feat_1186_10

唔一定農曆七月先會撞鬼!電視城靈異實錄

電視城被形容為明星演員嘅少林寺,個個捱完練就一身好武功然後才可以愈走愈遠發光發熱……其實練嘅唔止係演技、硬淨、待人處事同肯捱肯做,仲可以練大個膽㖭!電視台地方大暗角多、演藝行業屬偏門禁忌又多,拍攝題材包含生死亡靈踩界都唔少,新鮮熱辣就有李施嬅深宵刨劇本撞鬼事件!趁住踏入農曆七月鬼門關大開陰氣至重,就等電視台出身嘅巨星演員同大家一齊講吓喺電視城入面以及拍劇期間曾遇過嘅怪事!

撰文、圖片:東方新地

李施嬅刨劇本撞冇面女鬼

去年大熱嘅《 金宵大廈 》叫好又叫座,自然食住個勢原班人馬拍續集。劇情奇幻、造型復古、拍攝場地都專揀歷史悠久古舊地方,因此怪事連連。第一輯拍攝時陳山聰爆 PA 見到白影飄過,今次續集女主角李施嬅夜半獨自刨劇本歎杯紅酒影張相,酒杯上驚現冇面「 姐姐 」倒影,李施嬅日前喺 IG 分享靈異相片,新鮮熱辣,唔少網友睇過後大呼心寒!

唔一定農曆七月先會撞鬼!電視城靈異實錄

相中可見紅酒杯身驚現類似「人形」倒影,但當時李施嬅喺屋企刨劇本,身邊根本冇人。
相中可見紅酒杯身驚現類似「人形」倒影,但當時李施嬅喺屋企刨劇本,身邊根本冇人。

歐陽震華被拍大髀

男休息室嘅受嚇者仲有歐陽震華:「有次日頭未夠鐘入廠,就去咗男藝員休息室瞓覺。點知突然畀人拍醒,我好清楚聽到一聲大力拍大髀嘅聲,紮醒咗見到冇人、自己又唔郁得,可能夠鐘入廠,嗰啲嘢想叫醒我!都聽過有工作人員話有細路仔嘛,但我就未見過,嗰次之後都冇再入過去,咪搞!」

唔一定農曆七月先會撞鬼!電視城靈異實錄

滕麗名移形換影

當年《 真情 》劇組拍攝嘅舊清水灣電視城6號錄影廠出名位置最入、最陰森,6廠女廁更加係全城「 陰中之陰 」,好多藝員都避之則吉,不過當年新加入劇組嘅阿滕有次人有三急,惟有硬住頭皮衝入去6廠女廁解決。該女廁共有4格、4個洗手盆和4面鏡子,明明就近揀第一格廁所解決,出嚟用第1個洗手盆洗手,滕麗名話洗手時竟然發現自己個樣出現喺最後一塊鏡中,嚇到標冷汗!

唔一定農曆七月先會撞鬼!電視城靈異實錄

姚子羚撞冇腳女鬼

03年拍攝《 棟篤神探 》夜戲,姚子羚試過一個人喺化妝間,但就見到另一個灰色 T 恤長髮女仔:「 驟眼睇佢唔似藝員,又唔似化妝阿姐,以為係生面口臨時演員。我冇理就瞓一陣,突然感覺寒風陣陣,我就紮醒咗,跟住我支唇彩跌喺佢附近,我去執時唔見佢雙腳,起初我以為佢雙腳瑟縮喺凳上,我睇真啲,佢冇腳之餘,原來個樣模糊到不見五官。當時我勁驚,即刻跑出走廊比較光猛地方!」

唔一定農曆七月先會撞鬼!電視城靈異實錄

林峯 被消失

男藝人們唔好彩喇,撞正男休息室係電視城中最熱門撞鬼地點,離咗巢嘅林峯都試過:「男休息室好邪門,試過有次入去瞓覺,唔明點解夠晒鐘 PA都冇叫醒我。點知佢話入到去見我唔到喎,咁邪!自此我就唔敢再入休息室瞓覺。」此外,林峯話佢喺屋企都試過被鬼壓,仲見到個人影同一陣煙、仲要講國語㖭,好驚驚囉!

唔一定農曆七月先會撞鬼!電視城靈異實錄

張家輝 陰森口哨聲

張家輝亦曾於清水灣電視城遇上口哨鬼,事發於半夜時分,當時佢正於 四廠趕拍劇集《騙中傳奇 》,突然成組人聽到廠內傳出口哨聲,即使拍攝期間亦未停過,但拍完之後睇重播,卻聽不到之前嘅口哨聲,令在場所有人都毛管戙!

唔一定農曆七月先會撞鬼!電視城靈異實錄

苗僑偉見鬼畀鬼責

電視城以外,有時外地拍劇入住酒店都好驚嚇,三哥苗僑偉話試過去馬拉拍劇,酒店廁所不斷傳出怪聲,令佢冇覺好瞓。後來補眠至下午四點,又被黑影壓住,動彈不得,嚇到佢當晚要同保鑣孖鋪壯膽。點知更可怕嘅事陸續有來,三哥瞓到第二朝發現保鑣不知所終,一轉身想起身嘅時候,又被鬼壓,更見到個衣衫襤褸嘅伯伯踎喺原先保鑣瞓嘅位置望住佢!

