緊張大師上身!黃子華新戲《乜代宗師》虐待女神 劉心悠做打女增肥曬黑搏到盡

黃子華去年完成26 場棟篤笑《金盆𠺘口》後,秘密打造今年賀歲片《乜代宗師》,今次子華神包辦編導演員一腳踢博到盡,女主角劉心悠仲慘,女神變打女為演女拳王任由子華神虐待,日日開工打到飛起!

撰文、圖片:東方新地

黃子華花十幾年物色女主角劉心悠為男神增肥曬黑

劇本搞足十幾年,原來他心目中的女主角,要有女神級氣質,仲要肯博肯捱,他三月宣布開拍賀歲片時就透露:「其實呢部《乜代宗師》十幾年前已經想拍,不過一路搵唔到女主角,所以拍唔成!」而今次心悠BB為拍子華賀歲電影的確瞓晒身,為演出女拳王角色進行地獄特訓三個月,要增肥練大隻仲要曬黑,相當刻苦。

自編自導自演壓力大 要求心悠BB做打女棄用替身

據知情者透露:「咪睇子華神每次出嚟都咁識搞氣氛,就以為佢做嘢會好輕鬆好鍾意講笑,其實佢係個緊張大師,一做嘢就超級投入,今次係佢十七年後再次自編自導 自演,壓力好大,每個細節都力求完美,心悠BB要喺戲入面做傳奇女拳手,子華唔想用替身,心悠BB亦唔敢偷懶,幾個月前已搵咗個拳師學拳,為咗打得有力度,佢仲好勤力操fit,做好多運動鍛鍊體能!」

緊張大師上師 尖沙咀街頭拍外景唔識笑

臨近煞科,日前,子華神聯同心悠BB在尖沙咀街頭拍外景,緊張大師上身的子華神全程眉頭緊皺,對住女神都唔識笑,走勻全場做監督,不停指揮外套內是緊身小背心的心悠BB,來回拍攝搞到頭髮亂飛,辛苦晒心悠女神。

讀者留言