os_feat_1150_ckwan

C君自度愛的宣言冧天頤 自爆受黃子華感召決定結婚

農夫成員鄭詩君(C君)同拍拖五年嘅DJ女友黃天頤於上周五(13日)拉埋天窗,出名人緣好嘅C君出動星級兄弟團包括拍檔陸永、蕭正楠、黃翠如夫婦、洪永城等接新娘,而唐詩詠則客串出任大妗姐。C君喺接新娘時發表「愛的誓言」,更大大聲立誓:「做唔到就天打雷劈!」

撰文、圖片:東方新地

C君自度愛的宣言 姊妹團玩新郎考驗兄弟情

當日中午C君著上傳統馬褂,同一眾星級兄弟團到酒店接新娘,對於姊妹團提出要9,990萬,C君笑言:「你哋要呢個數,李嘉誠都娶唔到老婆啦!」最終C君以一封「開心大利是」順利過咗第一關!其後C君同班兄弟團要接受三個遊戲考驗,包括C君要戴眼罩口含唇膏為兄弟搽唇膏、兄弟嘴對嘴傳送心心膠片以及C君瞓地被口含餅乾嘅兄弟騎住做掌上壓,C君更慘被蕭正楠噴到成面餅碎㖭!最後當然係愛的宣言環節,C君一改傳統,表示自己所寫嘅「愛的誓言」與別不同:「天頤婚前一直都唔畀我叫老婆、太太,就算有人叫佢做C君老婆,佢都第一時間否認,強調只係我女朋友。不過過咗今日可以每日叫你老婆啦。一直以嚟好多新人都係讀愛的宣言,但係宣言係可以改或者唔算數,我自己度咗一段愛的誓言,如果做唔到就天打雷劈。」聽到老公自度夾雜文言文嘅誓言,黃天頤既感動又開心。

C 君按照傳統習俗,著上中式馬褂接新娘。
C 君按照傳統習俗,著上中式馬褂接新娘。
人緣好嘅C君有星級兄弟團包括陸永、蕭 正楠、黃翠如、洪永城等助陣
唐詩詠笑言做大妗姐難過拍戲講對白:「係新人要求我做大妗姐,好難 好驚,啲對白仲難過拍劇啲對白,又怕叫錯親戚名,講嘢又要押韻,啲兄 弟又難服侍,好彩最後都 OK 。」
當姊妹團收開門利是時,眾兄弟用銀紙包紙巾「裝假狗」,被 拆穿後蕭正楠搞笑話:「黃翠如得入面嗰包咋!」其後C君被 罰戴上眼罩口含唇膏為洪永城搽唇膏。
翠如望住老公蕭正楠咀嘴老友洪永城,唔知係咩感覺呢?

陸永:二人最襯係身高 C君自爆受子華感召結婚

一對新人於四季酒店筵開21席宴請親朋,現場布置有龍鳳刺繡,C君更邀得日本書法家題「幸運」二字作佈景板。圈中唔少紅星好友包括:黃子華、鄭裕玲、容祖兒、蔡卓妍、 謝安琪、張繼聰等均有到賀,當中喜宴稀客子華同Do姐更被安排坐埋 一齊,旋成為集郵對象全晚影唔停!期間一對新人聯同兄弟團現身受訪,陸永爆料:「佢哋真係襯,特別係身高,佢哋識咗20幾年,C君好細個就暗戀佢。」C君鬼馬話係明戀:「單戀咗十幾年終於可以拍拖唔通諗分手咩,梗想開花結果。黃子華曾經喺棟篤笑中講過搵到好相處嘅伴侶,諗到佢係唔會為你帶來唔開心,咁有智慧嘅人都咁講梗係要結婚。」C君話佢個「愛的誓言」,亦係參考黃子華棟篤笑嘅內容而寫!至於老婆黃天頤就話兩個人相處間中亦有嗌交,反而今次籌備婚禮時就完全冇,好神奇!兩公婆打算先休息幾日抖下,下年先至去度蜜月喎。

C 君引用最喜愛劇集《Friends》一句對白冧老婆:「黃天頤,點解我要同你結婚呢,因為『You make me happier than I ever thought I could be 』,I love you 。」
天頤掟花球,單身大妗姐唐詩詠都有去搶,期望快啲搵到個好歸宿。
Do姐喺IG上載佢同《男親女愛》舊拍檔子華,真夫妻蕭 正楠、黃翠如,仲有舊情人洪永城、唐詩詠「 3pair人」 嘅合照。
祖兒孖好姊妹阿 Sa 盛裝到賀。
謝安琪同老公張繼聰刻意前後腳入場。