《熱血合唱團》學生獻唱〈17歲〉 為劉德華打氣

藝人 劉德華 自一月在泰國發生墮馬意外,回港後一直住院休養,全港市民都非常關注華仔的傷勢。好消息係大家終於可以見到華仔… 個背影啦!因為由佢監製和主演的電影《熱血合唱團》日前發布,而一眾台前幕後出席「謝師宴」,戲中飾演學生的33位年輕演員更齊聲唱出〈17歲〉,為片中飾演指揮的華仔打氣,場面感人!華仔睇過影片後,亦透過手機留言:「我也很想念你們!」

指揮家華仔登場

《熱血合唱團》由《五個小孩的校長》導演關信輝執導、劉德華監製,首張電影海報日前曝光,華仔以指揮家造型強勢登場,雖然只係得背影,但憑住專業的指揮手勢,都已經感覺到佢強勁的氣勢!華仔今次飾演一個要求嚴格、但又疼愛學生的嚴Sir,據知華仔佢事前特地請教真正的指揮家,務求將角色活現觀眾眼前。

感動獻唱〈17歲〉

電影早前煞科,戲中眾演員如吳岱融、尹揚明及盧冠廷等,以及33位合唱團學生齊齊出席「謝師宴」,與「嚴Sir」師生情深的學生們非常想念華仔,故事前秘密練兵,苦練後在台上獻唱華仔耳熟能詳的歌曲〈17歲〉,並高呼:「嚴sir,我們好掛住你,加油!」,隔空替華仔打氣!而華仔事後看到短片,亦透過手機留言:「我也很想念你們!」

盧冠廷喊唔出

除了華仔外,戲中仲有盧冠廷飾演校長、尹揚明飾演家長,以及近期人氣大熱的「鷲哥」吳岱融飾演校監,集多位好戲之人於一片!謝師宴期間盧冠廷上台分享拍攝點滴,原來佢從影以來都未拍過喊戲,所以試鏡時完全喊唔出,就算幻想老婆「瓜老襯」都唔成功!不過當正式埋位後,劇情令佢投入角色,眼睛就順利流下來!

謝師宴上,大家都興奮自拍留念,好有一家人的感覺!

全文完