【白色強人】郭田葰為高齡父母入行香港娛圈 棄醫生生涯甘願由零開始!

最強精選

TVB新劇《白色強人》出街一星期有多,憑劇情吸引及貼地成功吸引一班觀眾追劇!《白》雲集一眾唔少好戲之人鬥戲之餘,當中現年37歲嘅郭田葰(Marcus)喺現實中亦係一位醫生!今次佢喺劇集製作中更擔當專業,將自己從醫嘅經驗同其他演員開心Share!

撰文:東方新地|圖片:電視截圖、劇照

郭田葰棄醫生生涯

如果大家有睇TVB最近熱播新劇《白色強人》,未知有冇留意到劇中飾演急症室醫生林紹良(Don)嘅郭田葰呢?相信唔少人都知Marcus喺現實生活中係一名真急症室醫生,所以喺劇中名副其實係真正嘅醫生演醫生!

Marcus入行10年,可以話係「TVB御用醫生」,由民初劇30年代嘅醫生、到牙醫、手術科、婦科、急症室醫生,至今演過逾33次醫生角色!唔知佢過多十年,又會唔會可以好似盧宛茵咁入紙申請世界紀錄呢?

現年37歲嘅Marcus未入行前,於澳洲墨爾本蒙納士大學讀醫科,畢業後曾於當地醫院工作。由於佢曾經被老師大讚佢喺關鍵時刻依然能保持冷靜,而自己性格好動又鍾意同人溝通,所以最後選擇成為一名急診室醫生,於墨爾本Box Hill Hospital及Maroondah Hospital工作4年,救助緊急傷患者!

除咗醫科出身外,Marcus亦同時有進修心理學,而且仲識粵語、普通話、英語、印尼語、日語5種語言。讀書時期曾參加歌唱比賽獲獎,亦曾在澳洲墨爾本3ZZZ和3CW中文廣播電台每星期主持一個2小時節目,所以對天氣、時事、娛樂新聞及醫學常識可以話係難唔到佢!

為高齡父母入行香港娛圈

2009年,Marcus回港探父母時,因抱住玩嘅心態而報名參加TVB嘅香港先生選舉。當時Marcus以28之齡成為盛年組參賽者,更成功進入盛年組4強。雖然Marcus只獲得「現場最具人氣香港先生」獎項,但佢對演藝行業開始產生興趣,加上70歲父母希望佢留港一齊生活呢個重要原因,令佢最後決心放棄澳洲嘅高薪厚職,加入香港娛樂圈。

Marcus無論戲裏戲外都係個醫生,今次喺《白色強人》中更成為劇集幕後醫生指導,提供劇組唔少專業意見。最有趣嘅係,唔少女藝人都當Marcus係家庭醫生,就連Marcus都話:「最尷尬係問婦科問題,我估知道行內最多女星秘密嘅人就係我,但我好口密,咁係醫生職業操守。幫到人都好,又可以幫我重溫醫學知識。」

除咗演員外,Marcus亦擁有超過100個大型活動及晚宴司儀及主持經驗,於網上亦開設「郭家廚房」分享自家菜譜,而且亦有舉辦中西醫攻略講座。雖然有人會認為佢唔做醫生會浪費多年讀書心血,但Marcus反而覺得依家可以喺講座中嘅一個時間內,提高多人健康意識及教人抗病,都係另一種幫人方式,同樣有意義!

讀者留言