唔一定農曆七月先會撞鬼!電視城靈異實錄

鄭伊健 八個人去九人返

一向大唔透又貪玩嘅鄭伊健,當年試過約一班幕後工作人員黃昏時分入電視城打 war game。八個大男孩喺民初街玩完離場之際,領隊鄭伊健數人頭數來數去都係九個人,當時有人以為佢玩嘢嚇鬼,不過換著第二個數,又係數到九個人!另一次伊健喺電視城等埋位期間瞓喺地氈上休息,突然有盞燈由高處跌正喺佢身邊。伊健事後表示:「 發生意外後,有位有陰陽眼嘅同事話之前見有個著住小鳳仙裝嘅女人坐

喺燈槽上,盞燈冇整傷我,可能佢同我玩啦,不過我以後入廠都唔敢
唔拜神!」

唔一定農曆七月先會撞鬼!電視城靈異實錄

locker門離奇打開

去年黎諾懿主持無綫節目《 懿想得到 》請嚟老友鄭伊健重遊電視城舊地,伊健提起舊時剛進 TVB, 獲派locker鎖匙及當時嘅鎖匙號碼往事時,背後啲 locker 門突然離奇打開,然後伊健又乘機分享舊電視城出名猛鬼,據悉該集播出後連高層都有微言話怕影響藝人心理。而黎諾懿就話男更衣室鬼古聽得多,不過自己就未遇過,今次係第一次親身感受 locker 門自動彈開。

唔一定農曆七月先會撞鬼!電視城靈異實錄

吳卓羲 目睹鬼上身

03年拍劇集《 英雄•刀•少年 》,吳卓羲剛剛成名擔正做男主角,捱更抵夜焗住喺男休息室小睡,咁就出事:「 因為趕戲日接夜咁拍,我同成班訓練班同學都喺休息室瞓覺。點知瞓瞓吓,隔籬個同事突然講嘢,好似鬼食泥咁,但聽唔明佢噏乜,最恐怖嘅係佢把聲變咗第二個人把聲,跟住其他人都畀佢嚇醒,成班人驚到雞飛狗走!」另一次更驚嚇,大約凌晨三、四點同一男同事喺休息室瞓覺,睇住有個細路喺門口方向走入嚟,但當時度門係閂咗㗎,佢同男同事勁驚,最後合埋眼數三聲一齊衝跑出休息室!

黃宗澤 房燈唔著又著

Bosco 有次去馬來西亞怡保拍攝劇集時入住酒店尾房,插入房卡後其中一盞燈一直未有著燈,當地保鑣察覺有異樣,就企咗喺房門唔肯入去。傻更更嘅 Bosco 不以為然行入房,隨即感到周身唔聚財。直到佢行近床邊時,本來開唔著嘅房燈又突然發光,Bosco 登時回頭望一望保鑣知道唔對路,嚇到立即離開房間,匆忙間仲留低埋啲行李㖭!

唔一定農曆七月先會撞鬼!電視城靈異實錄

蕭正楠與林夏薇 攝錄機現雪花

為咗拍攝劇集《 十二傳說 》,蕭正楠同林夏薇要去到新娘潭、達德學校等都市傳聞鬧鬼勝地拍攝,二人異口同聲話受環境同氣氛影響,拍攝全程都覺得氣氛詭異感覺好寒,明明電話收到訊號,但係攝錄機屏幕就離奇接收唔到訊號,變咗雪花。蕭正楠話:「 以前啲儀器好少失靈,嗰晚熒幕受到干擾,大家都唔敢出聲,都幾怪異!」即使每日裝香求順利,但劇中演員韓馬利嘅老公去新娘潭探班時,不幸跣腳受傷,要抖足幾個月呀陰功!

唔一定農曆七月先會撞鬼!電視城靈異實錄

孫慧雪 細路玩波子

孫慧雪都試過喺《 恐怖在線 》分享親身經歷:「 男休息室出名好猛鬼,好多男同事話見過有小朋友,我喺女休息室都試過!有晚拍到好攰一個人喺女休息室小休,突然間聽到有細路玩波子,嗰啲『 啲啲啲 』波子聲由遠至近到身邊,我即時彈起身全身毛管戙!又試過喺睡夢中突然聽到啪一聲巨響,原來身旁一張休息長凳喺冇人冇風嘅情況下自己倒下,所以我以後盡量都唔去呢間休息室。」

唔一定農曆七月先會撞鬼!電視城靈異實錄

湯鎮業與楊明 冇拜神即炒車

湯鎮業與楊明於17年拍《 心理追兇 MIND HUNTER 》時,有指開鏡前漏咗拜神裝香儀式,搞到怪事同意外頻頻發生。楊明拍攝時炒電單車被送院、另一同事拍劇跣親尾龍骨,都搞到要做物理治療有排醫,湯鎮業有感而發:「 為咗拍劇斬咗啲百幾年老樹,但事先又冇拜神,所以真係邪!」

唔一定農曆七月先會撞鬼!電視城靈異實錄