唔覺得叫唔重用,俾咗個好好嘅lesson我,你知排rundown永遠係男主角排第一位,最唔等使嗰啲就排最尾,咁多年嚟我都係排第一位,佢令我喺最尾嗰刻可以排到最後一個,於是乎服裝阿姐俾嘅態度同面口又完全唔同,咁幾好吖,俾咗個好全面嘅機會我感受到唔同嘅對待,我覺得係好好嘅訓練。」

「唔係我去揀呢個行業,係呢個行業揀咗我。」

眾所周知,王喜入行前做過警察,又做過演員及電台DJ,問佢有冇覺得自己入錯行?王喜笑言:「冇話係咪入錯行,我離開警隊,有一啲原因,但唔再講,跟住入電台,係張承勷先生做總監,但當周禮茂先生take over做總監,有佢描繪嘅另一個藍圖,我唔能夠fit in咪走囉,嗰時面對97,我想搵工轉行都好難,只能夠每晚做一集《周末任你點》維持我嘅生計,所以我食咗九個月麵包同即食麵。嗰九個月由好有信心搵到工,到慢慢消磨你嘅意志,之後發覺只要個電話響,唔理Pizza Hut又好,肯德基又好,總之求職過有音訊都會即刻去做,但係好死唔死電話響,曾勵珍打嚟,咁咪成為演員囉!所以唔係我去揀呢個行業,係呢個行業揀咗我。」

現實生活中,王喜都是一樣的英勇,在入行前是皇家香港警察,當警察時的王喜奮不顧身的勇闖火場救人,這件英雄時更列入警隊的10件英雄事,並輯錄成書,話說王喜89年仲做緊警察,有日一名兇徒圖謀殺警,喺彌敦道一幢大廈13樓升降機門外兩側堆放易燃物品及堵塞走廊兩端,之後報警謊稱上址有人爆竊,一名警長及四名警員到場調查時身陷火海,咁啱王喜喺附近巡邏即刻衝上去現場勇救同袍。而事件直至2010年出書才曝光,可見王喜低調的性格!近年,王喜亦有不少「救人」事蹟被網民放上社交網絡,如在遊行中看到有人暈到,立即上前進行急救,不少網民表示欣賞王喜低調做實事的風格!

「朋友有難就唔可以唔幫手」

講到同陳志雲,王喜又點睇二人之間嘅友情呢:「我哋喺TVB一齊做嘢,我係演員,佢係行政人員,盡量唔想俾人知我哋識嘅,因為會令人誤會佢會有偏幫,作為朋友我唔想連累佢,但直至到呢單case(涉貪案官司),因為我以前經常喺法庭,所以我明白到上法庭被accuse(指控)嘅時候,個心理狀態係好差,有個熟悉嘅人喺身邊會安心啲,同埋佢係需要一個人幫佢開路嘅。」講到唔少網民都覺得王喜為人好有情有義,他直言:「媽媽教嘅,朋友風光嘅時候,就唔好行咁埋,費事俾人話你黐人嘢啦,朋友有難就唔可以唔幫手。」但與此同時陳志雲身邊多人趨炎附勢在他落難時變臉,身為好友的王喜都覺得很現實:「有啲我咪以後唔睬佢囉,我都俾某啲人告誡:『呢個人喺陳生落難嘅時候露出原形,關你咩事啫?你使乜同佢反面?』但我話我冇辦法同呢啲人相處,佢可以咁對陳生,亦都可以咁對我,呢啲咁嘅人,死開啦,我第一時間將佢電話delete咗!」

 

愛簡單平實生活 勇敢面對低潮期

在娛樂圈,藝人收入向來都唔穩定,王喜說只要唔太大使,收入其實係足夠應付生活開支,他又表示:「攞番雜誌library啲相咪反映到我生活囉,應該係喺茶餐廳出入,四十歲前都喺海灘曬太陽,自從俾佢哋發現得多之後,連呢個唔使錢享受日光浴嘅娛樂都冇嘞!你睇吓喺雜誌library我有冇去要使費先入場嘅地方,好似酒吧?應該就冇咁嘅record。」講到低潮期,王喜認為要靠自己去捱過:「咪慢慢過囉,所謂低潮其實得三類,經濟上、心理上、情感上,如果係經濟上,咪慳啲使囉,搵工囉,盡量唔好問人借,千祈唔好返屋企攞,自己盡量去拓展從來未涉足過嘅範疇,勇敢離開熟悉嘅環境去做啲陌生嘅嘢,先至有機會攞到新嘅嘢返嚟。意志上嘅低潮只能夠去捱,唔會有人幫到你。」