feat_1156_sikee

69歲李司棋享受人生選擇自由工作 少女心爆發做IG達人

心中是雨是晴,其實取決於自己的選擇同態度,現年69歲的李司棋,雖然經歷過兩段失敗婚姻,女兒葉子青又長居加拿大不在身邊,但她卻會自得其樂,近年緊貼潮流的她,熱玩IG生活寫意,打扮新潮入時還有著一顆少女心;在社交平台變潮人,司棋姐更是傳統女性,新正頭她亦忙於辦年貨炮製賀年美食,日前,她就專登到九龍城買金華火腿等賀年食品,熟晒門路去幫襯地道雜貨店唔出奇,最估佢唔到係69歲司棋姐打扮型格,披著小羽絨、手戴潮戒出巡,型過唔少少女,活得年輕充滿正能量!

撰文、圖片:東方新地

李司棋曾左耳突發性失聰 選擇自由工作唔再搏

18歲就當選「香港公主」入行的司棋姐,07年拍《溏心風暴》憑大契一角封視后,美貌同演技早就獲認同與肯定,近年拍劇只為過戲癮,17年獲金牌監製劉家豪邀請復出拍《溏心風暴3 》,拍劇期間卻突然左耳突發性失聰,加上長受耳鳴困擾,令她決定完劇後休息一段長時間養生兼享受人生,近年即使不停有監製敲門找她拍劇,她亦全部拒諸門外。

2017年拍 《溏心風暴3》時,司棋姐突然左耳突發性失聰,她撐住完成拍攝。

熱愛玩IG分享生活點滴 貼地出Po呼籲戴口罩

據知情者透露:「拍劇衝衝衝嘅時間一早過咗,司棋姐又做過視后,已經冇大野心,近年佢都係自由選擇工作,17年因為家豪哥出面邀請,佢先復出接拍《溏心風暴3 》,話晒當年《真情》善姨角色同《溏心風暴》大契都係家豪哥為佢打造;不過,拍《溏心風暴3 》無耐,佢突然左耳失聰,拍到後期真係好吃力,所以先決定拍完套劇畀自己放長假,雖然休息咗一排,耳鳴已經唔太嚴重,舊年做咗五場舞台劇,但TVB好多監製想搵佢出山拍劇,佢全部推晒,佢好清楚自己性格,一拍劇就瞓晒身,佢唔想再捱更抵夜,驚自己頂唔住!」

 

減產享受生活的司棋姐,近年非常活躍玩個人社交網,1 月 1日她就攞住酒同提子同粉絲隔空慶祝!
圈內圈外朋友眾多的司棋姐,早前又到中山探朋友,更在朋友的莊園留影。
雖然女兒葉子青長居加拿大,不過,獨居生活未令司棋姐感到孤單,閒時經常約圈內圈外朋友相聚,早前她就約咗老友羅蘭、周聰及關菊英敍舊。

減產享受生活 少女心爆發做IG達人

減產享受生活的司棋姐,近年更成為IG達人,自從17年開通個人IG帳號,她就經常更新同粉絲分享生活點滴,比唔少年輕藝人更緊貼潮流,經常潮牌上身外,更學少女擺長腿及撒嬌甫士,獲網民勁派Like。

司棋姐近年熱愛玩IG同大家分享生活點滴,活得愈來愈年輕的她,除咗打扮入時又緊貼潮流,早前更同大家一齊玩變小朋友Apps,時刻保持一顆少女心。

新正頭,司棋姐繼續活躍社交平台亦出動辦年貨,日前她就駕車到九龍城著名雜貨店買金華火腿等賀年食品,只見她入到舖頭同店員邊傾邊細心揀貨,當日司棋姐一身潮人小羽絨打扮,非常醒神搶眼, 活得精彩其實好簡單!

留港度歲的司棋姐,依足傳統習俗辦年貨應節,日前駕車到九龍城辦年貨,當日一身小羽絨更型到爆!
司棋姐自己揸車到九龍城的地道雜貨店辦年貨。
似乎同店員一早熟晒,司棋姐邊揀金華火腿邊同店員雞啄唔斷。

買完嘢,司棋姐趕住仲有下場。
打扮愈來愈青春的司棋姐,手上戴了多隻潮戒,打扮入時,銀包和鎖匙包都是桃紅色非常搶眼。

關鍵詞
李司棋