抽水成癮！重溫林作出位「七」事

文：東方新地 ｜圖：林作IG、裕美IG、新傳媒圖庫

林作出位「七」事

第1事：抽死人水

林作從事保險業後，見電影《黑豹》男主角Chadwick Boseman因結腸癌併發症逝世，竟然叫大家記住買保險，當然畀網民鬧爆，即犯眾怒！

第2事：玩假結婚博出位

上年大除夕林作驚爆同女友裕美在家註冊結婚，二人着晒禮服影合照，但最後他就回應指，原來只是同保險團隊「玩吓嘢」，結婚一事並非真實。

第3事：裸跑找數

林作曾豪言美國總統大選如果拜登一方勝出，會「夜晚12點放工廣東道裸跑」，結果拜登順利勝出大選，林作初初想縮沙，到最後都有post裸跑片，但以「格仔」遮住下半身，惹網民質疑。

第4事：晒西裝炫富

林作經常在IG以西裝達人自居，曾花4萬多元購入一套意大利著名品牌Brioni西裝，即惹來批評炫富，又被指着西裝着到錯漏百出，更遭網友怒插：「着起龍袍都唔似太子」。

第5事：明踩舊愛麥明詩

林作曾出post指：「裕美真心靚過麥明詩好多，身材也更優勝。素顏顏值也絕對一流。絕非平平無奇，可謂波濤洶湧。」明踩舊愛麥明詩，呢番言論隨即被網民狂插零風度，醒目的麥明詩神回：「唔想中圈套！」

第6事：幫裕美搓胸

為咗宣傳豐胸霜，林作出手幫半裸裕美搽豐胸霜，網民怒轟佢行為猥瑣咸濕、教壞細路！最後，林作辯稱其實係一場戲，係隔空冇掂到裕美。

第7事：亂作話阿媽「跳舞群組」

疫情期間，林作亂作話阿媽係「跳舞群組」成員，好醒目咁返內地「風流快活」，令人以為阿媽有「特權」冇做家居隔離，後來林作知道玩大咗，先代母澄清︰「講笑咋，媽媽從未跳舞，扮下嘢抽下水。」