RUN

《沒有起跑線?》做學生 呂慧儀 陸永呻苦

真人騷《沒有起跑線?》因港媽Irene要肚中的B「贏在子宮裏」,更爆出金句︰「贏在射精前」,令坊間引來極大爭議!而過去兩集,為人父母的呂慧儀同陸永重返校園做一日學生,體驗現今小朋友於虎爸媽督促下,下課後又要去學習興趣班,學足半日至晚上約八、九時才吃飯,之後又要趕快做好功課兼溫習,難怪呂慧儀同陸永都呻辛苦!

呂慧儀 未出門已發脾氣

化身幼稚園學生嘅呂慧儀,表示今次為兩歲兒子蟹子提早感受現今幼稚園嘅校園生活,未出發前已感到壓力,又笑言因虎媽趕住送佢返學,令佢冇時間補妝!之後又嫌孭書包同水壺重,嫌三嫌四後,虎媽即叫呂慧儀收聲,唔好再問咁多問題,否則送佢去非洲,呂慧儀即收口!

行到邊學到邊

上學途中,虎媽見路牌有英文字,即叫呂慧儀邊行邊學,坐的士時又要求呂慧儀學英文拼字及講出街上景物嘅名稱,真係學無止境呀!

同學仔要求結婚

因為外形問題,呂慧儀笑言驚被同學仔歧視,點知真係被幾位小朋友取笑其外形古怪,仲指佢高到上天花板!之後有位小朋友說想同佢結婚,仲說今日結婚明天不用結,又可以結完再結,呂慧儀笑言結一日就分,令佢哭笑不得!

返兩間幼稚園

以為放學可以去玩,點知虎媽帶呂慧儀去公廁換校服,原來帶佢返另一間幼稚園,咁就唔使浪費下午時間,學足六小時夠晒充實喎!呂慧儀梗係唔制啦,表示想去公園玩,不過,最終都係要聽虎媽話,繼續返學!

驚嘆小朋友學習能力

返完第二間幼稚園後,呂慧儀又要去學寫手機程式,睇佢愁樣就知根本冇興趣!期間對於只得十歲的小朋友,都能寫程式大吃一驚,而對方說的英文名字根本聽唔明!

學游水叫白車

學完寫程式後,呂慧儀又被安排去學游水,教練又要佢游8個塘、200米個人四式,對於只懂蟹式嘅佢肯定難過登天,期間更經常飲水落肚,又大叫好攰想call白車,真係戥佢可憐!

驚到想逃避

來到全日最後跳舞班,呂慧儀最初都有心機跳吓,但見到其他學員又要一字馬,又示範朝天腿後,即O晒嘴!期間躲在簾後逃避學習,當然即被其他人拉出來,跳到落堂為止!

十分鐘做晒功課

學足一日晚上八點幾返家,呂慧儀表示,以為幼稚園學生平日可以去公園玩,點知原來唔係,之後食完飯後又要立即做功課!由於呂慧儀讀兩間幼稚園,虎媽要求佢十分鐘內完成所有功課,目的想佢習慣於最短時間內完成,將來考試就唔怕唔夠時間作答,虎媽真係用心良苦呀!

陸永 神氣變死狗

化身小學生嘅陸永,被虎爸要求做咩都要拿一百分,初初陸永充滿自信,入到學校見校長,亦應承唔講廣東話,不過,經過早會一輪熱身後,陸永即感到好攰,狀態開始下降!

被實驗考起

原本以為只於英文堂學英文嘅陸永,得知要做實驗駁電路板大感驚訝,又笑言自己完全唔識幫唔到手,感覺似搭台!

攰到瞓着

放學後,陸永又要進行一連串課外活動,包括面試班、跑步訓練及禮儀班,返到屋企以為可以唞吓,點知要學埋色士風先可以食飯,直至晚上十點半先可以休息,此時陸永雙目無神,相信坐喺度都瞓得着!