6月人獸鬥 非常盜大戰魔獸

6月人獸鬥 非常盜大戰魔獸

 

2016年好戲浪接浪!今年都可算係大片年,幾乎每個月都會有非看不可的電影。觀眾早前先睇完《美國隊長3︰英雄內戰》仲有《變種特攻︰天啟滅世戰》,今個六月又有兩大猛片打對台,就係《非常盜2》同《魔獸爭霸︰戰雄掘起》!一套係首集取得成功、以奇幻魔法載譽歸來;另一套就係由殿堂級電腦遊戲改編而成,全球機迷期盼多年的大作。入場睇邊套好?Why not both?

 

延伸閱讀:

茶記激凸妹性感圖集

茶記激凸妹起底 原來好猛料

《非常盜》於2013年上映時,在外界不看好下驚喜跑出,全球錄得逾三億美元票房。電影故事峰迴路轉兼出人意表,帶來無限驚喜。由四位魔術師組成的「四騎士奇藝坊」,成員憑藉高超本領劫富濟貧,當中的魔術表演睇到觀眾嘖嘖稱奇,大呼過癮!

第一集中「四騎士奇藝坊」劫富濟貧並智取FBI,每每胸有成竹有計劃地將警方玩弄於股掌之中,但今次卻風水輪流轉!佢哋隱世一年後,被富商Walter Mabry要脅執行一項不可能的奪寶任務,更淪為眾矢之的被黑白兩道追殺。四騎士將作出一個史無前例的魔術大匯演,行動目標直指神秘­的幕後黑手!

上集四騎士的表演由洛杉磯開始,到紐約結束,而今集其中一個景點就係我哋好熟悉的澳門!話說澳門與魔術其實早有淵源,因為歐洲魔術當年就係由葡萄牙人帶到亞洲,今次電影中出現的「翁氏魔術專門店」(Iong’s Magic Shop),在澳門就真有其店!

除咗一眾《非常盜》班底繼續演出,今集電影仲會有「哈利仔」丹尼爾域基夫!佢今次飾演富商兼電腦奇才Walter Mabry,仲會同四騎士鬥志鬥力。其實丹尼爾演哈利波特一角實在太深入民心,正如觀眾見到愛瑪屈臣都好自然叫佢做「妙麗」一樣,所以近年佢經常接演唔同角色挑戰自己,務求打破舊有框框。唔知今次會唔會有大突破?

仲有哈利仔,仲有周董!周杰倫繼2001年與薛夫洛根合演《青蜂俠》後,再度參演荷李活電影,為華人爭光!今次周董飾演的Li係澳門一間魔術道具店的老闆,掌握多個重要線索,係電影中的關鍵人物。話說周董原來係《非常盜》電影的忠實fans,而電影導演朱浩偉又係周董的fans,咁就自然一拍即合!

魔獸冧機迷

相較早前的英雄大片如《美國隊長3》或《變種特攻》,《魔獸爭霸:戰雄掘起》的聲勢無疑較弱,但呢部電影改編自風靡全球的電腦遊戲 -《魔獸爭霸》系列,宣布開拍真人電影後令全球無數玩家引頸以待,絕對不容忽視!

《魔獸爭霸》自1994年推出以來一直深受歡迎,其實2006年時已宣布會拍成電影,等咗足足十年,真係頸都長埋!今次電影以1994年推出的《魔獸爭霸1》故事為背景,電影的還原度相當高,除咗人類主城暴風城外,鐵爐堡、閃金鎮等著名遊戲的地點亦會一一重現。普通觀眾覺得新奇、壯麗,而機迷就肯定好懷念!

電影講述人類統治的Azeroth王國一直和平安定,而在另一個世界,原住民獸人 (Orcs) 卻要無奈逃離瀕臨滅亡的家園,去尋找新領域棲身。一道連接兩個世界的大門出現,令雙方都起了翻天覆地的變化!人類面對兇猛外敵,必須奮起保衛家園;獸人為求全族生存,不惜一切全力戰鬥。雙方領袖皆肩負著決定家人、族人和家園命運的責任!

《非常盜2》有台灣天王周杰倫加盟,《魔獸爭霸》亦唔執輸,邀得型男吳彥祖(Daniel)飾演大反派獸人「古爾丹」!不過觀眾在片中唔會見到佢個靚仔樣,甚至根本搵唔到佢!究竟點解呢?

落足眼力啦!

因為Daniel今次只係以動態捕捉的方式演出,以及替角色配音,就好似《阿凡達》、《變形俠醫》咁(但阿凡達同Hulk都仲認到個演員本人…)片中佢係一個機關算盡的獸人術士,沉醉於強大的邪惡力量「魔能」,仲會挑撥獸人族,大舉毀滅人類所居住的世界!

全文完