歐陽震華

TVB唔續約離巢反而賺更多?歐陽震華:1年收入等於喺無綫xx年!

於無綫出身的歐陽震華 (Bobby)係一線小生,喺唔少經典劇集擔正男一,仲被封為TVB收視福將㖭,地位超然!然而佢都有經歷過仲有唔少人生低潮!日前Bobby現身商台為Do姐鄭裕玲主持的節目《口水多過浪花》擔任嘉賓,大爆喺大台浮沉嘅日子及辛酸史!

撰文:東方新地 圖片:新傳媒圖片、微博

歐陽震華 被PA叫演冇對白嫖客

Bobby於節目中透露未紅前嘅點滴,他說:「曾經試過有個PA打嚟,佢話『喂,有個嫖客搵你做呀』我心諗嫖客都搵我做呀?問佢咁有無對白㗎,佢話『嫖客使乜對白吖,總之有水抽吖』,我話『吓,你當我咩呀?』我真係Cut佢線,咁樣反而好,以後唔使做嫖客,無呢啲電話。所以有時咩都啞忍吞咗去,未必一定係好事。」

 

無綫唔續約

經歷浮沉的日子固然唔好受,Bobby透露曾經有段時間萌生去意,但《壹號皇庭》的出現令他繼續留在TVB工作,唔講唔知,原來Bobby雖然有份演出《壹號皇庭II》,但原來佢拍完此劇後離開過無綫,但公司竟然未有主動跟他續約,Bobby說他當時有跟公司說想轉部頭約,但公司未有回覆他。

 

吸金力爆升

Bobby說,記得拍完《壹號皇庭II》後他約滿TVB,當日他離開時步出公司閘口,心想「咁就唔要我喇?」但他離巢後反而大開眼界,他說:「喺出面拍劇拍戲,嗰一年賺嘅係喺無綫10年賺到嘅錢。」

 

主動客串兩集《開心速遞》

Bobby說重返大台是因為公司開拍《壹號皇庭III》,最後雙方轉部頭形式合作。Bobby又提到近日返無綫客串兩集《開心速遞》也是他主動跟高層曾勵珍提出:「群姐 (許思敏 飾) 默默耕耘咗30幾年,佢好有心做戲,做我哋呢行好需要鼓勵,又或者當係獎勵啦,咁我返去就可以出師有名話『我返嚟同群姐做兩集啦。』大家都好開心。」

 

萬千星輝頒獎典禮2018》上,有大台福將之稱嘅歐陽震華以頒獎嘉賓身份出現大銀幕,引起全場拍手歡呼,Bobby話自己好耐無返過嚟,而家仲多次強調自己好耐無攞過獎,更多謝一眾TVB高層好似曾勵珍、樂易玲、余詠珊、杜之克等,多謝高層們畀機會佢。去到頒視后時,Bobby話自己早前去大陸做音樂節目:「我係唔需要審查,同埋我仲有巿場㗎!中央台都搵得我,所以阿杜生(杜之克),你咁多合拍劇,唔係一定要林文龍嘅(林文龍之前出演港陸合拍劇《再創世紀》),係,林文龍係靚仔,無可否認,佢靚仔,但係我忠心!我流住嘅係TVB嘅血,諗諗佢吖,樣嗰啲嘢,可以微調嘅啫。」講到咁,相信大家都知Bobby想返娘家啦!

最後Bobby仲話希望嚟緊佢可以有機會講得獎感受。由出場到離開,Bobby一共講咗至少6分20秒。雖然節目超時唔一定關晒Bobby事,但唔多唔少都有啲影響嘅!

歐陽震華客串《愛回家》群姐同對戲

處境劇《愛.回家之開心速遞》播出以來深受觀眾喜愛,劇中唔少角色都備受網民關注,好似「群姐」許思敏喺戲中出晒名鍾意「歐陽波比」(歐陽震華),但係只可以同Bobby仔嘅紙牌對戲,早前佢哋終於有機會喺劇外合體,為商場拍攝母親節特輯,但就有唔少網民希望佢哋可以喺劇中「團圓」。結果網民集氣成功將佢哋撮合,群姐唔使再對住紙牌做戲啦,歐陽震華以「祝枝山」角色玩穿越,登陸《愛.回家》再會群姐做對手戲!